{fol. A 96b} Kal. Ian. i. f., l. xx.i., Anno Domini M. cccc. lxx. u.
4Cogadh mor in bliadhain-si eter Mag Mathgamna, .i. Remann, mac Rughraidhi & clainn Aedha Ruaidh Meg Mathgamna. Imirci neirt do dhenum do clainn Aedha Ruaidh a Fern Mhuighi & sluagh Gall do thecht ina n-aircis. Ocus Mag Mathgamna do techt astech fa Eoganaigh & a dhul amach aris i Fern Mhuigh & clann Aedha do dhul ar Galltacht. Mag Mathgamna do dhul ar sibhal ar Ghallaibh & clann Aedha Ruaidh & Goill Machaire Oirghiall do breith orra. Ocus maidm mor do thabairt ar Mag Mhathgamna & h-e fein do ghabhail ann & Brian, mac Rughraidhe Mheg Mhathgamna, do ghabail ann & moran aile do ghabail & do marbadh and.
Mac an t-Shabhasaigh & Feilim, mac mic h-Ui Neill, do {fol. B 90a} gabail le Conn, mac Aeda Buidhe & mac an t-Shabhaisigh d'elogh uadha ina diaigh-sin.
Sluaighedh mor do dhenum leis h-Ua n-Domnaill in bliadhain-si, .i. le h-Aedh Ruadh, mac Neill Gairbh h-Ui Domnaill, do thabhach Briain, mic Feilim h-Ui Raighilligh, ar h-Ua Raighilligh. Ocus techt do co Bel Atha Conaill & sith do dhenum do ris h-Ua Raighilligh annsin. Ocus a dul assin 'sa n-Anghaile do chungnum le clainn Iriail h-Ui Ferghail do bi ina cairdibh aigi. Ocus nert do ghabhail ann do annsin & dul assin a n-Uibh Fhailghi do chocadh ar Gallaibh a n-eraic a athur do tuit le Gallaibh roime-sin. Ocus moran do 'n Midhe do milliudh leis & baile caislein Delbhna do loscadh doibh & sith do dhenum do re Gallaibh ina diaigh-sin. Clann Cholmain & Calraighi d'eirghi doibh 'sa n-Gairbh Eisgir & Galloglaigh & Erennaigh do buain dibh annsin & h-Ua Domnaill & Toirrdelbach Mag Uidhir do inntodh ar in toraidh taebh t-shiar do baile Meg Amalgaidh & brisedh ar coimtinol na tirthadh-sin & moran do buain dibh da n-dainibh, a timcell mic Meg Amhalgaidh. Ocus ni fhuaradur en urchur o 'n toraidh & o sin amach. Ocus dul do assin do cungnum la na cairdibh a n-Uib Maine & assin a Clainn Ricaird & dul do assin a Conmaicne Cuile & assin n-Ichtar Connacht & a thoighecht dia thigh do 'n turus-sin fo buaidh cosgais & comaidhme.
Barun Dealbna d'eg in bliadhain-si, .i. sai cinn-fhedna & fer dob' ferr derc & daenacht & dob' ferr aithne ar gach eladhain do bi do
Aedh h-Ua Neill d'eg in bliadhain-si, .i. Aedh, mac Eogain, mic Neill Oig h-Ui Neill: .i. fer do bi lan d'aithne & d'eineach & do chennus-fhedna. A eg ina thigh fein iar m-buaidh Ongtha & aithrighi.
Aedh h-Ua Domnaill, .i. mac Nechtain h-Ui Domnaill, do bathadh in bliadhain-si a coiti bic ar bun na Banna.
h-Ua Ferghail d'eg in bliadhain-si, .i. Seaan, mac Domnaill h-Ui Ferghail.
{fol. A 96c}Mac Briain Mic Maghnussa, .i. Tomas Og, mac Tomais, mic Pilib, mic Briain, mic Mhail t-Sheachlainn, mic Mhaghnusa, mic Ruaighri, mic Duinn Mhoir Meg Uidhir, d'h-eg hoc anno im Shamuin.
h-Ua Ceallaigh, .i. Tadhg Caech, mac Uilliam h-Ui Ceallaigh, do cur an t-saegail de an bliadhain-si.
Edain Og, ingen Maigister Seoain Meg Uidhir, .i. bean Eogain, mic Eogain h-Ui Breislen, obiit 15 Kalendas Maii.
Cu Connacht, mac Briain Duibh, Mac Mhaghnusa d'h-eg.
Ruaidhri Glas Mag Carmuic, fer suairc, subaltach & fer denta rann Oglachais, obiit 6 Idus Maii.
h-Ua Neill, .i. h-Enri, mac Eogain h-Ui Neill, do dhul, sluagh, a Fhearaibh Manach an bliadhain-si & teach Toirrdhealbaidh, mic Pilib Mheg Uidhir do loscadh leis ar Srath Fhear Luirg, a cois na h-Arna.
Hic nata est Catherina, filia Caroli Iuuenis Mic Magnussa,
[gap: illegible]
)