Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1457

U1457.0

Kal. Ian. uii. f., l. ii., Anno Domini M. cccc. l. uii.

U1457.1

Brian, mac Pilib na Tuaidhe Mheg Uidhir, do eg, .i. mac do rígh Fer Manach, iar m-buaidh onghta & aithrighe maithi.

U1457.2

Cogadh mor in bliadhain-si eter Mag Uidhir (.i. Tomas) & clainn Rughraidhe Meg Mathgamna. Mag Uidhir do tinol a thire chuige & mur do chualadur clann Meg Mhathgamna sin, do-chuadur ar a n-daingneachaibh, .i. ar Eoganaigh & fa Sliabh Mughdorn.

p.190

U1457.3

Pilib, mac Tomais Meg Uidhir, .i. adbur righ Fer Manach & a clann do dhul, sluagh mor, a m-Breifne h-Ui Ruairc. h-Ua Ruairc d'fhaghbail fhesa rompo & do cur a caeraidhecht a n-daingen. Pilib do dhul co baile h-Ui Ruairc & an baile do loscadh lais & an tír uile archena. Pilib & a shluagh do inntogh. O Ruairc do breith ar Philib & imruagadh do thabairt do. Ru{fol. A 92a}aig mhor do thabairt do chlainn Pilib an tan-sin ar h-Ua Ruairc, .i. ar Tigernan, mac Taidhg h-Ui Ruairc & mac Maghnusa Grumhaigh, mic Cathail Buidhir h-Ui Ruairc, do marbadh leo don turus-sin & moran aile nach airmiter sunn. Pilib do thoighecht dia tigh don turus-sin fo buaidh cosgair.

p.192

U1457.4

Cogadh mor in bliadhain-si eter Mag Uidhir, .i. ri Fer Manach & h-Ua Ruairc, .i. Lochlainn, mac Taidhg h-Ui Ruairc. Mag Uidhir & h-Ua Ruairc do ghabail coinne fri a cheile os cinn Atha Conaill. Mag Uidhir & Brian, mac Pilib Mheg Uidhir, do dola, becan daine, a coinne h-Ui Ruairc, .i. seisur marcach & tri fichit coisidhe. Mur do chuala h-Ua Ruairc & Tellach Eathach & Teallach Dunchadha Mag Uidhir do beth, becan fedhna, tucadur amus coinne fair. Mur do connaic Mag Uidhir an feall do dhenum air, tainic roime co Gort an Fhedain. Is annsin ruc corachadh ceitirne do muinntir h-Ui Ruairc & corughadh galloglach air annsin. Is annsin do innto Mag Uidhir & Brian Mag Uidhir orra, an seisur do badur ar eachaibh & na tri fichit ceithernach & do maidmaidhedur muinnter h-Ui Ruairc co h-athusach & co h-adhmur in tan-sin & tucadur maidm Atha Conaill & na Graine forra, .i. abhann fil eter Feru Manach & an Breifne. Do innto Mag Uidhir annsin & a muinnter co h-edalach, athusach. & tucadar ceithern Meg Uidhir se cinn deg leo do uaislibh muinntire h-Ui Ruairc co baile Meg Uidhir & do cuiredh ar cuaillech garrdha Meg Uidhir iat & araile.

p.194

U1457.5

Glaisne, mac Concobair Oig Meg Uidhir, d'h-eg in bliadhain-si.

U1457.6

Toirrdelbach, mac Domnaill h-Ui Gallcubair, .i. mac h-Ui Gallchobair, do marbadh fare clainni Pilib Meg Uidhir ar sleibtib Cinel-Luachain, le Mac an Taisigh.

U1457.7

Lasairfhina, ingen Tomais Moir, Mic Briain Mic Maghnusa, ben Domnaill h-Ui Ceothain, obiit 14 Kalendas Iunii.