Unknown author

Edited by Julius Pokorny

Drei Erzählungen aus dem Buch von Lismore

1. Colum Cille, Comgall und Cainnech

 43b2Colum Cilli ⁊ Comhghall ⁊ Caindech dochūatar do thigh Crumthir Dathī ar āidhighecht īar caithimh a proinne don mhuinntir. Is ē gnāthughudh dobhīdh ag Crumthir, cemadh ūasal ant āidhi noroised a h-aithle a proinne chuige, nā tibred bīadh dō cu h-arabārach. Rohīadhudh int aracul forra-som īar sin ⁊ nī tugad proinn cu h-arnabhāruch dōibh ⁊ nīr ̇fētsat in tech d' fhāgbāil la daingne an īadhtha bái fair, ciamad āil dōib.

Tucad proinn dāibh cu moch arnamhāruch ⁊ ba h-áine ann do sunnraid. ⁊ is amlaid tucad proinn dōib ⁊ soiscēl Cruimthir fuirre dia furāil forusa, ar rȯfitir nobīath mōit forro ⁊ comad leasc leo a caithimh 'san āine. Adubairt Colum Cille nā caithfed bīadh 'san āine. Adubairt Comghall roba cōra caithium ar an soiscēl, ciarbhó áine ann. Adubairt Caindech robo cōra a chaithimh ⁊ doneth cāch a chrābud. Adubairt Colum Cille:

1. C. C.

   Nocho loingiubh-sa cu moch
   isin āine dīdine,
   ūair is ē mu lā catha
   tar cenn flatha fīrinne.

1. C.

   Caithem sēre ar soiscēlu
   adhram Críst nā rub meabul,
   nā rub caithium 'nar n-ōenar
   tre cōir bæguil ar demhan.

1. Ca.

   Mad dia teacmad cēle Dē,
   loinged, lūisseadh immale,
   intan bīas cāch araglan
   cach ac aragan dognē.

Giarbo leasc la Colum Cille, docaith becān don proinn. Docaith Comhghall tres mhaith don proinn. Moo rocaith Caindech inā cach fear díb.

Tāinic Cruimthir Dathī dia n-acallaim īar sin. Atconnairc a bhfuighle et adubairt re Comgall: “Uair as tusa rȯfurāil an proinn do chaithim, cu rabh būaidh crābuid at baile dogrēs ⁊ gach duine tinnscnas crābud acat, rath crābuid fair.” Adubairt re Colum Cille: “Or as tusa as lugha rochaith don proinn, cach duini troiscfeas let a tosach a crābuid, būaidh crābuid dōibh.” Adubairt re Caindech: “Ár is tusa is mō rochaith don proinn, sonus bīd ⁊ lenna at baile.”

Et dorōnsat a n-ænta ⁊ a cadach īarum.

2. St. Patrick und Laegaire's Sohn Lugaid

(Vgl. R. Flower, Catalogue of Irish MSS. in the British Museum, Vol. II, S. 518, § 65.)

 44a1[A]raile fechtus tānic Pātraic cu Temraigh ar amus na rīghna bāi oc Læguiri mac Nēill d 'fhoirithin a meic imonn ainces būi fair .i. Lugaid mac Læguiri, ⁊ ba dī̇fuluing mét a shātha ⁊ is ecmaing mad dhogeibhthe dīl a sátha dhó. Cu tucad a n-oenchum re Pātric hē. Et rochuir scallac mhōr don arān bāi i bhfiadhnuise na clēirech ina bēl cur lean ina brághuit, gu rabha oc dul a anma as. Tucadh līach cuice ⁊ bainne innti ⁊ rodoirteadh i ceann na bloighi bāi ina brāghuit. Tairrngidh sium in léigh ⁊ suidhid cuice hī ⁊ tēit a anum as. Cuiridh cu mōr ar Pátraic sin ⁊ tēit ina chroiṡfighill ⁊ adubairt nach rachad bīadh 'na bēl nogu taithbeoaighthe Lugaid. Rotroiscset iarum trī lā cona n-oighthibh re Mīchél ima furtacht. Dorīacht īar sin Mīchēl cuigi i bhforceann in treas aighthi i richt eōin ⁊ nīr cumaing silled fair lasna ruithne grīandai bātar uime. “Ratbeannacha Dīa!” ol sé. “Cīa annso?” ol Pátraic. “Mīchēl archaingel sunn.” “Atlochur do Dīa h' acalduimh,” ol Pātraic. “Cidh dia tānacais?”  p.44 ol sī. “Dot coimhdhīghnad-sa,” ol Mīchēl, “⁊ dot foiridin imon aincis fil ocut, ⁊ rocruaidh bic thú,” ol Míchél, “⁊ is eimilt do Thigerna romat ⁊ tānacc-sa cugad don chur sa … ⁊ nī hē na filet toscai eimilta ele acum mena bheth do dermaire-siu.”

Is annsin tāinic int ēn ar amus Luigdech ⁊ rosāidh a ghulban 'na brāghuit ⁊ rotarraing in lēigh ⁊ in mbloigh asa brāghuid ⁊ roēirigh ⁊ tuc a lāim dar a agaid ⁊ tērla ⁊ nīrbo mō a dāethain inās cech duine asa h-aithle.

Conadh annsin roordaig Pātraic mīr Mīchēl, ⁊ līach Mīchēl ó cech āen, ut dixit Patricius:

1. Mairg caithius proinn, a Chrīst cain,
   in cēin bīs forsin talmain,
   cin dechmad do rīgh na nēl
   ocus gan mír do Mīchēl.

3. Maol Póil und die tote Nonne

(Vgl. R. Flower, Catalogue …, Vol. II, S. 513, § 14.)

 44b1Maol Pōil h-ūa Cināetha .i. ab Mainistreach Cilli Becāin robhūi ⁊ manach aili ac lūadh astrolaice. Mar docotail īar sin, coṅfaca chuice mainces soiscēla robo marbh sē lā roime sin ⁊ gerān mōr aice. Cumain leis a h-ēc. “Cinnus atāthar ann sin, a bannscāl?” or sé. “Cuma dhuit-si ōn,” or sī, “ac lūadh astralaice ⁊ gan mh' ēcnairc-si do ghabhāil. Mairg doghnī dano,” or sī. “Cīa h' ēcnaircc-si bud āil duit ūaim, a bannscāl?” or sē. “In bīait ōn,” or sī, “in bīait a ndeagaid na bīaiti, in bhīait ar in mbīait, in bhīait fon mbīait,” or sī fot a h-anāla ic furāil na bīaidi do ghabāil co menic fuirri, connā fuil acht aithfrenn na marbh ēccnairc is mó onōir ac Dīa inā in bīait, ut dixit:

1. In mháin is ferr ar talmain
   tabrad nech hī ar a anmain,
   acht is buidecha Dīa de
   do sīrghabāail na bīaide.

@article{G201040,
  editor 	 = {Julius Pokorny},
  title 	 = {Drei Erzählungen aus dem Buch von Lismore},
  journal 	 = {Irish Texts},
  editor 	 = {J. Fraser and Paul Grosjean and J. G. O'Keeffe},
  address 	 = {London },
  publisher 	 = {Sheed and Ward, 31 Paternoster Row},
  date 	 = {1931},
  number 	 = {1 },
  pages 	 = {42–43}
}
 G201040.bib