Corpus of Electronic Texts Edition
Rosa Anglica (Author: [unknown])
Section 50
50
Tuic fos gurub iad so is comarthai maithi in gach uile eslainti .i. brig laidir agan othar, & e fein co sdaidamail & spirut maith aigi, & adbur na h-eslainti dindurbad co h-urusa co h-uilidi, & co mad inunn bis an tes isin corp, & gan ítta air, & comad maith bias fo cenn a fuail, & a feruigh, & a alluis, & collata; & cibe bes mar sin eireochuid se o gach uile eslainti adburda; & cuirid fer in trachtaidh so fersada orro so tri Laidin, & is iad so a focuil tri Ghaedilg .i. brig & menma, etrumacht, spirut, collad & buille; & adeir Gatisden 131 gurub maith na comarthai
p.198
sin. Et is amlaid so minighes se sin .i. in brig do beith is i trén; etrum, laidir, & in t-othar do beith etrum ona eslainti tar eis comartha in dilegtha, & labairt maille resun; spirutalta .i. spirut te no fuar do beith co cutruma; maille menmuin .i. a beith slan, gan miceill ag eirgi as a collad .i. a beith co maith gan buaidert o smuaintighibh no o aislingtibh grainemla; buille .i. bualad laidir sa puls co follus, oir mina beith se mar sin, dobud olc an comartha sin; acht ge adeir Avicenna ni fhedamair ca méid do comurthuibh maiti maille grain do cóndcomur, do truime an collata, & do digbail in puls, & d'esbaid alluis, & tainic an t-othar ass fa deoigh cum faotuighti; gid edh is andum tic sin, & trit sin is cunntubartach na comurthai sin, & ni fetur faistíne déimin do denum ann mar sin, mar tegmus co minic isna h-eslaintib gera. (&) Fetur in focul so re n-abur se builli do miniugad ar indus ele .i. do builli in bidh arna coguint isin bel, oir is maith an comurtha, da féta an t-othar biadh do coguint co maith & a bualad lena fiaclaib co laidir & a bel do slugad co h-ordamail.