{fol. B 98a} Kal. Ian. 2 f., l. u., Anno Domini M. cccc. xc. 8.
Aibhilin, ingen Mic Mhaghnusa, .i. ingen Cathail Oig, idon ben Pilib, mic Emaind Meg Uidhir (.i. Mag Uidhir), d'h-eg in crastino Circumcissionis Domini, feria iii.
Niall, mac h-Ui Domnaill, .i. mac Aedha Ruaidh, mic Neill Ghairbh, d'h-eg ina laimdechus, xx. oidhci re feil Brighde.
Conn, mac Muircertaigh, mic Eogain h-Ui Neill, do marbadh le clainn Briain Bacaigh, mic Emuind Ruaidh h-Ui Anluain, caicidhis iar Nodlaig bec.
Maine, mac Maeilechlainn, mic Matha Mic Maghnusa, do marbadh a m-Bothaibh Muinntiri Fialain la Muinntir Gallcubuir, .i. clann Cathail h-Ui Gallchubuir, an bliadhain-si.
Donnchadh, mac h-Ui Domnaill & da mac Tuathail h-Ui Ghallchubuir, .i. Eoin ampersir; Toirrdhelbach & Art, mac Cuind h-Ui
Tomas Óg, mac Tomais Iarla, mic Geroid Iarla & Cormac Óg, mac Corbmaic, mic Taidhg Meg Carrthaigh, do leanmuin Eogain, mic Taidhg, mic Corbmaic Meg Carrthaigh, a tóraidhecht & Eogan fein & a dhías mac do marbadh leo ann & O Suileabhain Beirre do marbadh leo ann, .i. Pilib, mac Diarmada h-Ui Shuilleabhain & a mac-sin, .i. Tadhg in Chaennaigh O Suilleabhain, & da mac Dhuibhdhara Mic Shuibhne, .i. Emann & araile {fol. A 112d} & Brian Og, mac Briain Mic Shuibhne & daine imda aili.
Slaine, ingen Mic Con Mara, .i. ingen Shida Chaim Mic Con Mara, ben Mic Uilliam Clainni Ricaird, .i. Uilleag, mac Uilleag aili, d'h-eg in bliadhain-si, a tus an Erraigh.
Scél mór i n-Erinn uile isin bliadhain-si: .i. so sís. Mac Maghnusa Mheg Uidhir do ég in bliadhain-si: .i. Cathal Og, mac Cathail, mic Cathail, mic Gilla Padraig, mic Matha & araile; neoch bui ina bhiatach for Seanadh & ina chanánach coradh i n-Ard Macha & i n-espucoidecht Clochair & ina dheganach for Loch Eirne & ina persun a n-Inís Cain Locha h-Erne & do buí a n-degántacht Locha h-Erne ina fer-inaid espuic fri u. m-bliadhna x. ria n-a eitsecht. Ind leacc loghmur imorro & in gem gloine & in retla sholusta & cisti taiscedha ind ecnai & craebh cnuasaigh na Canoine & topur na desherci & na cennsa & na h-ailgine & in coluim ar gloine cridhe & in turtuir ar endca & in nech d'ar' buidhighi dama & deoraidh & deiblein bochta Erenn & in nech & buí lan do
Domnall, mac Nechtain, mic Toirrdelbaigh, mic Neill Gairbh h-Ui Domnaill, d'h-eg do 'n galur bric in bliadhain-si.
Sadhb, ingen Airt h-Ui Neill, d'h-eg in bliadhain-si .i. in ben do bi ag Rémunn, mac Pilib Meg Uidhir, re h-aimsir fhada.
Caiterfhína, ingen Sheaain, {fol. B 98b} mic in Espuic Meg Uidhir, d'h-eg in bliadhain-si.
Mairgreg, ingen Domnaill Ballaigh Meg Uidhir, .i. ben h-Ui Fhlannagain Tuaithi Ratha, .i. Gillibert h-Ua Fhlannagain, d'h-eg in bliadhain-si. Ocus leisin lanamhain-sin ro cumdaighedh seipel a n-onoir Dé & Muire ar in Achaidh Mhór, bhaile h-Ui Fhlannagain. Ocus a h-adlucadh a n-Dun na n-Gall iar m-buaidh aithrighi.
Ri Francc, .i. Carolus octauus, d'h-eg in bliadhain-si, quadragesimali tempore.
Cormac Mag Coscraidh, sái cleirigh a Lex & a Canoin, d'h-eg in bliadhain-si.
Cormac, mac Eogain, mic an Easpuic Meg Cochlain, oifficel Cluana Mac Nois & sai chleirigh, in Christo quieuit.
Innsoighidh do dhenum do h-Ua Domnaill, .i. d'Aedh Ruadh, ar clainn Airt h-Ui Neill & clann Airt & é fein do theagmhail d'a cheili & brisedh ar clainn Airt & Maeilechlainn, mac Neill, mic Airt, do marbadh leis h-Ua n-Domnaill
O Neill do marbadh in bliadhain-si: .i. Enrí Óg, mac Enri, mic Eogain, a tigh Airt, mic Aedha, mic Eogain h-Uí Neill, a Tuaith Eachadha le da mac Cuinn (.i. h-Ua Neill), mic Enri, mic Eogain, .i. Toirrdelbach & Conn, .i. clann ingine an Iarla. Ocus is leis in Enrí Óg-sin do-thuit athair na deisi-sin, u. bliadhna roime-sin, felonise. In dara Kallainn x. do mhi August do-ronadh in marbadh-sin Enri Oig.
Mac an Baird Oirghiall d'h-eg do 'n plaidh in bliadhain-si, .i. Aedh.
O Cathain, d'h-eg an bliadhain-si, .i. Seaan, mac Aibne h-Ui Cathain, secthmain ria feil Cros.
Mac Maghnusa do dhenam an bliadhain-si do 'n Oiffisel Mac Maghnusa, .i. do Thomas, mac Cathail Oig, mic Cathail Oig aili, mic Cathail Moir Mic Maghnusa, le Mag Uidhir, .i. le Seaan, mac Pilib Meg Uidhir & le Tomas, mac Tomais Oig Meg Uidhir, .i. le tanusti Fher Manach in tan-sin & le maithibh an tire archena, eter cill & tuaith. Ocus an Cetain ria feil Michil do-righnedh sin a n-Inis Sgeillínd.
h-Ua Cuirnin d'h-eg in bliadhain-si, .i. Concobur Carrach.
Pilib, mac Toirrdelbaigh, mic Pilib Mheg Uidhir, do dhul ar innsoighidh a Teallach Eathach & clann Emaind
Caislen Duna Genaind do ghabail in bliadhain-si le fer-ínaid righ Saxan a n-Erinn, .i. Iarla Cille Dara, ar tarraing Toirrdelbaigh, mic Cuind h-Ui Neill. Ocus urmor Gaeidheal deisceirt Erenn a fochair an Iarla ar an tarraing-sin & h-Ua Domnaill, .i. Aedh Ruadh & Mag Uidhir, .i. Seaan, mac Pilib, mic Thomais Mheg Uidhir, ina fhochair ar an tarraing cetna. Ocus Domnall h-Ua Neill cona clainn & cona chairdibh uile do dhul, sluagh di-airmidhe, a coinne an Giustis docum an caislein cetna & a ghabail le gunnadhaibh doibh arna mharach. Ocus moran braghad do buain as, fa mac h-Uí Domnaill do bi bliadhain illaim roime-sin & fa Art, mac h-Uí Neill Moir
(O Briain d'h-eg an bliadhain-si, .i. an Gilla Dubh, ri Tuadhmumhan.)
(Thomas Mortel do breith an bliadhain-si. Ocus Diarmuid Sbruan, do muinntir Cheanna Sáli, do marbadh in bliadhain-si ar cumusc. Ocus tri h-ordlaighe do bhuain do bhod Emain Moirtla, .i. athair Tomais Mortla, d'orcar do gunna andsa cumusg cetna-sin & tuilledh ar fichid do clainn do breith dho 'na dhiaigh-sin.)