[Cogadh mor in bliadhain-si eter Mag Uidhir, .i. ri Fer Manach & h-Ua Ruairc, .i. Lochlainn, mac Taidhg h-Ui Ruairc. Mag Uidhir & h-Ua Ruairc do ghabail coinne fri a cheile os cinn Atha Conaill. Mag Uidhir & Brian, mac Pilib Mheg Uidhir, do dola, becan daine, a coinne h-Ui Ruairc, .i. seisur marcach & tri fichit coisidhe. Mur do chuala h-Ua Ruairc & Tellach Eathach & Teallach Dunchadha Mag Uidhir do beth, becan fedhna, tucadur amus coinne fair. Mur do connaic Mag Uidhir an feall do dhenum air, tainic roime co Gort an Fhedain. Is annsin ruc corachadh ceitirne do muinntir h-Ui Ruairc & corughadh galloglach air annsin. Is annsin do innto Mag Uidhir & Brian Mag Uidhir orra, an seisur do badur ar eachaibh & na tri fichit ceithernach & do maidmaidhedur muinnter h-Ui Ruairc co h-athusach & co h-adhmur in tan-sin & tucadur maidm Atha Conaill & na Graine forra, .i. abhann fil eter Feru Manach & an Breifne. Do innto Mag Uidhir annsin & a muinnter co h-edalach, athusach. & tucadar ceithern Meg Uidhir se cinn deg leo do uaislibh muinntire h-Ui Ruairc co baile Meg Uidhir & do cuiredh ar cuaillech garrdha Meg Uidhir iat & araile.]
R: Cogadh mor in bliadhain-si eter Mag Uidhir, .i. Tomas & h-Ua Ruairc, .i. Lochlainn, mac Taidhg h-Ui Ruairc. Maidhm mor do thabairt for h-Ua Ruairc & for Theallach Eathach & for Theallach n-Dunchadha le Mag Uidhir & le Brian, mac Pilib Meg Uidhir, .i. maidhm na Graine, dú inar' marbadh & inar' baithed sochraide mor dibh, ínnus co tucdad muínnter Meg Uidhir sé cínn dheg leo do cennaibh a namad co baile Meg Uidhir, gur' cuirset for cuaillech garrgha annsin iad a fiadhnuse fer n-Erenn & araile.