[Domnall, mac Enri, mic Eogain h-Ui Neill, .i. neach d'ar' goired O Neill roime-sin, do tinol a charad & a chleamhnad co h-ein ínadh, .i. slicht Remuind Mheg {fol. A 113b} Mathgamhna & innsoighidh doibh co Dun Genaind & beth seal ím an caislen & beth doib oidhci Mairti ar sin ar in Crois Caidhbeanaigh. Feilim, mac h-Uí Neill-sin do marbadh, .i. mac Enrí Óig, do tarraing Neill, mic Airt h-Ui Neill & gacha coimtinoil aili da fuair orra isin maidin Dia Mairt. Ocus a faghail ina codladh & ina luighi doibh & fuar-duscadh namat do thabairt orra & maidm mor do thabairt annsin & moran do mhaithibh in Chuigidh do mharbadh ann, fa mac in Domnaill-sin h-Ui Neill, .i. fa Enri & fa Mac Cathmhaeil, .i. Gilla Padraig Mac Cathmaeil & fa Fheilim, mac Remuinn Meg Mathgamna & fa dha mac Shemais, mic Echadha Moir Meg Mathgamna & fa Mhaeilechlainn, mac Feilím Ruaidh, mic Cuind Meg Mathgamna & fa moran d'oirecht maith & d'aes-gradha sleachta Remuinn Meg Mathgamna. Ocus Aedh, mac Meg Mathgamna, .i. mac Briain, mic Remuinn, do ghabhail ann & a n-eich & a n-eidedh uile d'fhorgla do buaín dibh. Ocus an Feilim feissin, neoch do-righne an tarraing-sin, do lot ina cinn do buille do gha a frithghuin an mhadhma-sin & ég a ceann nomaidhe.]
R: Maidm Croisi Caidhbheanaighi an bliadhain-si ar Domnall h-Ua Neill (.i. h-Ua Neill) ria Feidhlim, mac Enri, mic Eogain & ria Niall, mac Airt h-Ui Neill, du inar' marbadh mac in Domnaill-sin, .i. Enri & inar' marbadh Mac Cathmaeil, .i. Gilla Padraig (etc., as in A {=H}.)