]> The Destruction of Troy Togail Troi An electronic edition Unknown Ernst Windisch Electronic edition compiled and proof-read by Beatrix Färber University College, Cork: School of History The HEA under the LDT Project First draft. 23470 CELT: Corpus of Electronic Texts: a project of University College, Cork
College Road, Cork, Ireland — http://www.ucc.ie/celt
2015 CELT online at University College, Cork, Ireland. G103005

Available with prior consent of the CELT programme for purposes of academic research and teaching only.

 Manuscript sources Dublin, Trinity College, MS H 2.17 (cat. 1319), p. 127b to 172b. Dublin, Trinity College, MS H 2.18 (cat. 1339) (Book of Leinster or Leabhar Laigneach, formerly Leabhar na Núachongbála), p. 397a to 408b. Editions and translations Windisch (see below), edition with German translation, Irische Texte ser2 1 (Leipzig 1884) 1–142. Whitley Stokes, (ed. & tr.), Togail Troi: the destruction of Troy (Calcutta private print 1881) [LL 217a–244b, 406b–408b]. Idem, 'Addenda and corrigenda to Togail Troi', Revue Celtique 5 (1883) 401–04. Literature Gearóid Mac Eoin, 'Das Verbalsystem von Togail Troí', Zeitschrift für celtische Philologie 28 (1960) 73–223. Gearóid Mac Eoin, 'Ein Text von Togail Troí', Zeitschrift für celtische Philologie 30 (1967) 42–70. Robert T. Meyer, 'The Middle-Irish version of the story of Troy', Études Celtiques 17 (1980) 205–218. Uáitéar Mac Gearailt, 'Togail Troí: ein Vorbild für spätmittelirische catha?' In: Erich Poppe, Hildegard L.C. Tristram (eds), Übersetzung, Adaptation und Akkulturation im insularen Mittelalter (Münster 1999) 123–129. Uáitéar Mac Gearailt, Togail Troí: an example of translating and editing in medieval Ireland, Studia Hibernica 31 (2000–2001) 71–85. Erich Poppe, 'Personal names and an insular tradition of Pseudo-Dares', Ériu 53 (2003) 53–59. Brent Miles, 'Togail Troí: The Irish Destruction of Troy on the cusp of the Renaissance', In: Alan Shepard and Stephen D. Powell (eds), Fantasies of Troy: Classical tales and the social imaginary in medieval and early modern Europe (Toronto 2004) 81–96. Brent Miles, 'Riss in Mundtuirc: the tale of Harmonia's necklace and the study of the Theban cycle in medieval Ireland', Ériu 57 (2007) 67–112. Brent Miles, 'The Irish history of the "third Troy" and medieval writing of history', in: S. Sheehan, J. Findon and W. Follett (eds), Gablánach in scélaigecht, Celtic Studies in honour of Ann Dooley (Dublin 2013) 220–237. Michael Clarke, 'The extended prologue of Togail Troí: from Adam to the wars of Troy', Ériu 64 (2014) 23–106. Ralph O'Connor, Classical Literature and Learning in Medieval Irish Narrative (Woodbridge 2014). The edition used in the digital edition Ernst Windisch Whitley Stokes Irische Texte mit Übersetzungen und Wörterbuch Irische Texte Whitley Stokes Ernst Windisch Leipzig S. Hirzel 1884 2:1 3–62

CELT: Corpus of Electronic Texts

Ernst Windisch's corrigenda and the most important notes are included in the electronic edition. Variants are not reproduced. The letter 'v' has been changed to 'u' in all but two instances. F, f, and S, s, with overdot are rendered as F, f and S, s + h.

Text has been checked and proof-read twice. All corrections and supplied text are tagged.

The electronic texts represents the edited text.

Quotation marks are rendered q.

Soft hyphens are silently removed. When a hyphenated word (hard or soft) crosses a page-break or line-break, the page-break and line-break are marked after the completion of the hyphenated word.

div0=the literary text; p=the editorial paragraph. Page-breaks of the printed text are marked.

Dates are standardized in the ISO form yyyy-mm-dd.

Names of persons and places are not tagged.

 Middle Irish period The text is in Middle Irish. Some words are in Latin. One word is in Greek. adaptation prose medieval Greek myth Troy destruction 2019-06-05 Beatrix Färber ed. Changes made to div0 type. 2015-07-09 Beatrix Färber ed. File proofed (2); file parsed and validated; SGML and HTML files created. 2015-07-08 Beatrix Färber ed. File parsed and validated; SGML and HTML files created. 2015-07 Beatrix Färber ed. TEI header created. 2015-07 Beatrix Färber ed. File proofed (1), structural and light content markup applied. 2006 Data capture Company file capture Text captured. Togail Troi. [H. 2, 17, p. 127b.]

[Doroigni Iason innisin tria druidhecht Mediae .i. cet[h]ardam Ulcain do thabairt a hiffrind, ocus arailiThe words in brackets are inserted from the Book of Leinster, p. 397a.] ut ante dictum.

IAr forba, tra, in gnima sine atrubairt Éga fri Iasón nib slan dot-r'inchoisc Média m'inghensa fadéisin: is hi dorigne insein uile, ol sé.

[Dares c. 3.] Doratad iar suidhe do Iason &ersir; do anradhaib na Grece in crocunn órda.

IArsindi, tra, rothinscan Iasón cona shlóghaib deirge na cathrach &ersir; ascnam a n-orba &ersir; a feraind fadein. Rofuabair Media lenamain dia coraib firaib feib ronaisc fiadh righaib &ersir; choradhaib na Gréci &ersir; fiadh mathib innsi mara Toirrén, &ersir; a gradhugudh dogrés d'óinmnái. Atrubairt Iasón friése nachas-berad leis da thír dia mberad a claind le. Doróni Media íarsin gním cuilech úathmar escon .i. marbad a macc ar sheirc &ersir; inmaini ind ócláig rochóeim, &ersir; ar ná bad fochund a facbála &ersir; a nembrithi leis dochum a thíre.

Ceilebrait iarsin in milidh don ríg, &ersir; tucsat in crocond, &ersir; lotar asin chathraig. Cengait iarum inna luing &ersir; imraiset iarsin tsét chétna, co hinber srotha Cíi, sech airera Trói, co riachtatar phort na Gréci. Rucsat íarsuide a long i tír, &ersir; tiagait do acallaim in ríg Péil ros-cuir frisin techtairecht, &ersir; at-fiadat a scéla &ersir; a n-imtechta o thosuch co forcend, &ersir; rotaiselbad dó in crocond. Doróne inti Péil atlugud buide do Íasón &ersir; do Ercoil &ersir; don fhoirind archena. Dorat séotu &ersir; máine do chách doreir a ngráidh, ocus araile.

Misi Mailechlainn in beg sin.

[Dares c. 3.] Ba cuimnech, tra, in caur &ersir; in cathmilid &ersir; in cliathbernaidh cet as tresium thainic do shil Ádhaim .i. Ercoil mac Ampitrionis, don dimicin &ersir; don melai tucad fair o Lamhedheon, o rig na Troiannae .i. cen óighedhecht phuirt do thabhairt dó, dia rofhaidhed málle fri Iasón do chuinchid in croicind órdhai. Trom les a chridi iar suidhiu cen a dighail forsin lucht roboi i comaithces na Gréci for ur Erpoint allather, i n-airthiur Assia bici, rogab breit mbecc di ferund isind uillind íartaraich na Frigiae fri tracht mara To[r]rén. Ar ní rabai do láechradhaib domhain nech rosiacht cutrummus frisseom. Ni rabi láech is-síu nótheghed do dhigháil a uilc i críchaib cíana comaithche oldáss.

IS hé Hercoil romarbh in coraidh comnairt cosna trib cendaib isind inis Erithria i n-inbiur mara Torrían, hi coicrich Éorpa &ersir; Affraice, i fíriarthar in betha. i. Gerion a ainmside: rocrin [side] na tuatha &ersir; na cenéla.

IS hé Ercoil dano rochumdaigh na da cholomhain immon muincind nGadidanda, &ersir; cách dib oc déchain a cheile .i. coloman Eorpa oc dechsain Affraici &ersir; coloman Affraice oc dechsain Eórpa. IS hé dano dorat a dóit frisin carraic, dús in roised marbad Cáic mic Ulcáin, robói im-meodhon na carrge, co rochur in cairric isin sruth.

IS he damarbh Bussirim robói i coraidecht hi taeb srotha Níl. IS he side noedbrad a óeghedhaidh do sruth Níl.

IS hé dano romarb in leomhan n-angbaid isind ailt móir i n-iarthardheisceirt in betha.

IS hé romarb in nathraigh ndúabais n-écendais co secht cennaib robói il-Lenna palúde, rochrín &ersir; rodithaigh tuascert in betha do dóinib &ersir; indilib &ersir; cethraibh.

IS he dano rotrascair Antheum mac Terrae ar nert gaile.

IS hé dano dorat scaindir for bantracht úallach na cíchloisc[th]i rorergatar in n-Assia móir, trian in betha, co slait &ersir; síniud &ersir; indriudh, co rofallnaiset in leth n-airterach don domon fri ré trichat bliadan doib sic, co tuc Hercoil leis úadhibh arm na ríghna día rofaided chuinchidh.

IS hé doríghni gnímu díarmidhe archena.

IS hé tuc in crocann órdai a tír na Colach.

Fer, trá, doríghni na gníma sa ní rofodaim dó cen tairniudh díumais Lámhedhoin. Conidh íarsin dochóid do chuinchidh sochraite &ersir; slúag co caindle &ersir; co ánradhu Greci. Dochúaid do atach na ríg &ersir; na tóisech &ersir; trénfer in tíre co tístáis leis do díghail a chneite &ersir; a osnaidhe.

IS ed ronuc a báire &ersir; tossach a thocos[t]ail co ríghaib Lacdemóni .i. Castoir &ersir; Pullúic, dá euchraid insin &ersir; dá chridiscél thuascirt in betha. Roinnis doib íarsin aní ima tanic .i. do chuinchidh shlóig &ersir; sochraide día dhíghail for Lámedón in domíadh &ersir; in dímicen dóratad dhó fadéin &ersir; do Iasón mac Esóin &ersir; do mac[aib] ríg &ersir; ruirech na Gréci ule, &ersir; a[t]bert nár mó a olc dhósom cid fair rolá oldaás dona Gréccaib uile &ersir; do Chastor &ersir; do Phullúic fadheisin. Asbertatar Castar &ersir; Pulluic cía nóthech[t]atáis ilacmi &ersir; iltuatha na Gréce uile, &ersir; ciamtís coimsidhe atúaidh ó chiund trachta Ceperíon fades hi coicrích Gréci &ersir; Etále, nóregtáis leiseom do chumtach dála &ersir; dúnaidh &ersir; do díghail a ancridhi cech leth fo crícha in betha. Roattlaigestar Ercoil in scél sin.

Luidh úadhib íarsin in Salamiam co Telamón cosin ríg, &ersir; atrubairt fris IS do émh, ar sé, dodechadhsa chucutsa, do innisin duit na mórméla &ersir; na mórdímicen &ersir; na mórathisi dorat Lamhedhón for fhairind na lunga Argai &ersir; for slúag Íasóin &ersir; fórmsa féin. Mana mater, trá sin, ol sé, ticfat na Troíanae for crechaib do slat &ersir; d'indriudh na Gréci. IS áil dam iarom condígiseo lem icummai cáich for slúaghudh dochum Trói. Ní ba meisi, ar Telamon, cétfher feímthébas báigh &ersir; sochur fheraind na Gréici do chosnam. Regatsa lat in lín bíat do chairdib &ersir; do chocelibh. Regat lenn dano attrebthaidhe Sal[a]miæ doneoch gebes gái 'na laim &ersir; is tualaing éladu imbertha airm. Bíar fúiridhe dano ic ernaidhe th'aithisce.

Forácaib bennachtain íar suidhe la Telamon.

IARsindí, tra, rodál Telamon co feraib Salamiae 'na degaidh, &ersir; roglé síth &ersir; cháincomrac fri sidhe. Rochumlúi co rurich &ersir; imper Moesiæ co Péil, cend side gascidh &ersir; úaille &ersir; díumais &ersir; rigdachta fer túascirt in betha. ISs ed rorádi fris iarum. Do íarraid shocraide chucatsa dodechadhsa do dul i tír na Troíanda, ár día ndíchiseo in slógha[d]sa dofhuscéba Grécu othá airter thíre Arábia co tracht mara Égetai, othá túaiscert Tracíae co críchae Etále fades. Atresat uile la hescomlúd duitsiu; ar is tú cend ániusa &ersir; erdercusa &ersir; grían na Grece uile. Comérigh iarum fri les tuatha &ersir; chenel na Greci, ar is les do Grécaibh ule in sloghadhsa madh coscrach cathbuadach thérnáidhter de. Cía notechtaindse éimh, ar Péil, firu in talman andes, o thír na hEthiope fathuaidh cosin nIndía, &ersir; hua buaidlecaib hErcoil &ersir; o turcbail grene cosin rind n-airtherach &ersir; deiscirt Eorpa benas fri hinber mara Torren &ersir; co fuinedh ngrene, dus-berainnse uile letsu do milliud &ersir; d'indriudh na Troianda, do thogail &ersir; do loscad cathrach Lámedoin: a fil immurro do socraide acumsa is letsa chongenas. INtan, trá, batir erlamha longa &ersir; lugbarca letsa, fáid techtaire chucumsa &ersir; nodbia mo socraite sea arrlam intansin Celebrais hErcoil iarum do.

Luid hErcoil iarum in Pilum co Nestur: is he bá rí i suidiu. Roíarfaigh ésidhe scéla do Ercoil cía fochund immatarla? Ro[fh]recair Ercoil, do cuinchidh socraide, ar sé, co ndechaise lem cot uile shocraite in slóghadhsa i tiagat maithi na Gréci .i. Castor &ersir; Pullúic &ersir; Talemón &ersir; Peil, do díghail ind ancridhi dorónadh frímsa. Mad foraibse immurro noimbérthae méla &ersir; athis no[fh]indfaitís fir betha o turcbáil gréine coa funedh mo chumangsa ocá dingbáil dib. Ocus cidh i n-India no Scithia no Persidhia no i n-Arabía no i n-Égipt no i n-Ethióip no i n-Eispáin no i n-Galléib no i n-Germain no i n-Alania nobetis caingne &ersir; écraiti dúibhsi, ní bád lesc lemsa a digail fa na críchaib imechtrachaib sin cenmóthá na tíre ata nesam duín. Ro[fh]recair iarum Nestor Bennacht ar cách comhnertas sóire &ersir; socraiti na Greci do chosnam. Mad meise immurro, regat lat intan bas furidhe cech rét. Buidech dano hErcoil do sein.

INtan, trá, rofhitir hErcoil toil &ersir; accabur na n-ánradh &ersir; na laechraide, doróigu mileda rochalma a thíre fadesin. Rotinolad leis íarum an-robái i n-airiur Gréci do longaibh &ersir; lestraib &ersir; nóaibh, othá inbhiur mara Point atuaidh corici in muir n-Árábácda fadess. Rochóraigh a choblach ar muir, &ersir; rothogh míliudha &ersir; ánradha rochalma na Greci uile chuci as cech aird tria epistlib &ersir; techtairibh, &ersir; tancatar ind rig roghaellsatt commílib &ersir; airbrib &ersir; slúaghaib adóchum. Íar tiachtain, trá, dona slúagaib &ersir; dona sochaidhib co mbátar a n-óenbaile, bái comairle lasna ríghaib in i n-oe[d]che no il-lóo noregtáis do phurt na Trói[andae]. IS fair deisid léo: dochotar i n-aidhchi hi port Sygei.

O rancatar íarum in port hísin dochoidh hErcoil &ersir; Talemón &ersir; Péil, co cath mór impu, do thogail Trói. Roan Castor &ersir; Pullúic &ersir; Nestor cósna longaib. Atchúas íarsin do Lámhedhon slógh mór do Grecaib do gabáil phuirt Sygei. Atraig sidhe cofergach &ersir; cohúathmar, cofortrén &ersir; coferamail, co laechraid uallaig borrfadaigh na Trói imbi, &ersir; rogab remi arammus mara, O dochúatar hi comfochraib dona longaib rothogaibset idna catha ósa cennaib cinnchomair frisin mbéist n-amnais huathmair imma rothecail ócbath amnas thuascirt in domain. Rothindscansat in Troiáendae cathughudh darcend a tíre &ersir; a n-athardai &ersir; a cathrach. O robás, trá, im na fíbsa dochuaid Ercoil dochum na cathrach. IMásech dano doralatar .i. ní hinund slighi roghabhsat na Troiannae dochum na long, &ersir; rogab Ercoil cona shlúagh dochum na Trói. IMthúsa Ercoil, rosiacht cósin Trói &ersir; fóuair in Trói n-oslaicthe cen nech ocá dítin nách 'cá gabáil. Conos-tarat fó cíaigh &ersir; fó corthair thened, co ro-mharbh an-rop inéchta innti, co rothinóil in murro ór &ersir; argat, seóit &ersir; máine &ersir; indmassa na catrach leiss. Nocha n-érlai asin cathraigh acht cía térnai do rind gái &ersir; do gin chloidhem.

[Dares c. 4.] INtan íarum atchúas do Lámhedhón inredh na cathrach rothintái for cúla don cathraich, conos-tárla tel i tel do Ercoil im-medón shéta. IS annsin, thrá, rolá Ercoil sním día menmain, &ersir; rolín a shainnt do thodhail fhola na Tróianda, &ersir; robris ráon catha tré nert fer for fórmna mathe na Tróianda immá righ: co romarbhadh and Lámedón rí na Tróianda, cona trí macaib &ersir; cona rígraidh &ersir; míledhaib. Dochoid Ercoil íarsin, co mórchoscur dia longaib, co Castor &ersir; Pulluic &ersir; Nestor. Íar comrac íarum dona slúaghaib rorannsatt etarru in mbrait. Do Thelamón rosiacht Esióna inghen Lámedoin, fóbíth is hé cétna láech do láthaib gaile na Grece dochóidh isin cathraigh. Ó thairnic, trá, aní sin uile dochuuaidh cech toisech dib día thír co mbuáidh &ersir; coscor.

Ba dubach dushaimh domenmnach, tra, Príaimh mac Lámedhoin, ríghdomna na Troianda &ersir; na hAsia bice, don mórglifit donn-ánic .i. loscad na Trói &ersir; a arcain, a séoit &ersir; a máini &ersir; a indmasa &ersir; a bratt do breith do Grécaib, a shíur fein do breith i ndóire &ersir; a tabhairt i tuarustal &ndot;gaiscidh do Thalemón. Ba troma cech ngalar leis toitim a athar &ersir; ár na Tróianda do chor isin chath &ersir; isin chathraigh. Ba hathis &ersir; bá méla mór dano leis búadugud do Grecaib dona Troiandaib, &ersir; Frigía do bith fó chuitbiud &ersir; enechruce. Derbh leis mani tharrastá colúath ní tharrastá cobráth an dioghailinserted by a later hand.. Arapaidhe is menma comarba bói leiseom cíabó gabháil do láthrach dó. IS ed rop áil [dó,] athnúguth na mur &ersir; deimnighudh na catrach &ersir; córoghudh sluag &ersir; popul. Dodechaidh íarsin d'imrádud sin do chathraig a athardhai cona mnái .i. Écuba, cona macaib .i. Echtor .i. Alaxander .ii. Diophoebus .iii. Helenus .iiii. Troilus .u. Ocus Andromacha ben Hechtoir mic Priaim. Ocus dá ingin Príaim, édhón Casandra &ersir; Poliuxína. Robái mór macc la Priaim, cenmóthá in cóic fhersa Écubu, do macaib imtach &ersir; caratban. Céd mac, iss ed adfiadhar do genemain úadh uile, &ersir; ní ármidhter nech díb isin tsíl ríghdai cenmóthá in cóicfersa Écubai &ersir; mic aile rogenatar o mnáibh dlighthechaib &ersir; ó chommám[aib] córaib téchtaidhibh. Ní ármidhter immurro na mic dorónta i n-etechtu &ersir; i n-adhaltras isin chenéul rígda. IAR riachtain, tra, do Príaimh dochum Trói doróntá múir móra daingne leis immon Trói, comtar uilliu commór oldate na cét-múir. Dorónta fochlói &ersir; rátha móra impe doráith. Rotinólait slóigh &ersir; sochaidhe móra dona fíb robátar for esróidiud sechnón Frigíae &ersir; Assíae bice, co mbeth ócbath látir lúthbasach aice do ghabáil &ersir; do chathugud darcend a cathrach. IS airi doróni sin, ná tístáis námhait fair cen airius inna chatraigh &ersir; cen imdeghail ó ócbaidh rochalma, amal tancatar for a athair .i. Lamedon. Conrótacht leis rigimscing amra im-medhón na catrach. Dorónadh dano treb cháin chumtachta &ersir; foradh leis for temair &ersir; dingna na cathrach do dálluc &ersir; d'fordécsin &ersir; do dibricud námhat tairis sechtair: arc (i. dind) Príaimh ba hedh a hainm. Rocossecrad leis altóir do Íoib isin rígimscing hisin 'na erchomair fadeisin. Conrótachta leis dóirsi na cathrach co- léir. IT he anso a n-anmand na ndorus .i. Antenor .ii. Idia .iii. Dardanida .iiii. Ebusee .v. Cithimbre .vi. Troiana.

INtan íarum atcondairc Priaim in Trói fothaichthi &ersir; ro-thairisnighestar daingne &ersir; sonairti na cathrach, ocus o roairigh sloigh &ersir; sochaide erlama leis, dorat múin imbi do cathugud fri Grécu. Líach leis íarum ilar na laech rochalma &ersir; imbed na miledh ngaiscedach, cena n-imbirt fri dighail a athar &ersir; a cathrach. Fobith doróscí ind ócbath sin do ócbadhaib domain uile, etir lúas &ersir; léimnigi, etir snám &ersir; dibricudh &ersir; clesamnaigi, etir imbrim eich &ersir; charpait, etir imbeirt gái &ersir; chlaidibh &ersir; imbeirt fhidchille &ersir; brandub. Doróscichset dano eter cruth &ersir; deilb &ersir; deichelt &ersir; ání &ersir; athlaimi. Espach leis íarum intan bái forás fora slúagh inna chathraigh cena n-imbirt fri torba. Roboi oc frithalemh cía aimser nóreghad do díghail a osnaidhe, conid airi sin rogairedh dhó Antinóir, toisech sin &ersir; erlabraidh deirscaigthech do Troíandaib, día chor fri thechtairecht hi tíre Gréc, do acallaim na tóisech dodechatar chucai la hErcoil do orcain na Trói, día acáin fríu ind étúalaing móir roimretar for Príaimh .i. [a]athair do marbhad, a chathair do loscain, a shíur do brith i ndóire, a ór &ersir; a arcad do shlait, a chathair do innriud, cen dire, cen mathigudh nách neich dib sin fris. Ba doilghe cech ráet leis dano cen tidhnacul a shethar a dóire, ár día tidnaicthae dósum a síur asin doire dogéntáis síth &ersir; córus.

[Dares c. 5.] Dochuaidh dano Antinóir fri techtairecht amal roforcangrad fair: fairend óenlungu al-lín. ISs ed luide intí Antinoir artús, in Moesiam, co Péil. Trí laa &ersir; téora aidhche dhó for oegedacht i suidi. ISsin cethramadh loo immurro roiarfaigh Péil scéla dó, dús can a chenél &ersir; cía rofhóidh fri techtairecht. Rofrecair Antinóir: fri techtairecht dodechadsa, ol se, ó Príaimh mac Lamedóin, ó rígh na Troiandae. Do Troianaib mo chenél. Do aisnéis immurro &ersir; do inn[i]sin na domenman áidhbli fil for Príaim don domíadh &ersir; don mélai doratsat Gréic fair .i. a athair do marbadh &ersir; a chathair do loscad, a shíur do dóeradh, cenam- maithighud fris. Nó-loghfadh dano cech ní díb sin día tuctha dó Isióna a síur a dóiri. Amal rochuala fochétóir intí Péil anísin, ros-gab ferg &ersir; tóirrse dond athesc sin, condébairt: IS dánatus &ersir; [is] essamna mór do Troíanaibh toidecht cen fháosam, cen chomairche ina tíre [co] Grécu, fobíth bá mór d'ulc dorinnset fri Grecu. Rodlom, tra, Péil do Antinóir [dul] asin tír &ersir; asin phurt. Táníc, tra, Antinóir íar forcongra ind ríg dochum a lunga. Rochuirset a luing for muir, ocus tancatar rempu sech Bóethíam dochum Salamiae. O tháinic co Talemoin, co rígh Salamiae, roinnis a techtairecht dó .i. do chuinchid Isiónae chuic[i]seom sech cách — ar is dó tucad il-lóg a gaisceidh &ersir; a míltnechta — &ersir; atrubairt nárbó coír ingen in cheníuil rígdai do bith i ndóiri &ersir; fhoghnam amal chumail. Ro-frecair íarum Talemón &ersir; atrubairt na derna olc fri Priaim &ersir; ní hé fórúair techt in tshlúaghaid, &ersir; asbert ná tibred do neoch in chomáin doratad dhó il-lúag a gaiscidh. Rodlomai dó astír íarsin.

Dodechaidh Antinóir iarsin dlomadh sin ina luing, &ersir; táinic co hAchiam co Castor &ersir; co Pullúic. Roinnis doibside aní imma tánic, &ersir; atbert corbó ferr sith &ersir; charatrad na Troianda &ersir; Priaim oldás a n-eisith. Día tuctha dó dano Isióna forcúla ro-badh ádhbhar don [t]síth sin &ersir; don c[h]aratrad. Rofhrecratar side ná dernsat fochunn daebtha no essoentad fri Troiándai ár ní rabatar oc argain nách ic loscud na cathrach, nách ic tabairt a braite. Asbertatar dano nách acu robói Isíona, &ersir; diamad acu nobértáis arcúlu do Phríaimh. Atbertatar dano fris na beith ní bádh sía isin tír, ár doruménatar is do brath Gréc tháiníc ó Thróiandaib. Téit iarum Antinóir astír dochum a longu, com-mbrón mór &ersir; co nduba. Atfét dia muintir in n-athis &ersir; in mebul mór tucadh fair o Chastor &ersir; o Pulluic.

ISs ed dochuaidh íarsin in Pilum co Nestor, ár na badh meraighecht dó nech do thóisigib in tshlúaghaid cen ríachtain. Roíarfaig Nestor scéla dó, cisi thucait ara táiníc. Atfét Antinóir: do chuinchidh Isíonae inghine Lamedóin', ol sé. Amal rochúala Nestor anísin rogab ferg &ersir; luinde fri Antinóir, &ersir; at-bert bá cró[d]acht &ersir; bá naemnáire mór do Tróianaib tiachtain co Grécu: fóbith is toisechu dorónsat Troiannai olc fri Grécu oldás Gréic fri Troiannu. Ba toirsech intí Antinóir don chuitbiuth rofuirmedh for Priaim &ersir; fair fadeisin &ersir; for Troiannu uli.

O dochuaidh iarum 'na lungai roimrái cech ndírech aramus Troi. Íar ríachtain don cathraigh adfét a scéla &ersir; a imthechta ó thúus co dered do Priaim. IS ar nemní, tra, is tomáite duitsiu cech olc dorónsat Gréic frit costrathsa i farradh na méla &ersir; na athisi &ersir; na dímicen doratsat fort féin &ersir; for Troiannu uile don chursa. Man[i] dingba, trá, dít in méla sin ní bía do máin co lá mbratha: mani thócba dano do ghaiscedh úas gaiscedhaib cáich, co fesatar fir domhain in díghail dobéra forsna Grécaib dorónsat olc frit. Ní bá menma dano la cech n-óen turcébas airbirt ngaiscidh úas áird hi tíribh Gréc corob forbsi tóisech imbres gaiscedh &ersir; ánius &ersir; allud. Mani choméir ócbad rochomnart fri cath &ersir; fri fogail na Gréci, coraib gol cecha leithe isin Gréic léo.

IS sí sin techtairecht Antinóir.

[Dares c. 6.] Confócartha, tra, a huili maicc do Príaimh, &ersir; a uili thóisig &ersir; a uile ríg &ersir; a mílidh. Rocomgairmed dó dano Antinóir &ersir; Anachís &ersir; Aéneas &ersir; Aucoligonta &ersir; Panthus &ersir; Lampades. O thancatar, tra, na tóisig uile dochum na dála &ersir; atrubairt Príaimh rád n-athisc fríu íar ríachtain, Rofhóidiusa, ol Príaim, Antinóir uaim fri techtairecht i tíre Gréc do chuinchid mo dígdhe [ó Grécaib] íarmo chrád dóaib. IS dó rofháidius int[sh]ainrudh, dús in tiberthá mo shíur dam asin dóire. Ní namá immurro ná tucadh sidhe asa dóire, acht dorónsat fochuitbiud immum fadesin &ersir; fo Troiánaib uile. ISs ed, trá, as áil dámsa: slúaigh &ersir; sochaide do dul isin nGréic do chuinchid Isiónae ar écin húair na hétar ar oais no ar charatradh. No comad buide [leu] a telcud huadhib dar éisi na braite dobértha asin Gréic árna beitís arboir na Troiannae fó chuitbiudh ní ba síre la Grécu. Roguid iarum Príaim a macu colléir, &ersir; ronert comtís airchindich oc tinól cech ráeta, oc tabairt chind for airimmeirt slúaigh &ersir; sochaidhe. Cidh mór ronert cách insin mórmó ronert Hechtoir.

Rofregair dáo Hechtoir — is hé cetfher roraid insci isin dáil &ersir; i comthinol na Troiána — co n-érbairt: Mesi, ol sé, óen do Throianaib, lásmad ferr díghail mo shaenathar &ersir; dénam neich bad maith la Príaim, cid aca dofhaethsaindsae. Acht nammá atágur in gnímsin tinscantai mani berthai i cind &ersir; mani forbantar &ersir; mani ructhar i calad, &ersir; is móite a mebol duib a thinnscetal &ersir; cen a forba. Fóbíth at lia Greic oldáthe, it ilardai a slúaigh &ersir; a popuil &ersir; a socraite di cech leith fo Eóraip ule. Ocus cid óen túath no óen aicme nammá do Grécaib níptá do lín na gaisced a tairisium, cénmóthá mórshocraite na Gréice uile. Ar cid edh bad áil do Grécaib conérset fir Eórpa léo óthá trethon Silail i ndescert Etále co tuaiscert tíre na nÁgándae isin chorthair immechtraigh na hEórpa benas frisin n-ocián mór fathuaidh. Atethfet, coméirgfit dana léo, mád áil dóib, fir na n-innsi mara Torrén, othá rind Pithir i Sicil co Pacén &ersir; co Posfoir, co inber mara Point. Ní háil damh íarum tóchuiredh ind fhíallaichsin, fóbíthin ní fil di ócaib domain lucht as commaith gaiscedh fríu. Ar ní bíat acht hi cathaib &ersir; i congalaib &ersir; i cocthib: cech tuath oc orcain &ersir; ic inriud a chéli, co nd[at]athlaimite oc imbirt gái &ersir; sceith &ersir; chlaidib. Ní hinunn &ersir; lucht na hAsíæ bice: ní romúinsetar sidé dóib bith i cathaib no i coicthibh, acht i síth &ersir; cáinchomrac &ersir; indess dogrés. Ní fil lib íarum sluagh fón innassin; conidh airisin nách sant lem tochuiredh na laech s[i]n dona fil cutrummus do laochradhaibh domain. Ní thairmescub immurro díb arná habairthe is día émudh dam. Ní bá mo chuitse immurro dorega farcend.

[Dares c. 7.] Robói immurro Alaxandér oc nertad chocaidh fri lucht na Gréci &ersir; atrubairt: Bíam tóisech don tslúaghudsa, ár farétar co ndingiun toil Priaim, co tiber búaid &ersir; choscur asin Gréic sech [cach]. Brisfet for mo naimte: dobér seótu &ersir; máine: ticub féin slán dom thigh arcúla. IS dé atá lem, fóbíth robá óen na fecht oc tafhann i sléibh Ída: conaca chucum Mercúir mac Ióib &ersir; téora mná rochoema 'na dheghaidh .i. Iuno &ersir; Uenus &ersir; Minerua. Atfetet scéla dam fochétóir. Dorónadh émh, ol íat, cobled mór dona huilib bandeib &ersir; fherdéibh lá Péil mac Aiáic, co fócurthe trá dochum na bándsisin na huile dee, eter firu , &ersir; mhnáa im Ióib mac Sáturind, im Apaill mac Ióib, im Dardán mac Ióib, im Mercúír mac Ióib, im Neptuin, im Uénir, im Meneirb, im Iúnaind. Ní tucad immurro Discordía and eter. INtan íarum ros-gab failte mór ina n-óltigh dochóid Discordía co lubgort na n-E[s]perda co tuc uball óir ass &ersir; co roscrib inscribend ind .i. hoc est donum pulcerrimae deae, co rotheilg úadi dar seinistir in tige 'na fiadnaisi uile. Roingantsigset na slúaigh anísin &ersir; roerleghad 'na fiadnaisi aní robói isind ubull. Ásaith, trá, cosnum mór don scéol-sin eter na trí bandea as cháimi robbátar isin domhun .i. Íunaind &ersir; Minerba &ersir; Uénir. Bá cosmail dino ri Íunaind ná raibi cosnam frie, ar bá hingen ríg .i. Sháturind, bá síur &ersir; bá ben ríg aile .i. do Íoib mac Sháturind. Ba cruthach, trá, ind inghen sin, etir fholt &ersir; rosc &ersir; fíacail, eter méit &ersir; chórai &ersir; chummai: folt fochóel fathmannach furri. Dá brái dubai dorchaidi lea co mbentáis foscud i cechtar a da grúade. Nírbó menma léa ben do mnáib domain do derscugud dí ar chóemi. Cid Menirb dano, nirbó menma lea nech do chomardad fría[e], ar fhebas a crotha &ersir; a delba &ersir; a chenéuil &ersir; a heladhan, fóbíth cech eludu dogníter isin domhun is úadhi rohairced. Rothocaib dano Uénir a cruth &ersir; a daelb &ersir; a súarcus for áird, fobíth cech súirge &ersir; cech lennánacht fil isin domun is úadhi atá: ár ní raibi isin domun mhnái a maccasamla, conidh isin fechtain no[cha] fetaitís roisc dhoíne a décain ara háille &ersir; ara sochurcháine. Dochótar dino i mbrithemnacht co Íoib: ni bérsa, ar eiside, bhreith dúib; acht eirgid co Alaxandér mac Priaim fil i sléib Ída &ersir; regaid Mercúir reuib corop hé béras breith dúib. Tancatar íarum a cethror .i. Uénir &ersir; Íunaind &ersir; Menirb &ersir; Mercúir rempu chucumsa, ol Alaxander, co rucasa breith dóib íar ngelladh lúacha rim ó cach mnái díb. Torgaid dam íarum Íunand ríge na hAsíae móire día nderscaigind hí dona mnáib aili. Torgaid Meneirb immurro eladain cach réta dogníat dí laim duine. Torgaid dam Uénir in mnái bád chóime nobiad isin Gréic, dia mbad hí noderrscaiged don mnái aili. Rop hí mo brethsa, trá, corbo Vénir ropo sochraidhiu and. Dobéra dano damsa Uenir in mnái as áillem bís isin Gréic amal rogaell.

And adbert Diophoebus is degcomairli dobeir Alaxander, arbair &ersir; slúaigh do techt isin Gréic do thabhairt braite &ersir; athgabala esti, co mbad buide lasna Grécu comassec do dénum.

ÍArsin, trá, rotairchanastar Helenus dóib fástini con-érbairt: Ticfat námait co Troiannu: fochichret in Trói darcend: mairfit firu na h-Asía, día tuca Alaxander mnái asin nGréic.

Dorairmesc dano Troil mac Priaim oc rádh ind athisc sin, ósar mac Príaim in Troil sin arái n-áeisi: treisi immurro indás Hechtoir ar imguin &ersir; áni &ersir; forneurt. IS bec, trá, ná radechrad imbí ic nertad in cathaigthe. Ná tairmescad ní imuib, ar sé, sáibfástíne Heleni. Ropo guth cét a beolu óen léo techt isin Greicc.

[Dares c. 8.] O rofitir dano Príaim toil &ersir; accobor cáich, &ersir; o roairigh corbó áil léo ule techt in tslúagaidh, rofhóid Alaxandér &ersir; Diofóeb in Foeniam do thogha &ersir; do theclaim miledh, amus &ersir; óclách do dul in tsluagaid. Roherfhúacradh dano o Príaim for a phopul &ersir; for lucht a thíre i coitchend tiachtain do dáil &ersir; chomairle. Rothecaisc a macu isin dáil sin co mbád tigerna do cech ósar dibh a shinnser. Roinnis dano don popul 'na degaid side cach tarcasal doratsat Gréic forrusum na Troiana, conid airi sin, ol Príaim, as áil damsa Alaxandér co slúag imbi do chor isin Gréic do díghail neich dona holcaib móraib dorónsat frind. Acht chena cidh nách hé Antinóir innises scéla dúib, ár is hé dochóid isin Greic fri techtairecht. Am éolach, émh, ol Antinóir, isin Gréic. Atchonnarc a láechu &ersir; a n-ánradu, &ersir; ní fil ní armad écen dúibsi a n-ecla: ar is áiniu &ersir; athlaimiu for córaidh &ersir; for trénfhir &ersir; for mílid andáte mílidh na nGréc. Cesc dino, ol Príaim, in fail húaib nech lásmád olc techt in tslúaghaid? Rofregair íarum Panthus mac Eúfronn, fer airechdai do Throiánaib &ersir; degcomairlid ámra, con-érbairt ó guth airísil: Atchuaid dámsa mo athair, ar sé, fer díarbó ainm Alaxander, aimser hi tibérad side mnái asín Gréic, comad hé sin forbha &ersir; forcend na Trói. Fóbíthin dorostar co slúag ámhnas áichthidi 'na degaid: dobértar na Troiana fó gin gái &ersir; chlaidib; conid ferr deiside bith i síth &ersir; i cáinchomrac, amal atáthar ann, indás tóchuired slóigh &ersir; sochaide no-ínrifed in Trói &ersir; nos-millfed. IN tan rochúala íarum in popul augtardás Panthíi roláset gáir &ersir; chuitbiud &ersir; fonitniud imbi. Ocus atrubartar ani bád maith lá Príaim dogéntáis airi. Asrubairt íarum Priaim fríu. Maith lemsa éimh, ar sé, fúr na long &ersir; tinól slúaigh do techt isin Gréc. Ar día ndentáís[i] comairli far ríg ní thesaba maith na hordan foirb. Doróni Priaim dano atlugud buidhe doib uile, &ersir; roléic dóib imthecht isin dáil &ersir; techt dochum thighe. Rofoíded Hechtur isin Frigia túascertaig do chuinchid sloig &ersir; sochraite.

INtan rochúala Casandra ingen Priaim in chomairle rofuabair a hathair, rotinnscsin tairchetul in-neich nobiad archiund and, co n-érbairt. Bíaid, trá, ol sí, mor d'ulcc din scéol sin. Dofoethset láeich &ersir; ánraid, rig &ersir; rurig, tóisig &ersir; ócthigeirn na hAssía dond imrádud sein.

[Dares c. 9.] Tánic íarum amser thechta for muir, &ersir; roscaich cumdach na long. Tancatar mílid &ersir; slóigh o Fhoenía hi comaitecht Alaxandér &ersir; Diophóebi. Tánic Echtair mac Priaim co slogaib &ersir; sochaidib asind Frigia thuaiscertaig. Tánic iarum aimser fordécsana in mara. Ocus roguid Priaim aní Alaxander co ndernad coglicc follomnogud in tslúaigh rofóided malle fris. Rofóidit dano tóisigh aile 'na[fh]arrad .i. Diophóebus &ersir; Áeneas &ersir; Polidamas. Roerfhúacair dano Priaim do Alaxander co mbád fri techtairecht nódechsad do denum síth &ersir; cháinchomraic eitir Grécu &ersir; Troiannu.

O roscachitar, thra, na hulisa, dodechaid Alaxander cona c[h]obluch ar fut mara Toirrén, &ersir; Antinóir rempu oc breith éolais dóib. Nírbó chían, trá, ríasin n-amsirsin i ndechaid Alaxander dochum thíre na nGréc &ersir; ría tóscugud co comfochraib Cetheree, doluid Menelaus mac Atir, árdtóisech side do Grécaib, dochum insi Pil do acallaim Nestoir, co comránic fri Alaxander mac Priaim ciundchomair. Ba machtad mór íarum lá Menelaus in sluag rigda d'aicsin iconn imram. Ingnad leis immed na long &ersir; rolín in chobhlaig. Derb leis is im mac ríg no rigdomna robátar. Ni rolam dano táeib ríu, acht tánic cách dib sech a chéile.

IS hí sin ré &ersir; aimser i tánic Castor &ersir; Pullúic co slúag impu co rabatar hi comfochraib Frámiae, &ersir; rucsat don chursin Isionum ingin Lámedóin léo dochum a tíre.

ISna laithib cétna dano robói sollomain mór i n-inis Chetheree .i. sollomon Íunainde. O thainic, thrá, Alaxander i comfhochraib do phurt Cetheree — in Cetherea hisin, inis mór hí, &ersir; tempull do Uénir inti — is annsin ros-gab ecla átrebthaidi na hindsi ríasin coblach romór, &ersir; roíarfaigsetar cia robói isin chobluch &ersir; can dodechatar &ersir; cid día túitchetar. Rofrecair doib íarum Alaxander: Priaim rí na Troiánda rofoidh a mac fri techtairecht .i. Alaxander, co ndísed i tíre Gréc, co rothadled ic Castor &ersir; ic Pulluic.

[Dares c. 10.] INtan rochúala, trá, Elenna [ingen] Leda, derbfhíur Chastóir &ersir; Phuilluic &ersir; ben Menelái mic Atir, ríachtain Alaxandir isin phurt, tánic am-medon na hindsi co rabi for ur in trága hi comfochraib in puirt hi raibi Alaxander; fóbíth dochúaid a menma fris, &ersir; rotholtnaigestar di in gilla rochalma, caindel &ersir; ánle &ersir; dretel na huile hAsía, co mbúaidh crotha &ersir; delba &ersir; súarcusa dóine ndomain. Rind n-ága &ersir; áiniusa &ersir; imgona tuascirt in betha asa haínius &ersir; asa hurdarcus ná rathalla isind Assía fri muir Torréin anair, co ndechaidh síar isin Greic co mbered buaidh &ersir; choscur cecha cluichthi i n-óenach na Greci, &ersir; ní choemnacair oclách na octhigern ná rigdomna cutrummus fris do lucht na Gréci, co roscáil a theist &ersir; a erdarcus fón Éuroip uile, co rocharsat bantrocht na n-Athanáensta arna cúisib sin, conid airi sin tánic ind rígan Helena dochum na trága co faced o súilib cinn in nech adchúala o chlúasaib. ISsind inis sin robái tempul &ersir; ídaltech Deáne &ersir; Apoill, &ersir; is í suidiu doróni Helena a idbarta dona hidlaib doréir, amal ba bés dona geintib i sollomnaib a ndée &ersir; a n-arracht. Íarsin atcúas do Alaxander Helein do dul dochum in phuirt. Ó'tcuala són dano, tánic codían do décain a crotha. O'tchonnairc, trá, rod-char comór, ar ní raibi do mnáib domain mhnai nochosmailiged fría im deilb &ersir; im dénum acht Políxina ingen Priaim nammá. Ni roacht-side dano cutrummi friesi im hordon &ersir; im erdarcus &ersir; im sercaigi, conid airisin rod-char Alaxander mac ríg na Trói, corbó lán cech n-alt &ersir; cech n-ága and dia grád. Tánic dano Alaxander i fíadhnaisi na hingine do thaiselbadh a crotha &ersir; a écosca, a eirraid &ersir; étaig, fóbíth bá hétach intlaise bái ímbi, cona imdénum do dérgór drumnech, cona ecor do legaib logmaraib imbi anechtair, &ersir; tonach derscaigthe fria chnes dond étuch sirec[d]ai cona chimhsaib deiligthe di ór fhorloiscthe. Ba sochraid &ersir; ba úallach indas in toichmi thuc leis do déchain in banchuiri. O rodéc cechtarde araile díb tarrasatar ed cíana cách díb ic imsellad a chéile. IS hí dano a mét rochar cách díb araile co nárbó dúthracht léo eterdeilig[ud] etarru co bás. Roforcongair dano Alaxander fora muntir comtís fúiridi &ersir; comtís erlaim fri taithmech a long acht co tísad ind adaig. O thánic íarum ind adaig dochóid Alaxander cona muintir do indriud ind ídalthaige; &ersir; doberat láim thairis. Rucsat Helenam cona banntrucht léo dochum a long. Bá maith, tra, lá Helind aníséa. O roglé dó indred ind ídhailtaighe &ersir; sárugud Uéniri &ersir; Apaill &ersir; breith Helene for aithedh, atchualatar lucht na cathrach anísin. Tecait as-cech aird. Doberat tend comraic do Alaxander arna ructhá uadib a rigan co mbetís fir marba ocá cosnam. 'Arsin atcúas dond [fh]airind [do] Tróianaib bátar isna longaib anísin. Tangatar side lomthornacht asa longaib, &ersir; rogabsat a n-armu forru, ocus ro-inretar in magin-sin &ersir; rogabsat ina-rabe and do brait &ersir; do chrudh. Tancatar íartain 'na longaib &ersir; roimretar co port Tenetos. O thancatar cosin portsin rofúabair Alaxander cendsugud Helene, ar dorala i nduba &ersir; i ndobrón mór ar scarthain fría tír &ersir; fría talmain &ersir; fria muintir fadeisin. Fóidhis íarsin Alaxander techta co Priaim, do aisnéis scél dó inneich forcoemhnacair and. INtan iarum atcúas do Menelaus robói i n-inis Pil breith a mná i mbrait do Alaxander &ersir; argain na hindse, dochuaidh fachetóir co rabi in Sparta &ersir; rotóchuired dó a brathair Agmemnón, &ersir; atchuaid dó Helind .i. do breith do Alaxander, do mac rig na Troiana ar athedh &ersir; ar elód.

[Dares c. 11.] Teite Alaxander colleicc cona mnái &ersir; cosin mbrait móir rogab co Príaim cosin Trói, &ersir; atfét a scéla íar n-úrd ond úair dochúaid for conair cosin n-úair donáníc. Ro-gab tra subuchus &ersir; lúth mór Priaim don scéul doríghni Alaxander, ar indar leis robad buidhe lasna Grécu coemhchlód &ersir; imassec don brait &ersir; dona mnaib .i. Isióna darcend Heline. Ecmaing ni hed robói and.

INtan atchonnairc, tra, Priaim brón &ersir; dubai &ersir; mertin for gnuis Helene robói ocá comdidhnad &ersir; icá nertad &ersir; icá gellad dí nobethe dia reir, &ersir; ní bad mesa dí beith isin Trói indaas beith isin Lacdemoin i raba remi.

Amal atcon[n]airc immurro Cassandra ingen Priaim aní Heleind rothinnscain fástine &ersir; tairchetal aneich nóbiad archiund: marbad in tslóigh &ersir; thimdíbe na tóisech, tuitim na ríg, etarimdíbe na ruirech, dichennadh na cathmíled, fordinge na curad, támthutim na senorach, dilgend &ersir; loscud na cathrach, indred an tíre &ersir; in talman &ersir; ind feraind. Beti, tra, ar sí, láeich &ersir; ánraid &ersir; cathmilid, ar sí, fo chonaib &ersir; fíachaibh. Bíat lána na maige do chnámaib na láech, día cendaib, dia lessaib, día laragaib, conid isin fechtain farétfa nech imtecht for maighibh na Trói ri himmad na cúala cnám in-cech maigh. Dofáethsat, tra, fir Éorpa &ersir; fir Asía tríad fhotha, a ingen! ar Casandra.

ISí sin fástine Casandra do Troianaíb.

Tánic, tra, ferg Priaim fri Casandra din scéol sin, &ersir; doratad bos fría bél.

O thánic íarum Ágmemnón do Spairt robói ic comdídnadh &ersir; ic nertad a bráthar. Na bid merten na dobrón fort, ar sé, ar dogéntar th'ainech &ersir; ní bía fó mélai. Ar atresat fir thréna na hEorpa uile do díghail th'osnaide, ar is cuma do-génat a digail, &ersir; amal bid fri cech n-áen díb fein dognethé. ISed deisid léo íarum techta do dul uadib sethnón na Gréci uile do thóchasul shlúagaidh na Gréci, do fhúacra chatha for Troiánaib. Roherfhuacrad úadib ar thúus for Achil &ersir; Pátrocuil, dá ríg na Mirmedonda, &ersir; for Nemtolim rí inse Róid, &ersir; for Diómid rí innse Arpis. O thancatar side d'insaigid Agmemnóin co mbatar in Sparta, ocus dorónsat a seissiur tóisech comluga &ersir; cominsce &ersir; cró cotaig &ersir; óentad, &ersir; atbert[at]ar na dingentáis caingen aile ría techt co slógaib &ersir; co sochaidib do díghail for Troiándu in dímiada móir tucsat for Grécu. Roórdniset íarum Agmemnón do impeir &ersir; do aírdríg forru uile. Rofhóidset íartain techta co Grécu do thinól &ersir; do thocasal na Grece uile, othá in cend airtherach slebe Elpa andes co coicrích Traciae &ersir; Alaniae fathuaidh, othá iairther tíre na Macedonda aniar co tracht mara Égetai sair, co mbetís coinne mence &ersir; comhdhála &ersir; tercomraicthe cecha criche fóleith acu: co mbetís nóthe &ersir; longa &ersir; lestair erlama léo, &ersir; co mbétís 'na slúagaib &ersir; 'na cathaib h[i] purt na nAthne[n]sta co n-escomlaitís íarum for oinchói dochum na Trói do díghail a sáraichthi.

Castar immurro &ersir; Phullúic, iar closin doib a sethar do brith ar athed &ersir; ar elod do Troiánaib, dochótar 'na luing for muir do áscnam in degaid a sethar. IS ed doch[u]atar iarum la toeb in trachta Lesbetai, co rothimairg anbthine íat dochum thíre, co tardsat a luing hi tír. IS annsin testátar Castor &ersir; Pulluic, &ersir; ni fes cia dechatar íarsin: acht atberat na geintlidhe rosothe i ndib retlandaib condat Gemini a n-anmand an-nim. IS doigh immurro is badud robadit isin ainbthenach. Robatar immurro ind Lesbetai fora n-iarair in-noaib &ersir; il-longaib co roshirset commin óthá inber a tíre corice an Troi, &ersir; ní fhúaratar. Cenco beith, tra, d'esbaidh for Grécaib din sluagud sin, acht na da ánrath &ersir; na da rind n-agha sin ba mór esbaidh doib.

O roscáil, trá, in scélsa fón Gréic .i. Elend do brith ar athed, dofúasnad mór fon Éuraip uile óthá tíre na Meótacda co hinber srotha Réin. Rofích a nGrécaib uile in scél sin, fó bíth bá mebul lá cech túaith &ersir; la cech cenél innti amal bad fríu fadeisin dognethe. Robatar, trá, dála mence in-cech tuaith, &ersir; dochótar aithesca cáich cochéle día fhis cuin bad mithig dóib techta for conair, &ersir; roherlaimigit dóib aidmi na conaire, etir longu &ersir; siúla &ersir; refeda, etir biad &ersir; étuch &ersir; indili. Roglésaiset na Tesáldai a n-eochu &ersir; [a] ngraighe dia mbreith co hor in mara. Roglantá luirecha &ersir; cathba[i]rr na Mirmedóndai dia meirg &ersir; salchur. Roarmthá a ngái comtís géra fri fogail námat &ersir; echdrann. Roslipthá a claidib &ersir; imorchoraigit a scéith ría ndul for conair. Roerlaimigit timthaige &ersir; erredai &ersir; étaige na nAthnénsta. R[o]bói, trá, óengáir arfut na Gréce uile fóbíth roraindset íat fadéin. Drem díb a cailtib ic búain na fidbad coná cluined nech guth a cheile díb la himed na sáer &ersir; lochta ind fognuma ic tescad &ersir; ic timdibe &ersir; ic snaide na crand. Drem aile dib i cerdchaib ic dénum arm &ersir; íarnaig .i. ic dénum chlaideb &ersir; lúirech &ersir; scíath, ic slibad &ersir; ic slaide a n-arm. Ní rabi, tra, isin Gréic ule nech cen monar fon innassin. Robdar lána do dunadaib &ersir; do longphortaib óthá in corthar airtherach Rétiae anairdes co íarthar tíre Tracíae for Erphoint sair-thúaidh. Robátar ann na hA [th]nensta i ndúnad. Robátar Pilipénsta &ersir; Mecenda &ersir; Lacdemónda i n-óinbale. Robatar Argai &ersir; Danai [&ersir;] Pilasci. Robatar and áes Tráciae &ersir; Arcadiae &ersir; Tesáliae &ersir; Achaiae &ersir; Boetiae. Robátar in Macedondai &ersir; in Mirmedondai &ersir; ind Íondai. Robatar ann na Galátacdai &ersir; na Telsciatai &ersir; ind Eoldai. Nírbó ní, thrá, in tinólsa na Gréci corici in tóchastal robói i n-innsib marv Torrén. Ni mór forácaib commet intibsidé óthá tonna in mara Áratacdai cosna gáethlaighib Meotacdaib. IT íat so na hindse ir-rabe an tochas[t]alsin .i. hi Creit &ersir; hi Ci[pi]r &ersir; hi Roith &ersir; hi Pil &ersir; in Salamia &ersir; isna hindsibh díanid ainm Acspartide &ersir; innsi Celiberniae &ersir; inis Ambrache. Robói dano tinól mór hi Corcira &ersir; Ithaic &ersir; Egelai &ersir; in Cutheria &ersir; in Calamia &ersir; in Carpado &ersir; i Treit &ersir; in Íuén &ersir; is-Sodaim &ersir; in Calamis &ersir; in Égina &ersir; in Patreida &ersir; i n-innsib Celidónis &ersir; i n-innsib Babidi &ersir; in Maccorés &ersir; in Abarthia &ersir; in Sciro &ersir; in Peperetho &ersir; hi Lenno &ersir; in Tháeso &ersir; in Imbro &ersir; in Sciro &ersir; i n-arailib innsib olchenai dochél clú &ersir; erdarcus. Ocus is ed innister and co tancatar sluaig &ersir; sochaide cid isna tírib comfochraibe filet a comaithces na nGréc an[d]es &ersir; atúaidh &ersir; iniar. Dodechatar ann ámna huathmara na n-Éutruscecda failet a tuaiscert na hEtále, asa gaisged dorósce do clannaib domain. O dechadur dano lucht Dalmatiae &ersir; Dardaniae &ersir; Istriae &ersir; Panuníae &ersir; Retiae, dochodar and in lucht rocalma failet isin chorthair tuascertaich in domain fri sruth n-Istir atuaid .i. anreth Dacia [&ersir;] Alania. Dodechatar and dano Dromantauri filet ic inberaib na Meótacda. Dodechatar and marc ... saería na nAgarda. Dodechatar ann dano Melachli seichtori sáera na slúag sin. Dodechatar and béos Ypomelchi &ersir; Ypódés &ersir; Groni &ersir; Neurai &ersir; Agatharei, &ersir;c.

[Dares c. 12.] Robói, trá, tinól morshluáigh do phurt na n-Athanénsta. Mór mbuiden &ersir; cuitechta tancatar and. Mór do rígaib &ersir; do tóisechaib &ersir; do thigernaib &ersir; do trénfheraib &ersir; do láthaib gaile na Gréce dodechadur and. Mor di airbrib &ersir; cétaib &ersir; mílib tancatar ann. Is cuit péne na herracht andsin inn Eoraip uile cona slúagaib, cona rigaibh, cona tuathaib, cona chenélaib. Mad nech atchised muir Toirrén, cruth robrecad do longaib &ersir; lestraib &ersir; libarnaib, robad áebind a décsin. Ba lór d'erfidibh in talman don lucht robátar for telchaib &ersir; trachtaib na nAthanenste forchomét na coblach &ersir; na slóg &ersir; na mbuidaen do muir &ersir; do thír .i. aicsin cech ríghdomna &ersir; cech ríg &ersir; cach tóisig, inna toichim ríghda, aicsin cech miledh &ersir; cech trénfhir fó armaib, ocus ic déchain in leith ón muir na rámha icond imrum &ersir; séol n-ildathach cecha tire, fóbíth rotinolad an-robai di longaib &ersir; lestraib i n-airiur na hÉorpa uile &ersir; in n-innsib mara Toirren. Co ndernta sretha dib la hor trága na n-Athanensta d'immarchur morslúaigh na hEórpa ule dochum na Trói.

IS hé so immurro lín long dochúaidh cech toisech do Grécaib 'sin cobluchsa.

Cét long ba si fairend Agmemnóin mic Átir, a tírib na Mecenda.

Menelaus mac Átir, a Sparta .lx. long. Archilaus &ersir; Pertinonor, dá ríg Boetiæ .l. long. Ascalapius &ersir; Alimenus, ex Arcomero .xxx. long. Epistropus &ersir; Scedius, ex Proscidía .xl. long. Aiax mac Telamoin &ersir; Isionae ingine Lamedóin co seisiur tóisech .i. Teocrus a brathair &ersir; Bublatio &ersir; Amphimacus &ersir; Doríus &ersir; Teséus &ersir; Pulixenus, cóica long a lín. Nestoir a Píl .lxxx. long. Toas o Etholiam .xl. long. Aiax mac Olei, a Locris .xxx. long. Venerius ex Inania .xl. long. Antipus &ersir; Pilipus &ersir; Toas ex Celidóne .xxxvi. long Ulix ex Odisia no Ithaca .xii. long. Protesalaus &ersir; Protarcus, ex Pileo .xl. Emileus, ex Pilis .x. long. Podamas &ersir; Machón, da mac Escolapi, ex Eutrus . . . xxxix. Achil &ersir; Patrocuil, dá ríg na Mirmedonda, ex Pathia. cóica long. Telepolemus ex Róda .ix. longa. Polipites &ersir; Leontheus ex Larisa .xl. long. Diomides &ersir; Euryalus &ersir; Stenelus ex Arpi .xl. long. Piloctines ex Me[li]boia .vii. longa. Goreus ex Cipro .xxi. long. Prothous ex Manesia .xl. long. Agapénor ex Arcadia .xl. long. Mnesteus ex Athenis .cóica long. Lín, trá, do ardrígaib dorímther sund do Grecaib nói ríg cethrachat uile.

[Dares c. 15.] IARsindí, trá, tancatar uile do phurt na n-Athanensta, rotochuirit a uile tóisig co hAgmemnón diá chomairle cinnas dogéntais. O thancatar iarum na tóisig i n-ainbale atrubairt Agmemnon fríu co ndechsaitís drem uadib do insaigid Apaill, dia íarfaigid cinnas nóbíad in slúagad, in bad soraid no in bad indola eitir. Romol cách in comairle sin &ersir; dochúaidh Achíl &ersir; Patrócuil frisanísin. O ráncatar íarum coruici Delfus, tempul Apaill, roíarfaigset scela dond arracht. Rofregair Apaill doib co mbad chóir techt in tslúagaidh, ar doristís co cathbúadach dia taigh cind .x. mbliadan íar ndula for in Trói. Roedbair Achil edbarta móra do Apaill isin dún sin. INtan, tra, robói Achil ic dénum na n-edbart isin tempul, is ann tánic Calchas mac Gestoris co ndánaib &ersir; edbartaib ó Troiánaib do Apaill. Tánic side isin tempul &ersir; iarfaigis scéla na Troianna coléir, cindas nóbíad for cind dóib don chathugud &ersir; don chomthócbáil bái dóib fri Grécaib. Rofrecair Apaill co cuirfide darcend in Trói cind .x. mbliadan. O'tchuala Calchas anísin tanic co hAchíl &ersir; doróni a oentaidh &ersir; a charatradh fris, &ersir; do-deochatar col-longphort na nGrec. Roinnesetar a scéla &ersir; a n-imthechta. O roscachitar, trá, na huile sea atbert Calcas fría muintir a longa do chor for muir &ersir; for fairge. Dorónsat na slúaigh airisium anísin. Tuctha rempu Ascaláip &ersir; Menelaus comtís éolaig dóib cech ndírech aramus na Trói, ar robátar i longai Íasoin prius.

IS ed dochótar arthúus díaraile insi robói fó mámus Priaim. Toglait in n-insi sin. IARsin, trá, tancatar co hinis Tenédos, dú i mbítís seóit &ersir; máini, ór &ersir; argat Príaim &ersir; na Troianda. Doberat na Gréic a fuaratar and do dáinib fó gin gai &ersir; claidib. Tinolait 'na fúaratar do sétaib &ersir; máinib. IArsin, trá, tancatar rig na nGréc i n-óenbaile co hAgmemnón do chomairle cid dogentaís.

[Dares c. 16.] IS hí comairle dorónsat: techtaire do dul uadib fri haithesc co Priaim do chuinchid Helene &ersir; na braite ronuc Alaxander a hinis Cetherea. Tancatar na techta .i. Diomíd &ersir; Ulix, co Priaim &ersir; atfiadat a n-aithesc dó doléir.

Céin, tra, robás im na fíbsa, rofoided Achíl &ersir; Téleip (.i. filius Ercolis) do indriud Moesiae. Teophras is he bá rí intiside. O'thancatar co Moesiae argait an tír, teclaimmit brait &ersir; cethra an tíre co hóenbale. Tárthetar slúaig &ersir; sochaide in tíre forru im Theophras, 'má ríg. Rofuacair Teophrais comland áinfir forru. Tan atchuala Achil anísin rochuir etach imtecht de &ersir; rogab a chatherriud catha &ersir; comlaind imbi. Rogab éim a lúirig d'iúrn athle[g]tha imbi &ersir; a cathbarr círach cummaide fora chiund. Tanic íarsin fó shlúag na Moesiánda amal leoman londcrechtaig íarna thocrád fo chuilenaib, no amal tarb ndasachtach día tabar drochbéim. Dorat erchor do manáis móir lethanglais for Theophras, co ruc arrinni triit ón táib díaraile, co ros-anaic Telepus mac Ercoil, co tabairt scéith ara scáth intan rofuabair in cathmilidh a dilgend doráith. Fobíth dorat oegedecht aidchi do Thélip &ersir; día athair .i. do Hercoil reime, conid airi rosn-anaic. INtan, tra, rogab Teupras céil for écaib rotimna a flaithemnus Telepo, fóbíth is hé Hercoil dorat ríghe dosum, &ersir; romarb Diomid (sic), &ersir; dorat a forba do Theufras; con[id] airisin dorat Teufras a ríghe do Thelip. Ro- ordnig íarum Achíl Telip hi ríge co tardad cís cruthnechta do Grécaib dia fulang i céin nobetís for in togail. Rocomailled dano amlaidsin, Roan dino Télip hi Moesia &ersir; dochóid co mbrait &ersir; co crud mór cosna Grécaib do insi Tenedos. Adfét a scela &ersir; imtechta o thus co forcend do Agmemnón. Buidech síde dano.

[Dares c. 17.] IMthusa immurro na techtaire .i. Diomid &ersir; Ulix, roinnisetar do Príaim a n-athesca .i. a cor o Grégaib d'íarraid Helene &ersir; na braite archaena, do denum síth &ersir; charatraid etarru co ndecsaitís Gréic for cúlu dia taig. Ni mór, tra, co n-ánic Príaim a fhrecra na mbriatharsa, acht namá atbert dar menmain IN tabaerthi dobur n-óidh, ar sé, a ndorónad frímsa .i. m'athair do marbad, mo chathair do loscud, mo síur do breith i ndóiri. Ni dingénsa, ar Príam, síth fríu. Ní bérat mnái no brait. Rofhúacair dona techtaib dula as tír. Ni [fh]etamar ámh, ol na techta, in cóir in comáirle dogníi. Bid doilig d'óentúaid bic isin domun imguin &ersir; imbúalad fri lucht na Gréce uile cona sochraide. Bid móte, ar Priaim, a blad &ersir; a airdercus dund uathiud dogéna cocad sainemhail frisin morshochraide ísin. Bid olc dit an cocadsa, ol na techta: dofáithais féin and, &ersir; dofaethsat do mic &ersir; do charait. Ní mór fórmsa fein íarum anísin, ar Hechtair. Bid tercbáil anma, &ersir; bid fotha mo chlua darmése. Mairfet sluagu &ersir; sochaide. Betit cind &ersir; chosa &ersir; cholla &ersir; méde &ersir; medoin íarná tescad &ersir; íarná timdibe do deis mo chloideb. Bid lán an Gréc ule do dubu &ersir; do thoirsi, ar dofáethsat mic ar-ríg &ersir; a tóisech &ersir; a n-ócthigern dim' gnímsea. Cinnas dogénasa sin? ol na techt[a]: ar betit láich do samla &ersir; do chomdelba i cind airge frit. Ár bid imda and láech lásmbá laind tíachtain ardochindsa. Ní bá íarraid and laóch bas tualaing th'ergaire &ersir; techt thorut. Ní bá hamlaid bías, ol Hechtoir, biam congancnes ic comrac fri cech fer úadib. Ni chomhraicfet a n-airm frimsa ar faebas na hersclaide. Rothintáiset na techta íartain co hinis Tenedos do longport na nGréc. Roíarfaig Agmemnón scéla dona techtaib, c'indas tíre cosa ndechatar &ersir; cía calmacht na láech, cía trese na múr, cia daingne na cathrach. Cía nobetís émh, ar íat, secht tengtha i cind cech áin acanne, ní fétfaimís aisnís cech neich atchondcammar. Ar rucsat na Tróianda do dáinib domhain uile ar cruth &ersir; deilb &ersir; deichelt. Mairg noda-maindéra, mairg do neuch mairfit, mairg do neoch nos-mairfe &ersir; bas coscrach diib, &ersir; dos-béra frí lár!

[Dares c. 18.] INtan, trá, atchuas in teclomadsa na hEorpa for slúagud dochum na Trói día hindred, dochuas úadib do chuinchid shocraite co a comaithibh &ersir; co hardrígu na hAsía móre, &ersir; tancatar a ríghside &ersir; a tóisigh co slúagaib &ersir; sochaidib do chongnum fri Troiannu.

Dodechaid and íarum Fundatus &ersir; Amfichastus, dá ríg Zeliae. Dodechaid and dano Cárus &ersir; Amfimachus &ersir; Nestius co sluagaib Colofontae. Dodechaid and dano Sarpedón [&ersir;] Clausus co sluag Liciae. Tancatar ann dano Epithogus &ersir; Papessus, dá ríg Laríssae. Tancatar and Rémus á Chizonia. Tancatar and Pirrus &ersir; Alcánus co n-ócaib Tracíae. Dodechatar and dano Astánus &ersir; Antipus &ersir; Porcus co sluagaib móraib a Frigía. Tánic Epistrofeus &ersir; Buetius a Uetino. Tánic and Filomenes co sluag mór a Salaconía. Dodechaid and dano Persis Memnón co sluagaib diarmidib asind Ethióib, cend áthchómhairc &ersir; tóisech na huile Asia. Tánic and Esseus &ersir; Amfimachus co slúag Agrestiae. Dodechaid and Epistropus co mbuidnibh imdaib de Alizonia.

O thancatar na hulese, trá, doróegu Príaim oentóisech imgona forsna huli slóghusu, etir a medon &ersir; dian-echtoir .i. Echtoir. Rosmacht cech fer indegaidh alaile .i. Diofóeb indegaidh Hectoir, Alaxander 'nadegaidh sidhe. Troilus íarsin. Aeneas íarsin, Memnón fodeud. Roerfhúacrad immurro íarsin o Agmemnón for rígraid na nGréc tíachtain do chomairle imá n-aithesc tucsat na techta leo ó Príaim. INtan bátar ocon chomhairle is and tánic Nauplius Palamides (.i. filius Naupli) de Zona ex Corna, fairend .xxx. long. . Ferthar failte mór fris. Robói iarum oc erchoitmiud na tánic fochetóir do phurt na n-Athanensta a[r]robói a tromgalar, &ersir; antan rooéthig fair thánic.

[Dares c. 19.] Dochúaid íarsin isin comhairle &ersir; atbertatar Gréic bá hí in chomhairle chóir, gabháil ind oidchi imman Trói. Ní roléic dano Palamides anísin, acht a soillsi an lái co robristis for Troiándu, &ersir; saighe immon cathraig iarsin, Romol cách an comairle sin. Roordniset iarum hi forciund a comairle Agmemnón do ardríg &ersir; do ardtóissiuch dóib ule. Rofhóidset dano techta &ersir; tóichléori úadib im-Moesiam &ersir; i n-araile tíre olchena.

Rofhúacair Agmemnón forsna rigaib &ersir; for na míledaib &ersir; for in slog ule co cuirtís a longa &ersir; a mbarca for fairge do imram dochum Trói. Ocus rogab ic nertad na curad &ersir; na láth ngaile &ersir; na clíathbernaide cét, co rofhertáis gléo faobrach fuilech férgach fíramnus fri láochu na hAsía áigthide.

Atraracht íarsin in slúag, &ersir; rotaitmigset refeda a long &ersir; forácsadar in n-innsi. Tancatar cech ndíriuch dochum na Trói.

IS beg, trá, ná rocrithnaig in talam o thurgbáil co funed, &ersir; ná dechaidh muir Toirrén dara bruigib dermáraib lásin trén-imram dorónsat fairenn in tríchat ar óen cétaib décc long &ersir; libharnn. Deitbir són dano rind n-imgona fher mbetha &ersir; forglu síl Ádhaim ule, ermór chathmíled fher ndomain in lucht robátar isin choblachsa: fóbíth is and robái in domon im-medon a áese &ersir; a borrfaid, a utmaille &ersir; a díumais, a chath &ersir; a chongal. IS ann robtar trese a fir &ersir; robtar calmai a milid isind amsir i ndechus in slogadsa. IS airisin na rabí cutrumus frisin laechraid-sin úa thustin dúl arái ngaiscid &ersir; engnama, acht ná rabi Ercoil and nammá, láech dorósci cách.

Dala immurro Príaim, rochuir techtaire do fordécsin &ersir; do tháidhbriud na long &ersir; na slóg fadesin, ceped tan donístáis do muir Torrén do phurt na Trói, co mbetis catha erlama aracind do dítin na cathrach.

O rolá iarum in dercaid súil darsin fairgi atchondairc ní n-íngnad: robrecad in muir do longaib &ersir; libarnaib &ersir; lugbarcaib. Atchonnairc in fidbaid fhírádhbail, úasna longaib &ersir; úas cennaib na curad, do séolcrandaib ardaib ergnaib in betha. Atconnairc brechtrad na seol n-illathach di dathaib écsamlaib étaigh cech tíre úas na séolcrandaib. Dochóid íarsin co fis scél do Príaim. Roíarfaig Priáim scéla do. IS ann dixit: Andar-lem ém amal rodercus, ar sé, domárfás tromchéo tiughaide &ersir; glasnél dub dorchaidhe forsind fhairce, co roleth co níulu nime, cona acus nem huasa cind &ersir; coná hacus ler fona longaib, ar rolín dorchatu in cocái ó nem co talmain.

Domárfás íarsin fogur gáeithe gére gailbighe: indarlem noth[r]ascérad fidbada in betha, amal esnad mbrátha. Rochuala breisim thornige móre: andar-lem ba hé in nem dorochair, no in muir rotráigh, no in talam roscáil i n-ilrannaib, no amal nothut[it]ís frosa rétland for dreich an talman. Ali, ced eter sin? ar Priaim. Ni anse, ar in techtaire. In glasnél tiugaide atconnarc úasin ler, it hé anála na curad &ersir; na lath ngaile rolínsat dreich na fairge &ersir; a cobán fil etir nem &ersir; talmain, fobíthin frisrócaib in gal &ersir; fiuchiud na ferge faibraige i n-erbruinnib na láech lánchalma, conid fair roimretar a feirg for imarbáig ind imrama co rolín in n-áer úasa. Fogur na gáithe gairge atchúala, is hí osnadach &ersir; bolcfadach na trénfer sin la scís ind imrama &ersir; la himthnúth cosnama tosaig. IS hí dano in toirrnech rochúala, détglés &ersir; imchomailt fiacla na míledh, &ersir; treschur na rama, &ersir; briscinmnech na sculmaire, &ersir; cutaim na ses, &ersir; breisim na fern síuil, fogur na ngae &ersir; na claideb, &ersir; trostgal na scíath, grinniguth na saiget, golgaire na cathbarr &ersir; na lúirech, la mét ind imrama &ersir; na sesbemend nó-bentáis na mílid forsna ráma icond imram. Atá do chomnairte na lámh imbrit na ráma, co fochroithet na bárca &ersir; na libarna cona-fairnib &ersir; a luchtlaigib, cona sesraib, cona cláraib, cona n-armaib. olc sin, a dhuibh. Cid aill atchonnarc? ol Príaim. Atchonnarc iarsin brechtrad ind étaig illathaig co n-áille cech datha roleth darsin fairgi ule: indar-let bá do phuplib ildathachaib robrecad ind fhairge uile. Ni aca ernail dhatha isin domun ná rabi and, etir glas &ersir; gorm &ersir; dérg &ersir; huaine &ersir; chorcair, etir dub &ersir; fhind &ersir; odhor &ersir; buide, etir brec &ersir; dond &ersir; alad &ersir; rúad. Atchondarc íarsin coméirge in marv i n-aírde fo chosmai- lius slíab n-árd. Atchonnarc cach slíab andiaid araile. ISs ed airdmius lem nolethfadh cech sliab &ersir; cech tonn dib darsna Troianda ule. Roarthraigestair dam iarum braine na mbárc &ersir; na libarn &ersir; corra na long &ersir; cind na míled. Roarthraigestair dam étaige &ersir; timthaige &ersir; brethnasa na ríg &ersir; na tóisech. Atchonnarc idna &ersir; fidbaid &ersir; slegdaire na ngae &ersir; na croisech a brainib &ersir; a corraib na long. Atchonnarc drong &ersir; damdabach na caladsciath, cona timthugu do lannaib óir &ersir; argait inna timchell, íar n-oraib na long immacuáirt. Nobenad lainrech na n-arm mo rosc uaim, &ersir; taithnemh ind óir &ersir; ind argait &ersir; imchumtaigi na claideb &ersir; na calg ndét &ersir; na nglass gai cona muincib &ersir; na sciath cona lannaib &ersir; cona n-imdénmaib di ór &ersir; do argat. A mbrechtrad, tra, ind étaig illathaig, it hé na síuil esredacha robatar huasna longaib &ersir; uasna bárcaib.

IN t-anfod mór tháinic isin fairge co mbátar na tonna amal benda sléibe, it hé tondguir na seisbeimaend nóthinta a corraib &ersir; a brainib na mbárc &ersir; a bóssaib na ráma &ersir; a taóebaib &ersir; a srónaib na long. Bid tnútha[ch] in tecmongsa. Biat imdái mairb. Biat imdai cuirp élnide fó chonaib &ersir; énaib &ersir; fíachaib do chechtar in dá leithe. Bid garb an comhracsa condricfad fir Asía &ersir; Éorpa. Comraicfid anál ind Ethiopácdai frisin Tragecdai, co mbiat cend ar díb cendaib. Bid tnúthach ind imthúarcain dogénat na hailithir, in Persicda a haerthiur in betha &ersir; in Macedónda asa íarthar. Bá dirsan nád bói miltengaid dognéth córai fri Grécu, co tintáis asin mhaigin hi táat.

Tánic in sluag colléicc hi purt na Trói, céin robatarsom for na briathraibsea. Rolínsat in n-airer do longaib &ersir; libarnaib. Rogab chenai [Hechtoir] ind airer fríu co tánic Achíl, dia n-érbrad is totum exercitum euertit. Fóitir in fer cetna do fordécsain &ersir; do chor shula taírsiu, &ersir; dochuáidside &ersir; atchondairc rémend na mbuiden &ersir; na cath, cech cath &ersir; cech slúag immá ríg &ersir; immá tóisech, oc escomlód asa longaib.

Atchúaid íarum do Priaim cruth &ersir; delb &ersir; écosc cach ríg &ersir; cech tóisig, cech óclaig &ersir; cech míled do Grécaib. Esbaid so ar in laebar. . . . ic tafond Alaxander, co tárat Áenías scíath dara ési &ersir; corodíarsinsáer di lámaib Menelai. Dochuaid Alaxander dochum na cathrach post. Nóx praelium dirimit.

[Dares c. 21.] Dollotar trenfhir Eórpa &ersir; na nGréc arnabárach arcind chatha na Troiannae. Huathmar, thra, indas na luinde &ersir; na barainde &ersir; ind nítha tucsat léo isin chath, Achil &ersir; Díomid in-airiniuch catha na n-Gréc; Hechtoir immorro &ersir; Áeneas in n-airinuch catha na Troiannae. IS ed immorro tucsat tóisig na nGréc léo fordinge Hechtoir diafét[at]áis. Acher, trá, in gres roláset. Robúirset cotnúthach isin cathsin damrad rochalma Asía &ersir; Éorpa. Dochótar ann na mílid rotréna darcend cumaing inn-agaid a námat. Grandi na hárdi robátar ann .i. laindrech na claideb &ersir; a n-áeblig oc túarcain na scíath, findnéll na cailce, comtuarcain na claideb &ersir; na ngai &ersir; na saiget frisna lúirechaib &ersir; frisna cathbarraib, briscbruar dano &ersir; beimnech na mbocóti iarná trúast[r]ad dona claidbib &ersir; do[na] brathlecaib bodba &ersir; dona laighnib lethanglasaibh a lámaib na láech lanchalma. Robrecad in t-áer úasa cind do dibraicthib na n-arm n-écsamail. Ro-batar, trá, táesca fola codíarmidi ic snigi a ballaib &ersir; a haltaib &ersir; a hágibh na láoch, co rolín etrigeda &ersir; cobána ind ármaige. Gand combach rofersat in ceth[r]ar rigmíled .i. Achíl &ersir; Díomid, Hechtoir &ersir; Áeneas. Roslaidsetar na slúagu etarru. Robái Achíl &ersir; Díomid oc fortbiu na Troianda a airiniuch catha na nGréc. Robói immurro Hechtoir &ersir; Áeneas oc fortbiu na nGréc a haireniuch chatha na Tróianda. Roimbretar íat for[s]na sluagaib co torchratar ilchéta do cechtar in dá ergal. Bá méte nobeth i scélaib &ersir; airisnibh co lá mbrátha a ndoróni Hechtoir nammá isin lathisea do mórgnímaib.

IS ádbal, trá, fri turim cid an-rotrascair do rigaib &ersir; do thigernaib &ersir; do thrénferaib, cenmóthá a ndorochair día láim do drabarshlúag &ersir; do dáiscardáinib is diármide side. Batir cróda, trá, a gluind, ic dul cohadhuathmar tría thuru a námat co farcaib martlaige dona collaib arbélaib na nGréc. Doróni chró mbodba do chollaib a námat imbi immácuáirt, cor'bó múr rodaingen dó fri hucht na nGréc. Robái Achíl dano don leith aili oc slaide na slúag, ic marbad na mbuiden, co torchratar sochaide móra do sháeraib na Troiannae lais. Romarbsat dano Áeneas &ersir; Diomid ili rochalma do cechtar in dá leith.

IS andsin dorala Arcomenus, rígmilid side do Grécaib, al-loss claidib fri Hechtoir, co torracht a luinde léomain co Hectoir, co tarat bulle do chlaidib dó, co ndernai dá gabait de. Ó'tchonnairc immurro Palamón aní sin .i. Arcomenus do thuitim do gnìmaib Hectoir, doroich cobruthmar bághach indegaid Hectoir. Sóidh Hectoir fris &ersir; beirid rúathar n-adúathmar adócum, co torchair Palamon leis isin magin sin. Dorúacht íartain Pistrópus do chomruc fri Hectoir, co torat erchor do manáis lethanglais for Hectoir, co rochuir Hectoir secha anísin. Rocertaig íarum in gai chucaiseom, co tarla, na scíath, co ndechaid trít fein íar tregtad in scéith ó ichtur co úach[t]ur, co n-erbailt Pistropus desin fochetóir. Dochuaid dano Scedíus arcind Hectoir do chuinchid a erdarcusa. Derb leis ropad lán in domun día anmum día tochrad dó Hectoir do thuitim leis. Tánic immorro Hectoir cohuathmar áigthidi araamus conos-fargaib cen anmain. Tánic Cliofinor do chomrac fris co ngáirside gairm nemnech [nduabais] fair. Fer, ar sé, théte ardochind innosse not-mairbfe &ersir; etarscarfaid t'anmain frit chorp. Bíat fáilid in dithrubhaig &ersir; ethate ind aéuir dit. Frit fein impaifes sin ule, ar Hectoir, la tócbáil in gai bái ina laim, co tabairt forgaba for Cliophinor, co rabi 'na crois triit, co torchair dochum thalman. Reithid Hectoir chucai co ruc a fodb &ersir; a chend leis. Don-ánic fáisin Dorcus. Ní béra cen debaid, ar sé, ind fadbsin. Ní ba hinund duit &ersir; na láich rofhersat gléo frit cos'tráthsa. Bád íarum nomáide, ar Echtoir. Día fis tiagmait, ol se. Cotrecat íarum. Dorochair Dorcus annsin la Hechtoir íarná chrechtnugud coádbhal.

Rofúabair Polixenus íarum comruc fri Hectoir darési in lochta sin, co torchair la Hectoir. Tánic Idumeus fón cuma cétna: ni roscar Hectoir fri side co rós-marb.

Ochtur, trá, do rígaib rothrénaib do ghlangassraid na Gréci romarb Hectoir in láa sin ar galaib óinfher, cenmóthá an-romarb do míledaib calmaib asa hainm docheil clú &ersir; erdarcus. Días rigmíled roth[r]ascair Áeneas mac Anachís ar galaib óenfher isin lathi cétna .i. Amphimáchus &ersir; Nereus a n-anmann, cenmóthá an-romarb do doescarslúag. Tri tóisigh immurro do Troiannaib romarb Achíl in-n[e]urt gaile .i. Seufremus &ersir; Ypotemus &ersir; Astríus. Ropo adúathmar, trá, a delb Achíl in laasin. Cathbarr círach immá chend, día sceindís gái &ersir; chlaidib &ersir; chlochai. Lúirech threbraid trédúalach treinglommach, nos-dítned ó hó co hescait. Claideb mór míleta 'na laim, frisna gabtís lúirecha &ersir; cathbairr, ara géri &ersir; ara áthi &ersir; ara ailtnidecht. Cromscíath caladgér for a chlíu, i tallfad torc trebliadan no lanamain i cosair. Bá lán [immorro] o or co hor de delbaib dracon ndodeilb &ersir; do delbaib bíast &ersir; bledmíl n-ingantach in betha, do ildelbaib torothor[th]aib in talman. Robói dano béos i n-indscribiund in scéith delb nime &ersir; talman &ersir; iffirn, mara &ersir; aeóir &ersir; etheoír, gréne &ersir; ésca &ersir; na rend archena rethit i n-ethéor. Ní raba isin domon catherriud catha no comhraic no comlaind amal in n-erriudsa Achíl. Fóbíth is hé Ulcáin goba Iffirn doróni in n-armgaisced sin Aichíl, íar mbrith a airm féin do Phathrocail reime do chomhrac fri Echtoir, co ros-marb Hectoir ir-riucht Achíl, &ersir; co ros-fodbaig im étach Aichíl, conid íarsin doróni Ulcáin in n-arm nemnechsa do Achíl artí gona Hechtoir.

Bá cróda, thrá, in mesc[ad] dorat Achíl for na slúagaib. Mór ríg, mór rurech, mór rúanaid, mór tríath, mór tigerna, mór trénfher robátar íarná fortbiu isin berna miled ruc Achíl i cath na Troiannae. Romarb dano Díomid sochaide dona slúagaib la díis do rígmíledaib na Troiannae domarbad dó [.i. Nestius &ersir; Nestrisca.]

INtan immorro atchonnairc Agmemnón ríg na nGréc &ersir; tóisigh imda día muintir do marbad &ersir; ár a shlúaig do chor, roherfhuácradh día muintir tiach[t]ain for cúla &ersir; scor na hergaile. Doníther ón dano. Lotar na Troiannai día cathraig co mbúaid &ersir; choscor. IMthusa immorro Agmemnóin, rotóchuiret chuci sidé rig &ersir; airigh na nGréc, &ersir; rogab ocá nertad co nábtís tercmenmnaig cía dorochratar sochaide úadib; ar donicfaitís slóig &ersir; sochaide móra aran-ammus a Moysia isinlau íarnábárach. [Dares c. 22.] ÍARnabárach immorro tic Agmemnón co nGrécaib co mbátar for láthir na debtha, &ersir; rogab ic nertad na láech &ersir; na ríg co tístáis cona n-uilib míledaib &ersir; óclách[aib] dochum in chatha in laa sin.

Lotar na Troiannai don leith aile. Ferthar cath fergach and di cech aird. Mór, trá, buáine in cathaigthi fri ré. lxxx. laa, cen tairisimh, cen úarad, cen óithigud, acht cách oc túarcain a chéli díb. Dorochratar, thra, ilmíli do laéchraid Assiae &ersir; Éorpa isin chathugud sin. Cencobeth d'esbaid for in tshlúag cechtarda acht an-romarbadh frisin ré sin, ba mór esbaid. Mad a ndoróni Hechtair frisin ré sin do deggaisciud bá lóor d'airscélaib do feraib in betha día festa colléir.

a ndoróni Hechtair frisin ré sin do deggaisciud bá lóor d'airscélaib do feraib in betha día festa colléir.

Amal atchonnairc immorro Agmemnón ilmíli do thuitim día muintir cech lái, &ersir; o'tchonnairc in fordingi móir dorat Hectoir forru, &ersir; amal atchonnairc na maige lána dona collaib &ersir; dona hapaigib &ersir; dona cnámhaib, co nábo inimthechta in magh mór ótha múru na Trói corici scuru na nGréc, la himbed na coland &ersir; lá slaimred na fola. Mád ind Assia bec immorro nir'bó inatrebtha ule óthá tairr mara Point atuáid corici Eifis fades, la drochthuth na fola &ersir; na coland ic lobad &ersir; la dethaig na n-apaige 'cá loscud isna híltentib, co rogaib ág &ersir; accais &ersir; aingces in tir uile de, co rocuired an ár do doinibh &ersir; cethraib &ersir; biastaib [&ersir; énaib]. Amal atchonnairc íarum Agmemnón na huile sea, rofóidi dá tóisech dia muinntir fri techtairecht co Troiannu .i. Ulíx &ersir; Díomid, do chuinchid ossaid teóra mbliadan. Tan, trá, dochúatar na techta isin chathraig rochomraicset fri hócu do Throiannaib. Roiarfaigsetside scéla dóib. Atbertatar na techta fri aithesc ossaid, ar íat, dodechamar co Priaim. Ó rancatar iarum co rígpheláit Príaim, atfíadat a scéla .i. a tíachtain do chuinchid osaid ó Grécaib, fri cóiniud a coem &ersir; a carat &ersir; fri hádnacul a marb, fri híc a n-othrach, fri daingnigud a long, fri tercomrac a slúag, fri lessugud na longphort. O ro- chúala Príaim íarum in athesc hísin rotóchuiret dia insaighid a slóigh &ersir; a sochaide, &ersir; roinnis dóib aní frisi-tancatar techta na nGréc .i. do chuinchid osaid téora mbliadan. Nírbó maith immorro la Hectoir in t-ossad do thabairt. Tamen dorat a himpide ríg na Tróianda, ar robo maith leosíde daingnigud na múr, ádhnacul a carat.

Roleth, tra, clu &ersir; erdercus Hectoir mic Priaim sechnón na huile Assia &ersir; na huile Éorpa. Ba cocur cecha deisse etir primcathracha in domain. Óenchathmílidh co n-úath, con-erud, co luinde leoman, co crúas choradh, co mbuille míled, co n-ainbthinche onchon, oc cathugud &ersir; oc comérge &ersir; oc comersclaig[i], co n-uathiud a c[h]athrach fri láechu athlama ána íarthair in betha. IS amlaid so immorro nóinnistea in scél sin.

Atá fer mór úathmar ic cathugud icon Trói: romarb trían na slóg a áenur, &ersir; roth[r]ascair na trénmíledu, &ersir; roling darna laechu, &ersir; rochroith na hergala: rochursach na curada' roding na rígu, roloisc na longa. Dorochratar al-laith ghaile &ersir; a clíath- bernaide chét &ersir; a n-arsídhe urgaile &ersir; a n-onchoin échtacha oc cathugud fris. Rolín na maige do chollaib arbélaib na Trói. Robói dano óengáir guil &ersir; éighme for fut na Gréce tría ágh ind fir chétna, ar dorochratar a mic &ersir; a n-ue &ersir; a ndaltae tré ag láma Hechtoir. Mád insi mara Toirrén is mór in gair gubai robái inntib. Robái gol cecha cléithe léo óthá trethan rinde Pilóir co Pucén &ersir; Bosfoir. Batir áildi na hingena macdacht[a] nobítís ic ámrán &ersir; ic dúchund, nógebed do leith dóib dano imrádud anma Hectoir mále fría cáomaib &ersir; chairtib dorochratar día láim seom. IS sí a mét, trá, roraith clú &ersir; erdarcus Hectoir etir prímranna in domain co ros-carsatar banchuiri &ersir; bandála &ersir; ócmná rebecha in domain ara herscélaib, co tocraitís asa tíribh do décsain &ersir; do tháidbriud crotha Hectoir mani gabtáis na mórchoicthi díib. Mad immorro mic rig &ersir; ócthigern na Gréci dochótar corici Thrói óentoisc do décain Hectoir condringitís for foradhaib &ersir; for lesaib do décain Hectoir dar formnu na fer. INtan nóbíth fo lántrela[m] gaiscid &ersir; chongrami ní [fh]etatar na Gréic cidh dogéntáis ar uaman Hectoir. Ni fetatar cindas noregadáis ara marbad. Ni raibe do dóinib domain ceped febas a n-engnama &ersir; a n[d]ibricthe lucht conístáis ermaisi Hectoir ar febas na hersclaige &ersir; na himdíten. Nocor-[fh]etsatar éim Gréic triasna .uii. mbliadna techt airi .i. ó asgaid iar, ce dóróscaigset side do dáinib domhain, ar ecna &ersir; ar éolas, ar gáis &ersir; gaisced.

[Dares c. 23.] Táníc iarum cend in mithisi. Dolluid Hectoir &ersir; Troil ría sluagud na Troianna arcind na nGréc. Roferad gléo fercach feochair fáebrach leo isind ármaigh. Rofuabair Hectoir cath na nGréc co torchair leis Pilippus isin cétna ergail. Dorat cummasc forru [uili] &ersir; marbais ilmíli diib. Dorochair leis dano Antipus, toisech síde ámra do Grecaib. Tánic dano Achíl a le[i]th na nGréc, &ersir; dorat athcuma forsna Troiannu, co torchratar ilchéta díib lais. Romarb dano dá ánrad &ersir; dá ardfhen[n]idh na Troiannae .i. Licónius &ersir; Eofronius. Ni rabi, trá, cumsanad for in cathugud cech n-óen lái co cend .xxx. laithe. Robói, trá, lechtlaige &ersir; carnail mór do chollaib dóine eter in cathraig &ersir; na scuru frisin résin.

INtan íarum atchonnairc Príaim slógu díármide do thuitim día muintir lásin fortallín tánic asin Gréic &ersir; asin Moysía, dochúas úad do íarraidh osaid [co cend] shé mís. Dorat dano Agmemnon anísin a comairle maithe na nGréc.

Tánic aimser in chatha. Ferthar cuimleng cróda and dishiu &ersir; anall. Dorochratar iltóisigh rothréna di cechtar na dá shlóg: rocrechtnaigthe sóchaide. Rob imda ilach im chend curad and. Ní roanadh and, tra, icon cathugud frí ré dá lá ndéc.

IARsin, trá, dochúas ó Agmemnón do chuinchid mithisi .xxx. laa. Dorat Priaim anísin a comairle na Troiannae &ersir; a comairle Hechtoir mic Príaim.

[Dares c. 24.] INtan dano thánic aimser in chatha and, dorala do Andromacha, do mnái Hectoir, aslinge dúaigh dúabais do ascain imdála a fir. Robo hé in t-aslinge. Delb mór robói do Hectoir isin stuagdorus robo leis don chathraig, a delb som fadesin and dano, &ersir; delb a eich fói. Atchonnairc íarum Andromach a cend do thuitim don deilbsin. Rochuir a socht aní Andromach íar n-éirge asa súan, adfét do Hectoir in n-aslinge, &ersir; rogab ocá thairmesc imbi thecht isin cath [in la-sin]. Ó'tchuala Hectoir anísin asbert nar'bó degcomairle, &ersir; rogab ic cursachad a mná cogér [&ersir; isbert]: ní thibersa etir mo gaisced no m'engnum, ar sé, ar comairle mná.

Tan íarum rogab Hectoir a catheirriud catha imbi &ersir; ro- fhúabair techt dochum na hergaile, is and [sin] dorat Andromacha a tríi fáidi úas áird, co ragaib gráin &ersir; ecla lucht na Trói [uile] di shein; &ersir; tánic rempi co Príaim, &ersir; roinnis dó side a haslinge, &ersir; atbert fris ara n-astád Hectoir in laa sin cen dul isin chath. IS annsin, trá, tucad a mac bec arbélaib in cathmíled conid ed rodn-ast. O rofastad iarum Hectoir rofhúabair Priaim for slúaghaib na cathrach co tistáis cogúr dochum in catha. Donither ón.

IMthúsa immorro Agmemnoin &ersir; Achíl &ersir; Diómid &ersir; Áiaic Locreta: o'tchonncatar cen Hechtair do thíachtain isin chath dorónsat nephní dona slúagaib. Rodechrad impu ic slaide na slúagh, &ersir; ní thallsat a lámha diib coros-timairgsetar isin chathraig for a cúla &ersir; coros-iadsat forru.

INtan trá atchuala in béist lánámhnas &ersir; in tendál thaibsenach día rolas airthiur in betha .i. Hechtoir, séiselbe romóir na nGréc &ersir; in gabud mór ir-rabatar na Tróiannai, berid báre mbruthmar mbéoda dochum na debtha, co torchratar sochaide do láechaib na nGréc leis. Dorochair ém leis Idumius isin cétna erga[i]l. Romarb dano Piclum láechmílid do Grécaib. Marbais Leuntium béus don ruáthar cétnai. Rogon dano Stenelaum 'na shlíasait. Rogab, thra, fón slúagh fón innas[s]in cor' imbir a búrach forru amal dam ndamgaire. Ní roan, trá, Hectoir diib fón inna[s]sin corbó lán do chollaib &ersir; do chennaib on beind díaraile don c[h]ath. IMthá samlaid connach lía punnand chorcai i fogomor déis mórmethle, no bomand ega fó chosaib grega rigraide i n áth etir díb cocríchaib, andáit cind &ersir; chossa &ersir; cholla &ersir; medóin íarná timdíbe d'fáibur a chlaidib do rinn gái &ersir; íarna tescad dona claidbínib &ersir; dona gáib robatar for innell asa lúrigh feisin &ersir; a lúirechaib a echraide.

INtan, trá, atchonnairc Achíl rind n-imgona na Gréci uile do thuitim la Hectoir &ersir; in chummasc dorát Hectoir forsna slúagaib, imroráid 'ná ménmain cindas nofhúaberad marbhad Hectoir, ár ní raibe ic Grécaib láech a dingbala acht Achíles a óenúr. Derb leis mani thóithsad Hectoir coluath ni thernábad nech úad dona nói rígaib cethrachat dodechatar Gréic in sluagadsa, &ersir; dobérad scandir for in slúagh archena conná ternáifed béo díb úad. Céin dano robái Achíl icond imrádudsa is andsin dorat cathmílid calma do Grécaib (.i. Polibetes) sciath fri scíath do Hectoir. Nírbo fhota rofulaing do Hectoir co torchair lais. Rochuir i socht na Grécu, a thrice romarbad in laech 'na fiad- naise. IS and sin rofuabretar na Gréic comairle mbrécaig n-intledaig íarna chúl, intan ná rofétsat ní dó araagaid ar thairisem &ndot;gaiscid. Rob í in chomairle: roláset a n-étaige diib &ersir; dorónsat dumai dib arambélaib, &ersir; rosuidiged Achíl co ngai 'na láim im-medon in dumai. Rointamlaigset teched iarum. Roraith in cathmílid .i. Hectoir, innandaeghaid, &ersir; rogab ic airliuch &ersir; ic athchumai na míled &ersir; ic slaide ind áir, &ersir; rogab for fodbugud Idumíí íarná marbad. Tic Achíl chuci fóisin. INtan atchonncatar in tslóigh anísin roláset óengáir estib, etir Grécu &ersir; Troiannu &ersir; lucht na cathrach armedón, acht ba co n-innithim écsamail. Rob í innithim na Troianna iarum, do fhúacra na ceilge do Hectoir. Innithim immorro na nGréc gáir fói na clósed, IS andsin robidg Hectoir &ersir; rothintái fri hAchíl, &ersir; dorat forgab do gai fair co tarla 'na shlíasait, &ersir; rothindscan techt i n-ucht a muintere feisin. Rolen de in caur húathmar as tresam robói i n-íarthur in betha .i. Achíl, o roling gal &ersir; bruth &ersir; ferg indálta ind, co tarat buille do gái mór robái 'na láim 'na druim co robris chnáim a dromma, ríasíu thísad i n-ucht a muintere. Donarthetar slúaigh na nGréc, co roíadsat imbi. Rofóid, thra, Hectoir a spirut fon innassin. Rochuirset Gréic gáir choscair &ersir; commaidme fo chend Hectoir prímhgaiscedaig in talman.

O roforb, thrá, Achíl in ngnímsa, roding na Troiandu remi dochum a chathrach &ersir; focheird a n-ár corici na doirse. Áráide dorat Memnón dub déchomrac dhó, &ersir; tarrasair fri[s], cíarbó chomlond dolig, conid hi ind adhaigh roetarscar a comlond. Tintáid Achíl, íar forba in lái, fuilech, créchtach, crólinnech, día scoraib iar mbuaid &ersir; choscor.

TRóg, trá, in golmairc &ersir; in núalguba robái isin Trói ind n-aidchisin. Robái mór mbróin &ersir; dubai &ersir; toirse &ersir; lamchomart inti, fóbíth testa úadib a ndegthóisech engnama &ersir; a cnú cridhi &ersir; dos a ndíten &ersir; a cliathchomlai chatha &ersir; a scíath imdhegla &ersir; a saph cocrichi fria naimte. Ba cathir cen immi a cathair día éis. Ba costud im ríg costud imbi. Ba coméirghe im chóraid coméirge imbi. Doróscaigi do láechradaib domain uile ar ánius &ersir; ar athlaimi, ar gáis &ersir; ar gaisced, ar ordan &ersir; ar imbad. Ba éolach in-cech eladain. Doróscaigi do láthaib gaile in betha oc imbert gai &ersir; chlaidib. Roderscaig dano d'feraib in talman ic brissiud catha &ersir; chomlaind. Doróisci dano ar áni &ersir; ar athlaimi, ar lúas &ersir; leimnige, di ócaib in talman. Roaccainset cid sochaide móra dona Grécaib ara airscélaib. Roaccainset immorro comór na maccoemi &ersir; in t-aes ócc óetedhach thancatar a crichaib comaithchib día déc[h]ain.

Mor immorro ind[fh]áelte robái i ndúnadh na nGréc in n-aithchisin, cona tuilset in Gréic in n-áidchisin a slanchotlud. Rochuirset a n-imecla dhíb. Rodhíghailsetar a n-osnada. Roláset a scís díib iar t[r]ascrad in mórmíled rothairbir a n-ánradu, ro[fh]ording a láechu.

[Dares c. 25.] Céin, trá, robói Memnón arnabárach oc tinól in chatha do Grécaib, rofhóid Aigmemnón techt[a] co Príaim do chuinchid ossaid co caenn dá mís fri hadhnacul a marb, fri othur a créchtnaigthe. IAR comarlécud do Priaimh in mithisi rohadnacht leis Hectoir fíad doírsib na cathrach, &ersir; dorónta cluiche chointe dó amal robái i smachtaib &ersir; besaib na Troiandae.

Céin robátar na hossoda robái Palamides oc accáini comór do ríge oc Agmemnón. INtan dino rochúala Agmemnón anísin atrubairt nóscérad fría ríge díamad maith ri cách. Arabárach lai íarum congairther in popul do imacallaim. IS and asbert Agmemnón nírbó santach immon ríge: fói leis cía nobeth inti: fói leis cenco beith. Léor leis namá co nderntá enech na Tróianda. INtan, trá, robái Palámid oc máidem asa ecna &ersir; asa éolus, asa gaisced &ersir; asa fhlaithemnas, roordnigset na Gréic íarsin do ardríg forru uile. Rogab iartain Palámid in rige, &ersir; roatlaigestar buidi do Grécaib. Rop olc immorro la Achíl clóechlódh ríge do dénamh dóibh.

[Dares c. 26.] Rogab immorro Palámid for daingnigud na scor, for métgud na murchlodh. Rogreis dano na míledu co tístáis cogúr do chathugud fri Troiandu &ersir; fri Diophoeb mac Príaim. Condrecat, trá, na Troiandai &ersir; na Gréic for láthir debtha arnabárach. IS andsin, trá, robris Sarpedon Licius (Troiandae) for Grécu, &ersir; rolá ár mór forru. Feraid Telepolemus Rodius (Gréc) comrac feochair fri Sarpedón (Troiandae). O't- chonnairc dino Feres mac Admeist, rígthóisech do Grécaib, Telepolémus do thuitim la Sarpedon, tic cofercach &ersir; co feramail adochum co mbátar sist fota ic imthúarcain. Dofuit [dano] Feres (Gréc) íar créchtaib imdaib la Sarpedón. Rothaithchuir dino Sarpedón fuilech créchtach día thig.

Céin, trá, robátar oc cathugud dorochratar iltóisigh do chechtar in dá lethe, acht is lía dorochair do Tróiandaib, do trénfheraib &ersir; churadaib. Tan iarum robo trom for Troiannaib dochúas uadib do chuinchid mithisi. Céin, trá, robatar na osada roadnaicset a marbu, rohothratar a n-athgóite.

Ba hinill dano do Troiandaib imthecht i scoraib na nGréc céin nóbítis na hossada ar cóir, [&ersir;] ba hinill do Grécaib techt isin Trói.

IS andsin rotóchuired Agmemnon &ersir; Demepons i tech n-imacallma co Palamid, co rig na nGréc, co ndechsaitís in Moysiam do thabhairt chís chruthnecht[a] ó Thelip mac Ercoil, ó rechtaire Moysiae. IS dóigh chena, ol Palámid, bid emeilt la hAgmemnón iar mbeith ir-rígi a fhóidhiud fri techtairecht. Ní ba hemi[l]t immorro, ol Agmemnón, lem techt lat fhorchongrasa.

IMthusa immorro Palamid, rodaingnigh na scuru &ersir; doróni thuru roarda immacúaird, 'na timchaell. Machtad immorro lásna Tróianda, cidh fótera do Grécaib, frecor céill na scor &ersir; athnugud na múr &ersir; tórmach na rath &ersir; na fál &ersir; fúr cech réta. [Dares c. 27.] INtan, trá, robo lán a bliadan Hectoir i n-adnacul, dollotar asa cathraig sechtair .i. Andromacha a ben Hectoir &ersir; Pría[i]m mac Lamedoin &ersir; Écuba ben Priaim &ersir; Poliuxína ingen Priaim &ersir; Alaxander mac Priaim &ersir; Troil mac Príaim &ersir; Diophoeb mac Priaim &ersir; slóigh &ersir; sochaide málle fríu, do dénum chluiche chainte do Hectoir. IS andsin dorala Achil i ndorus na cathrac[h] aracind. Amal atchonnaircside fochétóir in mnái rochóem .i. inní Poliuxína, dorat grádh &ersir; seirc &ersir; inmaini di. Rothinscan bith indes cen cathugud oc fritháilim ernadma na mná dó.

Ba trom dano leis Agmemnón do chor asa ríge &ersir; Palámid do rígad, fobíth ní rabe ní na dénad Agmemnón airiseom.

Fóidis íarum Achíl techtaire .i. seruus troianus, do acallaim Ecuba .i. co tuctha dó Poliuxína, &ersir; nóregad dochum a thíre cona Mirmedondaib málle fris, &ersir; atbert día ndechsadsom noregad cech rígh &ersir; cech tóisech di Grécaib ule día thig. Atrubairt Ecuba robo maith lea anísin dia mbad máith la Príaim. Rofhíarfaig se do Priaim in bá maith leis. Ní chumangar anísin, ol Priaim, acht chæna ni comad olc d'íarmairt, ár cía nódíghedsom cona Mirmedónaib día thigh ní regtáis tóisigh na nGréc olchæna. Bá holc leis dano a inghen do thabhairt do óegid anachnidh nóregad dochum a chríche &ersir; a fherainn fóchétóir. IS annsin rofóidh Achíl in mog cétna día íarfaighid do Écuba cidh chomhairle doróne &ersir; Príaim. Adfét Écub[a] dó comairle Príaim.

IN tan íarum roinnis in techtaire do Achíl a scéla &ersir; a imthecht[a], robái oc gerán &ersir; ic accaini móir sechnón in dúnaid co n-érbairt: Mór in burba, ol sé donither sund .i. cathmílid chalma &ersir; curaid chróda na hAisía &ersir; na hEórpa do chomthinól co mbátar oc slaide &ersir; oc míairlech a chéile tria fhochund óenmná. Trom leis dano clanda na rígh &ersir; na tóisech &ersir; na n-octhigern do díbudh &ersir; do erchru triasi[n] fothasin,&ersir; athigh &ersir; doeraicme do móradh díanéis. Ba ferr síth &ersir; cararad &ersir; cháinchomrac [do beith] ann, &ersir; cách do dola día thír feisin.

[Dares c. 28.] IArsindí, tra, roscachetar na ossadha. Tánic Palámid cona shluagaib &ersir; cona shochaide sechtair na scoraib co mbátir for láthur dæbtha. Tancatar immorro na Troiandai don leith aile im Diofoeb mac Príaim. Ni thánic immorro Achíl in lasin isin cath ar fheírg &ersir; luinde. Móite dano bruth &ersir; anbthine Palámid di sein. Roben berna cét isin c[h]ath co riacht dú i mbái Diofóeb mac Priaim, co roben a chend dar sciath de.

Atreacht íarsin comrac rothrén roamnas and. Ba fe ille &ersir; innund in comracsin. Dorochratar ilmíle do chechtar in dá lethe, co mbó forderg in talam fo cossaib la slaimred na fola. IS annsin, tra, tháinic Sarpedón Licius com-mórbruth &ersir; com-mórfheirg do chathugud fri Palámid. Ros-fritháil Palámid co torchair leis Sarpedon Licius. O doróni, tra, Palámid na gnima sa, robái cofáilid arbélaib na hurgaile. Intan, trá, robái 'cá maidhem dá rígchathmilid na Troiandai do thuitim da laim, rothrochlastair Alaxander a fhidboc &ersir; rolá [for] Palamíd erchor do saegit co ndechaid ind. O'tchonncatar na Troiandai aní- sin focherdat ule a ngai fair co nderna criathar focha de. Dorochair Palámid [i]sin maigin sin. IAr tuitim dino rig na nGrec doratad tafond forru corici na scuru co ndechatar 'na medon for techedh. IAdait na Tróiandai imon ndún do t[h]oghail na scor, &ersir; loiscit na longa. INdistir do Achil innísin. Ni fír sin, ar Achil, brissid forsin righ nua &ersir; a thuitim lá naimtib! fochuitbiud leossun in nísin. Rogab, tra, Aiac mac Telamoin dareisi in t[sh]luaigh &ersir; dorat cathughud cruaid do Troiandaib, conid hi in adaig roetarscar a cathughud. Co ndechaid cach dib dia daingin la dead lai. Rochóinset, trá, na Gréic inní Palámid in n-aidchisin .i. ar fhæbas a chrotha &ersir; a dénma &ersir; a dælba, ar mét a ecna &ersir; a éolais &ersir; a fhessa, ar met a gharta &ersir; a gníma &ersir; a gaiscid. Roaccáinset dano na Troiandai Sarpedón &ersir; Diofóeb a rígthoisig &ersir; a primchathmílid.

[Dares c. 29.] Rothinólastar, trá, Nestoir na rígu &ersir; na tóisechu i n-oendáil in n-naidchi sin do chomairli co rogaibtís óen rig forru, &ersir; issed ronert íarum co mbadh Agmemnón intshainrudh nogabhtáis, fóbíth robái mórshónmighe &ersir; sochonáich don tslúagh ann céin robo rí doib Agmemnón.

ISin matain árnábárach iarum dollotar na Troiandai don chath. Is bec na rodásedh &ersir; ná rodechrad impu, &ersir; rochrothset in talmain lá mét in lúthbása &ersir; la fichiudh na férgi rucsat na láe[i]ch leo isin cath. Dolluidh dano Agmemnón don leith aile co cath na nGréc imbi. Bá cróda, thrá, in cath rofherset na mílidh. Robái ancridhe ic cách díb díaraile. Rosantaigset todáil na fola cen imneghad. Ba róen ille &ersir; innund in comracsin.

INtan, tra, donn-ánic medhónlái doroacht Troilus arammus na herghaile, &ersir; ruc báre nachar 'nágthidhe sech ánradu na Troiandae, cor-raibi etarru &ersir; a naimte, co ragaib oc fortbe na curad, oc brecad na mbudhen, oc slaidhe na slógh, a ucht a chatha fadheisin. Ocus dorat torannglés forru, &ersir; ros-timmairg remi dochum na scor, amal timairces séigh mintu. Ocus ní roan diib co torchratar ilmíli díib leis ríasíu nóíadaitís dóirsi na scor díanéis. IS do díármidib, trá, in sceoilsi ana torchratar do láechaib na Gréci sund do garbchluchi Throil.

ARnabárach immorro, im-mocha lái, tancatar Troiandai asa cathraig sechtair don chath. Tic dano Agmemnón don leith aili, co láechraid na nGréc imbi. Ferthar gléo fuilech, fergach, níthach, neimhnech, nualghubach ann di cech in dá irgal. Ro-laadh, tra, ár dermar di cechtar in dá leithe. Robriste and láith gaile Éorpa &ersir; Assiae. Conácbad and cath cródha cumnart créchtnaighthech and. Roptar imdha srotha fola dar cnesaib m[o]ethóclách ic techt i ngábudh darcend cumaing. Robo imda laech 'na ligu iarna lúathletrad &ersir; íarna lúathtimdíbé do bágaid bidbad. Robo imda scíath íarna dlugha ó or co hur. Robo imda claideb íarna chathim corici a dornchur 'conn-imbualad. Robo imda gái &ersir; foga íarna [m]brisiud sechnón na láthrech. Robtar imda fadba cen oógud. Robtar lána, thrá, glenda &ersir; állta &ersir; inbera ind ármaighe in laasin dona srothaib fola robátar ann oc snighe a corpaib láech lánchalma. Cen co turmide, trá, do gnimaib ind lathise acht cech a torchair do láim Troil ósair chlainne Príaim — sinsir immorro fer ndomhain o turcbáil co funed arai n-enigh &ersir; engnama &ersir; gaiscid — cen co turmidhe dino acht sin, ba léor do scélaibh gaiscid &ersir; d'esbaidh día naimtib. Ar cen co fagbaitís Gréic doimniudh in tslúaghaidhsin acht cech a torchair dia tóisechaib trenaib in laa-sin la Troil, ba mór dh'ulc, cenmóthá, a forlaig din tslúagh olchena: is lía turim són.

IArsin, trá, robátar oc cathugud cech áen lái co cenn sechtmaine. Docuas ó Agmemnón do chuinchid mithisi co cend dá mís. Roadhnacht, tra, cách a charait &ersir; a choem &ersir; a chocéle. Dorónsát [dano] Gréic im Agmemnón cluiche chainte cohergna &ersir; cohonórach do Palámid día ríg.

[Dares c. 30.] Céin, thrá, robátar na mithisi, rofóidi Agmemnón techta do thóchuiriud Achíl isin chath. Batir hé na techta hísin .i. Ulix &ersir; Nestoir &ersir; Diomíd. Ní roétad étir o Achíl aní-sin, fobíth aneich dorairngert Écuba dó, ar rop hé mét seirce Poliúxina leis conárb, áil dó etir cathugud fri Troiandu. Ro-fhergaig immorro comór frisna techta ar thiachtain etir adóchum. Et dixit fríu Rop fherr síth &ersir; caratradh &ersir; cáinchomrac do dénum etir na dá thír indás eisidh &ersir; escaratradh &ersir; láich na dá tíre do thuitim.

INtan atcúas do Agmemnón tennopad in chathaigthe do Achíl rotóchuirit dó ind uile thóisigh archena do comairle cidh dogéntáis, in badh hé an ní atrubair[t] Achíl .i. síth &ersir; caratrad, no inbad chocad &ersir; debech amal rothinscansatar. Roíarfaig dóib isin dáil ced rothogh menma cech áin uadib. IS and sin, thrá, roattaig Menelaus a bráthair co mbad comnertad na miledh don chathugud doneth &ersir; na bad déirge na Trói. Atrubairt dano náchar fhécen úath na herud don chathraig, ar ní raibe láech mar Hectoir 'cá dítin annsin amal robái reime.

IS andsin asbert Ulix &ersir; Diómid narbad treisse Hectoir indás Troil i ngnimaib gaiscid &ersir; engnama. Ní d'opa[d] chena in cathaigthe atberam sin, ar íat. IS ann asbert Calchas fríu, a fástine Apaill, arna deirgitís ferand na Trói, ar rop fhocsi acách dóib tuitim na Trói.

[Dares c. 31.] O thánic, trá, cend in mithisi dolluidh Agmemnón &ersir; Menel[a]us &ersir; Diómid, Ulix &ersir; Áiaic dochum in chatha. Dollotar dano na Troiandai don leith aile im Throil im Áeneas, im Helin, &ersir;c. Rofhúachtnaighsetar na dá ergail cotrén &ersir; cotnúthach. IMthusa immorro Throil, tánic reme co cath na nGréc. Rofúabair gleo n-amhnas n-agthidhe d'ferthain forsna slúagu. Roathchummai Menelaum isin chétna ergail. Dorat íartain tafhonn ndermáir forsna slúaghu co rangatar na scuru. ÍSind lathi árnabárach dolluidh Troilus &ersir; Alaxander ría slúag na Troiandae. Tic immorro Agmemnón &ersir; Diómid &ersir; Ulix &ersir; Nestoir &ersir; Áiáx mac Telamoin &ersir; Menelaus ria cathaib na nGréc. ISin fhechtain íarum má rofhácaibhset nech isnaib scoraib acht Achíl cona muintir &ersir; cona slúag. Achar, thrá, indas na hesorgne rofersat díblínaib. Ní rodomair nech ann cert díaraile. Rodechradh ann im Throil &ersir; noberedh báre cósna Grécu, co mbiid im-medhón in tslúaigh. Noléicthe láthir láich dó for lár in chatha co mbid rót n-urchura úad cen nech día naimtib fair. Nirbo lenbháidhi in t-amus dó ferann claidib &ersir; búali bodba &ersir; cathmúr do chollaib do dénum imbi 'mácúairt im-medon a námhat, co mbá híat a namait nobítís eturru &ersir; a muintir fadheisin. IS annsin rofúabair drong na míledh co rubái Diómid etarru &ersir; dorat tafhonn forro. Rofuabair íartain drong na rigraidhe co n-Agmemnón: dorat breisim forru co romarb ríg etarru. Dásthir imbi íarum, &ersir; rodn-imbeir forru amal fóelaid etir cháircha, coros-timairc remi corici na scura. Robátar, thrá, fon innus sin i cathugud fri ré .xxx. laa. Mor trichat, mór cethrachat, mór cóicat, mór cét, mor míle dorocratar díb frisin ré sin.

INtan dino atchonnairc Agmemnón in slúag romór do thuit[im] día muintir, &ersir; ní raibi do shlúagh ádhbur cathaighthe fri Troiandu íar ndíth a muintire, dochúas úad do chuinchid ossaid for Príaim co cend shé mís. Rothóchuirthe, thrá, co Priaim a huile thóisigh, &ersir; roinnis dóib tíachtain ó Grécaib do chuinchidh ossaid lethbliadne. Ní roétadh immorro o Throiandaib &ersir; o Throil anísin co héscaid, acht aráidhe doratsat a himpidhe Príaim. Tancatar íarsin a techta na nGréc dochum na scor. Íar tabairt ind ossaid roadnacht cách a charait &ersir; a chocéle, &ersir; ro othroit dano in lucht athgóite la hAgmemnón .i. Diómid &ersir; Menelaus. Dorónsat dano in Troiandai a cétna .i. roadnaicset a marbhu, rolegesaighset a créchtnaigthiu.

Bái comhairli íarum lasna rígaib Grécdaib dús cindus do-bérdís for Achíl techt isin chath, fóbíth ní fríth léo láech tairismhe Troil acht eiseom; co roaslaighset for Agmemónn feisin techt do thóchuiriudh Achíl. IS annsin, trá, roattaigh Achíl inní Agmemnón connábád cocad doneth, acht commad síth: ar is ferr síth sochocad. Mad cathugud immorro dognéthí cuirfitsa mo muintir do chongnum frib, arná digese fo uile éra. Téit Agmemnón día thig budhech forfáilid.

[Dares c. 32.] O thánic, thrá, aimser an catha rochoraigset Troiandai a slógh. Roecratar dano Gréic a cath don leith aile. IS annsin roghab Achíl for gresacht na Mirmedonda colléir, &ersir; ros-faide 'na snadmaimm chatha do chathugud fri Troiandu &ersir; fri Troil, &ersir; atrubairt fríu dano ara tuctáis cend Troil dósum léo. Ásaidh comrac úathmar anachnidh etir dá n-indna na cath. Rodásed imna Mirmedóndaib; is bec na romid an talam fo cosssib la fichud na feirge bái 'na mbruinnib. Ba méte léo ná fagebtáis a ndoithin debtha &ersir; urgaile co forcenn mbetha. Ba méite léo cech beim dobertáis nothascertáis na firu co talmain. Ba méte dano léo nothaféntais na Troiándu corice a cathraig. Ba méite dano béus leo nóráinfidís &ersir; nobrufitís múru na Trói. Manbad nert na fer doralatar fr[i]ú aráidhe ní fáilsaitís mani chobhrad Troil.

INTan dino atchonnairc Troil in dechradh romór &ersir; in luthbás &ersir; in búrach rofersat na Mirm[id]ónda, &ersir; antan rotheilcset a ngái fair feisin, ros-lín bruth &ersir; ferg, &ersir; atraracht an lon láich asa éton combó comfhota frisin sróin, &ersir; dodechatar a dí shúil asa chind combat sith[ith]ir artemh fria chenn anechtair. Ropo cumma a fholt &ersir; cróebred sciád. Rofhóbair an cruthsin na slógu, amal léoman léir lán luind letarthaigh reithes do thruchu torcraide. Romharb, thrá, trí cóicthu láth ngaile do Grécaib &ersir; Mirmedóndaib lásin cétrúathar míled ron-úc aranammus. Ataig cummasc íarsin forna slúagu uile &ersir; romill na Grécu &ersir; romarbh na Mirm[ed]ónda corici beolu na scor. Ocus rolá ár na slógh, &ersir; is do díármidhib na Togla an-romarb Tróil in lássin nammá dona Grécaib. Ocus is cuit péne má roéla nech don tslúagh uile úad nád bád baccach no dall no bodhar no cérr íarna thescad &ersir; íarna timdibe d'fhorgab a gái, do ghin a chlaidhibh, do bil a scéith, do ind a duirn, do bacc a uille, do remor a glúini, conad immále noimbredh forru báirne na cloch, creta na carpat, cunga na ndam, cécht na n-arathar. Nógebed dano na scíathu &ersir; na claidbe &ersir; na sunnu &ersir; na homnada, cona bitís 'na láim acht a terúarsena íarna mbrisiud oc slaide a námat. IS sí a mét, trá, dochótar for techedh conidh isin fechtain tárrasair Áiaic mac Telamóin daran-éise. Rothintái Troil cona Throiandaib com-mórbúaidh &ersir; com-morchoscur fó tráth fescoir día cathraig. Bái brón mór in n-aidchi sin i ndúnadh na nGréc tría ágh láma Troil. Tarthut léo a óete in mic &ersir; a laghad nofulngaitís forgla trenfher &ersir; fheinedh íarthair in betha imbúaladh fris. Asbert cách uadhib fria chéle, díambád lán a fiche bliadan nomairbhfed in slógh ule &ersir; ní rised fer innisi scéoil diib úad co tír na Gréci forcúlu. Diamad fher i formna a áise, nobíad ós churada &ersir; trénfheraib in talman ó turcbáil ngréne coa funedh, &ersir; nolínfadh in domhun dia ailgib &ersir; día gaiscedhaib &ersir; dia mórglonnaib, &ersir; doróscaighfedh ced do Ercoil ar neurt &ersir; chalmatus. Día sirtha fair combad tríchtach a ríghe na Troiandae nofhollomnaigfedh for fhiru talman, othá crícha Iuenes co hinnsi na mBretan fri domun aníarthúaid. Robad óenrí, thrá, fó chetheora árda an domhuin. si. r.

Issin matain arnabárach dolluid Agmemnón cona shlogh. Dollotar dano uli thóisigh na Mirmedonda cobághach bruthmar cech ndíriuch arcind Throil. Ó rochomraicset immorro na dá chath, rofiged gléo garb ann. Dorochratar sochaide do cechtar in dá lethe. Robátar sist in cruth sin oc cathugud cech lái. Nos-fúabred Troil cach día, &ersir; focéirdedh an ár corici na scuru. Ocus rogab eill dona Mírmedondaib sech cách, conascirredh láma díb co teigtís 'na les co Achíl.

INtan íarum atchonnairc Agmemnón na hilmíle do thotim día muintir &ersir; in fordinge dorat Troil forru, doch[ú]as uad co Príaim do chuinchidh ossaid, trichat laa fri adhnacul a marb, fri híc á crechtnaigthe. Dorat Príaim in n-ossad sin fóbíth a cétna do dénum.

[Dares c. 33.] O thánic, trá, aimser in chatha tecait na Troiandai am-mach asa cathraig. Tinólait na Gréic don leith aile. Tic dano Troil fóisin dochum na herghaili. Roimmáig na Grécu. Rothafonn na Mirmedónda remi dochum na scor for techedh. Iarsin, trá, rogab ferg &ersir; luinde a[n]ní Achil oc décain an madma cech lái ara ammus. Garb leis in glés nógebedh Troil cech lái for a muintir. Ingir dano leis a déghmuinter &ersir; a degóes imgona, a chóemh &ersir; a charait, do thuitim isinn ármáigh arabélaib. Mebol leis dano in moethgilla amulach doná roás finna nó ulcha do beith i[c] cummai &ersir; oc letrad trénfher íarthair in betha doná raibi cudrumus do shíl n-Ádhaim coséin. IS and sin dochúaid fadheisin isin chath, &ersir; ised dochuaid cech ndíriuch arcind Troil. Ó'tchonnairc Troil anísin ros-fritháil. Condrecat íarum comrac déssi diblínaib. Fócherd Troil fair erchor do gai mór co rodn-gon. IS for fheraib, thrá, rucad úad día scoraib intí Achíl. Robátar, trá, fón innas sin in tslúaigh oc thúarcain co cend sechtmaine. Sochaide immorro dorochratar etarru frisin ré sin.

ISin tsesed lau immorro íar crechtnughudh Achíl dodechaid isin chath arídhisi, &ersir; rogab a[c] gresacht na Mírm[ed]onda co robristís for Troiándaib. INtan robói in grían oc fresgabáil hi clethe nime &ersir; doratni fri glennaib &ersir; fhánaib, tánic Troil dochum in catha. Fóchérdat Gréic gáir mór estib ic aiscin Troil. Tecait na Mirmedonda arachind &ersir; fillit fair, fóbíth is for eoch robái, Do ségdaibh an domain ana nderna do clesaib gaiscidh arambelaibh .i. febas in dibraicthe, glice na hersclaige, trici na trénbéimend. Roimir a búrach &ersir; a baraind for martad na mbuden, for marbad na míledh, for slaide na slógh. IS do dírimib na Togla an-romarb Troil &ersir; a ech do Grécaib isind lathisin nammá. Ó'tchonncatar íarum na Gréic sochaide móra do marbad do Throil, doratsat uile a menmain fri tetarracht a marbtha. Tan dino robái Tróil ocond imguin fócherdar erchor forsin n-ech bái fói, coruc arrinde thriit, &ersir; co rolá an t-ech trí bidgu i n-árde, &ersir; co torchair dochum thalman, ocus rola Troi forsin leth aile 'na lighu. Ríasíu atrésedh súas tic Achíl cotric &ersir; co-tinnendsach ar a ammus, &ersir; dobeir forgab do gái mór fair, co ríacht co talmain triit, co n-erbailt Tróil de. Tan íarum dorat ammus for breith leis an chuirp dia scoraib, is ann tanic Memnón dub adochum, &ersir; roben uad in corp arécin &ersir; rogon Achil feisin. Téit Achil iarna guin dia scoruib. Tainic Memnon 'na degaid docum na scor cona sluagaib imbe. INtan íarum atchonnairc in caur úathmar as tresi robói do síl Ádhaim .i. Achíl, ni rodam dó cen tinntud fri Memnon. Condráncatar iarum comrac déisi iar cathugud dóib fri hed ciana. Dorochair Memnon iar fuirmed ilchrecht fair, &ersir; rocrechtnaiged ced Achil, &ersir; dochoid dia scoruib co mórbuaid &ersir; morcoscar, &ersir; robáss ica othrus intib cofata. Ond uair iarum dorochair Troil &ersir; Memnon romebaid forsna Troiándu docum a cathrach, co farcsat ár mór do degdóinib, &ersir; roiatta na doirrsi colleir. O tainic iarum ind adaig, dochotar Greic dia scoruibh co mbúaid &ersir; coscar.

Docúas arnabarach o Priam do cuinchid osuid co cenn trichat lathi. Rofhoemsat Greic indnisin. Rohadnacit iarum la Priam Troil &ersir; Memnon &ersir; sochaidi aile archena. Mad in coiniud immorro roferad for Troil &ersir; Memnon is diaisneti amal doronad. Ár robatar sluáig Asiae etir fer &ersir; mnái, etir macu &ersir; ingina, et reliqua sen &ersir; occ, oc lámchomart &ersir; occ nualguba i n-oenfecht &ersir; i n-oenuair. Rothelcset frosa dér ndichra. Robensat a fulta dia cenduib, &ersir; roruamnai[g]set a n-aigthi la tiachra ín gnima. Fobíth is é insin lathi i torchair airther in betha .i. ardtoisech na huili Asiae móre .i. rí na Pers &ersir; ind Egept do tuitim ann .i. Memnon. Mad immorro caur &ersir; cathmilid &ersir; cliathcomla cathu fher mbetha &ersir; in macoem án aurdairc imma n-ergidis macrada na Troiandae fri cluchib &ersir; chetib do thutim and, ba moresbaid don Assía ule. Ba sí so, tra, cétorgain na Trói. Ba húath lasna míleduib techt i cath daréis Tróil, ar ba comnart leo a menma o nabiid Tróil rempau, ár nochanos-gebed uath na oman imi in cech cath &ersir; in cech cathroi i tegedh. Deithbir ón dano, ar cia ro[b] maccaom som arái n-aisi, robo cathmilid arai n-engnama, robo gart arái n-enig.

IS iat sin, tra, scela &ersir; imthechta &ersir; aided in coiced tréncathmiled sil Adaim ule .i. Troil.

[Dares c. 34.] IS annsin, tra, doroni Ecuba ben Priaim comarli cealcaig n-indtledaig. Olc lea a dá mac lancalma do marbad da Achil cen a digail fair. Rotocured iarum Alaxander dia hindsaigid co roindled etarnada for Achil. Fobíth nofaidfeth si techta co hAchil dia tiachtain co tempull n-Apuill do naidm Poliuxina ingeni Priaim dó, &ersir; do dénam sitha fri Priaim. Rogell Alaxander co forbthechfed andisin dia tísad Achil isin coindi. ISind aidchisin iarum fadeisin dor[o]ega Alaxander mileda rochalma rotestamla na Troiándae, &ersir; ros-tinoil co hídhaltech Apaill Timbrecda. O thárnecatar, tra, na hisea rofoidi Ecuba techtairi do togairm Achíl. Ro-indis in techtairi do Achíl indi 'ma rofoided. Robo failid ri hAchil annisin &ersir; ba fota les cid co matain, ar serc na hingine. Doluid dino arnabarach Achil &ersir; Antiloicius mac Nestoir a comalta malle friss docum an ídaltighe amal asbert ín techtairi friu. Atraigh iarum Alaxander cona-muinntir asa n-etarnaidi &ersir; rogab oc gresacht na mileadh. INtan íarum atchondcatar Achíl &ersir; Antiloic anísin roláset a n-étaige diib for a láim clí &ersir; doroslaigset a claidbiu. Rodásed íarsin im Achíl, &ersir; roimbir forsna slúagu a bruth &ersir; a baraind, &ersir; ros-fúabair cofergach &ersir; coferamhail &ersir; dorochratar ilmíle díb leis, conid do dírimib na Togla ana torchair leis an lásin don gérrchlaideb bái 'na láim. Conostoracht Alaxander íar márbhad Antiloic, co tarat ilcrechta for Achíl. Rodn-gonsat dano na Troiándai adíu &ersir; análl, co torchair fodéoidh la hAlaxander íar mbeith fota oc debhaidh &ersir; ic imthúarcain. Ro[fh]orchongair íarsin Alaxander corp Achíl do chor fó chonaib &ersir; énaib &ersir; alltaib. Dogéntá dano anísin mani thairmescad Elena. Tucad íarum corp Achíl do Grécaib. Mór, thrá, in brón &ersir; in cóiniud robói ind n-aidchi sin i ndúnadh na nGréc. Nír'bó brón cen fhátha doibsium ón anísin, fobíth dorochair a cathmílid calma &ersir; a cléth bága fría naimtiu, &ersir; intí rodhingaib Hectoir &ersir; Troil diib &ersir; na tóisiuchu Troiandu olchenai dorascratar ilmíl[i] día slógaib. Rodn-gab athrechus do thecht an tslúagaid etir, ar dorochratar a tóisigh &ersir; a trénfhir &ersir; ar-rig. Annso cech ní léo dano Achíl do marbhadh, ar día mbeth Achíl rempu nofhailsaitís cech docair chatha &ersir; comraic &ersir; achomlaind donicfad.

[Dares c. 35.] Bai comairle in aidchisin la rígaibh na nGréc dús cía dia tibértáis comarbus n-Acíl. Ba sí a comairle, a thabairt do Aiaix mac Telémoin, ar is hé ba foicsi carotrad dóa. IS and asbert Aiáx mac Telemoin ba córai dóib techt úadib arcenn Pirr (piroc [pyrrós] interpretatur rufus) a mec fadheisin robói i n-inis Scir la Licoméid, lia senathair .i. lá athair a mháthar. Ba tol do Grécaib uile anísin. Ocus rofhóidhset Menelaum forsin techtairecht sin arcend Phirr. Roléic íarum Licomeid leosum Pirr do gabáil gaiscid a athar.

O thánic, tra, cend na mithisi, rochóraig Agmemnon a chath, &ersir; rogreisi na míledu. Tecait dano Troiándai don leith aile: ferthar cath cróda and, &ersir; dofuitet ilmíli don tslúagh cechtarda. Roláadh gáir móir and disíu &ersir; análl. IS annsin robói Aiáx lomthornacht isind hirgail. Robái dano Alaxander ic saigted na slógh a hucht chatha, &ersir; doroscair sochaidhe móra do Grécaib. Rolá íarum erchor do saighit for Aiaic, o robói lomthornocht isin chath, co ndechaid 'na thóeb. O dodechaid íarum bruth &ersir; ferg na gona innsidhe rofhúabair tríasin cath co hAlaxander, &ersir; ní thall láim de corus-marb &ersir; corus-mudhaig. Dochuaid immorro Aiáx mac Telemoin dia scoraib &ersir; tall a saigit ass &ersir; atbath iarum focétóir. Berair dano corp Alaxandir don chathraig. IS and, trá, robris Diómid forsn[a] Troiándu iar tuitim Alaxandir, &ersir; rolá a n-ár corice doirse na cathrach. Cénco beith, tra, doimniudh na Troiandae acht an búrach rofher Diómid forru isin lathisin, ba léor do ár &ersir; do mortlaid: ár ní rabe ní bad gránche oldás in luathletrad &ersir; in luaththinme dorat forru fri doirse na cathrach. Dochúaidh Agmemnon íarsin co nGrécaib imbi, co ndeisidh im-medón-cathraig &ersir; co ndernai frithairi impi corice in findmatin arnámhárach, ar ní rabe isin Trói nech dobérad dorair doib daréisi a ndeghthóisigh .i. Alaxander.

Mór, thrá, in brón &ersir; in dubha robái in n-aidhchisin hi cathraig na Troiandae do díth a ndegrígh. Tróg an golgaire rofhersat and fir &ersir; mná, etir áis &ersir; óitid. IS annsin dororchair in cing &ersir; in cathmilid dédhenach rochongaib ócu airthir in betha. Robadh ingir éim la feraib in talman, o turcbáil co funedh, timdíbe a chuirp seom dis n-aichintigtís a ecosc som: fobíth ní raibi deilb amal deilb Alaxandir etir méit &ersir; maissi &ersir; mórordun, etir chruth &ersir; chéil &ersir; chomlabra, etir détgen &ersir; dénum &ersir; deichelt, etir fholt &ersir; ulchai &ersir; aghaidh, etir gnáis &ersir; gáis &ersir; gaiscedh. Ba tairmesc do airbrib na nGréc din chathu- gud taidbriudh a chrotha. Ba techta dar tíre cíana día décsain. Bantrochta immorro na Gréci nodercdís fair ic breith na mbuaid i n-oenuch Elédem ní bá fíu léo asscin a fer feisin íarná aiscin seomh 'na thimthuch óenaigh. Roleth, thra, allud &ersir; ánius &ersir; urdarcus Alaxandir fon Assía &ersir; fon Éoraip ule sícc. Doratsat émh na Tróianda dímhicin for a cathraig, fóbíth atbath a fréscisiu &ersir; a ndúal tesaircne &ersir; a lennán uile etir fhiru &ersir; mnaa. Ar intan nothéged i cathugud noíadaitís fir &ersir; mnaa láma fair ná díchsed i n-eslind etir. Dég aurachille lá techt ananat (sic) uadhibh. Ní raibe día bráthribh domna rígh bád ferr oldáas, etir chruth &ersir; chéil &ersir; chóir &ndot;gaiscidh.

ISsin matin arnábárach immorro dollotar do adhnacul chuirp Alaxandir .i. Priaimh &ersir; Ecubu &ersir; Elenae, ar ná miscnighed na Troiándu &ersir; na carad na Grécu, do díth a fir.

[Dares c. 36.] ISind lathi sin immorro rothinóil Agmemnón na Grécu do doirsib na cathrach, &ersir; robói ic grennugud na Troiánda co tístáis asa cathraigh do cath frisom. Rofhorchongair immorro Priaim for a munntir frithairisem cocalma &ersir; gabáil na cathrach co tísadh Pentisilia ríghan na cíchloiscthe cona slógaib do chongnum &ersir; do chobair dóibh. O thánic immorro Pentisilia roshern arnábárach in cath inaghaidh Aghmemnoin. Húathmar, tra, an choimleng, cródho in claidbed &ersir; in coscrad tuc cách arachéile isin maighinsin. Ba tnúthach rofherset na mná armachai an choimleng. Nobristís na hergala for fhíana rochalma fher n-Éorpa. Noléced ferscál annsin a bernai chatha do banscáil. IS and sin condriced Pentisilia frisna trénfiru commarbad cech fer aruáir díb. Beg nár-bud rescidir fri banna d'fordorus i n-aimsir foilc cathmílidh chróda iarna tuitim docum thalman tré ágh a comlaind ar galaib deisi. Ni fóelangatar iarum cathmilide na nGréc an luthfás romór &ersir; an dechradh rofhersat na banfhénidi forru. Rotheichset íarum corice na scuru. Rochuir Pentisilia cona bantrocht ár mór díb co ndechatar ísna scoraib. Roshreth íarum an banmílid a slóg imna scuru 'mácúairt. Roloiscthe léa drécht mór dona longaib. Dobered cath cach lái dóib fón-innas[s]in, &ersir; nóbrised forru co teigtís im-medón na scor for techedh &ersir; isin fechtain nothairised Diómíd a oénur fríesi, fóbíth batir athlamiu na mná andáti na fir. Ar intan dourgabtáis na Gréic a láma fri tabairt béime no forcaib, nothócobtáis na mná a scíathu immátimchæll dond ersclaige: intan immorro immarchúiritís na Gréic a scíathu &ersir; a mboccóti fri ersclaige &ersir; fri himditin, in leth día nochtatáis íarum nocriathraitís ona mnáibh. INtan iarum na fhoelangtar na Gréic ted[fh]úaparta na mban lánchalma dona fríth sét na samail do mnaib domhain, dochótar 'na scoraib &ersir; roíadsat na doirse coléir. Ocus ní rol ic Agmemnon dóib dul ammach asin dún co tísad Meneluas asin Gréic. Tanic dano fóisin Meneluas &ersir; Pirr co dúnad na nGréc, &ersir; tucad arm a athar do Phirr, &ersir; doróni cói &ersir; lamchomart fora lighe, ocus nír-bó gan fhotha dhó.

IMthusa immorro Pentisilia, tánic isin cath amal dogníth cach lái, &ersir; dothét do dóirsib na scor. Córaigid Pirr dano, rí na Mirmedón[d]a, a chath don leith aile. Srethais dano Agmemnon slogu na nGréc archena. Doroichet diblínaib arcind Pentisiliae. IS and sin roslaidh Pirr ár dérmár dona cíchlois[c]tib, &ersir; robris forru co táníc Pentisilia. O thánic-sidhe íarum condric comhrac ndéssi fri Pirr. Robatar, thrá, co dead lái cach díb oc tuarcain a scéith for araile, &ersir; ní ruc nechtar forgab for toind arachéile. Robo chródha, thrá, in comlonn banscáile rofhóbair Pentisiliae andsin .i. comrac frisin láech is treisiu robái i n-airther in betha, &ersir; romarbh sochaide móra dona sluagaib.

Laa n-and dorat Pentisiliae forgab for Phirr coros-loit cogarbh. Dochuaidh íarum ferg &ersir; bruth na gona hi Pirr, co ná fitir úath ná herod ic indsaigid Pentisilíae. Fegait comlann ndéise. Ropo ferda, thrá, an comracsa, aráide ba forthreise gaisced Pirr. Dorochair Pentisiliae a comrac déisse.

ÍAr tuitim immorro na rígna romemaidh for na cíchlois[c]tib &ersir; for na Tróiandaib, &ersir; rolá Pirr &ersir; Díomid ár mór díb, co riachtatar dóirsi na cathrach. Iadait íarsuide na Gréic immon cathraig, &ersir; ferthar in cath impe 'mácúairt.

[Dares c. 37.] INtan íarum atchonnairc ríg &ersir; tóisigh na Troiandae ná slúaghu sechtair &ersir; a mbeith immon cathraig, dochótar do acallaim Príaim. Bátir hé na tóisigh tháncatar and .i. Antinóir &ersir; Polidamas &ersir; Áenéas. Do chomhairli dano thancatar dús cid dogentáis frisna mórshlúaghaib rogabsat forru. Rotóchuirit a uile thóisigh do Príaim, &ersir; roíarfaigh dóib ced rop a[d]láic léo [do] dénamh. IS andsin asbert fríu Antenor. IS cuitbiudh dúib, ol sé, cathugud fri Grécu, ar atbathatar for mílidh, rotascrait for láich, dorochratar for tóisigh, romarbthá maicc Príaim &ersir; cech óen dodechadar asna hailithírib do fortacht dúib. Marait immorro tóisigh na nGréc .i. Menelaus &ersir; Pirr mac Achíl, nád étrese oldáas a athair, &ersir; Diómid &ersir; Aiáx Locrus &ersir; Nestor &ersir; Ulíx. Dobar-timairced íarum isin chathraig &ersir; rodúnta dóirse na cathrach forib. ISs ed as maith duíb íarum, ol sé, berar úaib Helena do Grécaib &ersir; in brat olchena tuc Alaxander ó inis Citherea. Raghdait íarum Gréic día tigh co sith &ersir; cháinchomrac. Ó robátar síst oc trial dénma in tsíd, atraacht Amfimacrus mac Priaim isind airecht. Moethóclach rotrén insin, &ersir; rorádi briathra and fri Antinóir &ersir; frisna hí robátar 'na óentaid .i. Bá córu duib, ol se, commad gressacht in tslúaig dognéth sib &ersir; techt rempa do chauthugud friár náimtib tarcend far tíre &ersir; for n-athardai &ersir; for cathrach. ÍArsindí, trá, roforb Antinóir na briathrasa atraracht Aéneas mac Anacís co n-érbairt aithesc n-álghen fri hAmfimacrus. A maic, ar sé, bá férr síth &ersir; cháinchomhracc oldáas eisíth &ersir; debach.

[Dares c. 38.] Asraract dano Príaim fadeisin co ndérbairt Cía beithisi émh, ar sé, a[c] cuinchidh shítha &ersir; chóru? Is triuib tháníc cech n-olc dorónad sund. Bátir sibh tóisig rofhóidius[s]a co Grécu. Rofhóidusa émh indarade do chuinchid mo shethar dam o rígaib na nGréc. Intan íarum dodechaid fo mélacht &ersir; fo éra, ó ulib rígaib na nGréc robái ic aslach &ersir; ic tabairt immón airtabarta catha do Grécaib. A chéli, dano, is hé roairg inis Citherea, maille fri hAlaxander, &ersir; tuc esti Helenam &ersir; in mbrait olchénai. IS airi sin íarum ní híarata cid dúibsi in síth. Bid far menmai fris immorro corbat erlamha intan seinnfider in stocc oc techt dochum na ndorus do thabairt chatha crúaid codait do Grécaib, do brisiud dúib for far naimtib nó for mbás fadeissin.

O roscáich íarum rád na mbriatharsa dochóid cách día thig. Dochoaid íarum Príaim isin rígthech &ersir; rogaired a mac chuici .i. Amf[im]acrus, ocus roráidh fris Atágur, ar sé, in lucht atáat ic eráil an tshídha do brath na cathrach conid-ed is cóir deisidhe a marbad ria síu chinnit in chomhairle sin. Derb leis mani mairntae in chathir robad cathbúadach fora naimtib &ersir; nobrisfedh forru. IS ed comairle doróni Priaim. Rotinolait leis a mílid rochalmai do dénum ind échta ríasíu noforbaitáis lucht na comairle brath na cathrach. Rogell dó iarum Amfimacrus dogénad aní roforchongair Príaim fair. Déntar cobled mor lend, ol sé, &ersir; gairter na toisigh do chathim na fleidhe. Tinólfatsa míledu do chumsanad forru.

[Dares c. 39.] IMthuasa immorro na tóisech .i. Antinoir &ersir; Polidamas &ersir; Aucligón &ersir; Amfidamas, o roscáilset asin dáil lotar co mbátar i n-óenimacallaim &ersir; roairchis cách úadib a imnedh fria chéile. Ba trom léo aní roráidhi Priaim, ar bá ferr leis a dílgend féin &ersir; dílgend na cathrach &ersir; a athardai oldáas síth fri Grécu. IS and asbert Antinóir Bái comairle lemsa duib, ol sé, &ersir; ticfad far less di, man bamm imeclach dia rád. Apair-seo éimh, ar na tóisigh aile, &ersir; ní ricfa cænn scéoil úainne tar tech, &ersir; ceped comairle dobéra dogénamne airiut. Tiagar úain, ar Antinóir, artúus co hÁenéas, co raib acaind isin-comairle. Tánic dano Áeneas andóchum, &ersir; rofhíarfaig díib cidh comairle is áil dúib do dénum? ol Áeneas. IS hí dano ar comairle, ar Antinóir, mádat óentadachsu frinn. Nech úainn do thecht co Grécaib do acallaim Agmemnoin &ersir; mathe na nGréc archenai, co tartar glinne &ersir; enighe frinn im anacul ógh ar muinteri darcend bratha na cathrach &ersir; dílsighthe ar n-atharda &ersir; tréoraigthe éolais doib co rígphelait Príaimh. Romol cách an comairle sin. Rocuiredh dano Polidamas úadhib do acallaim Agmemnóin, dég bá hé bá lughu cin fri Grécu, ocus roinnis do Agmemnón a thechtairecht do- léir. Rotóchuirit íarum ríg na nGréc i n-óendáil co hAgmemnón, &ersir; atfet dóib aní frisa-tánic Polidaim .i. do brath na Trói darcend síth &ersir; charatraidh dóib féisin.

[Dares c. 40.] IArsin, trá, roíarfaigh Agmemnón dona ríghaib dús cedh dogentáis frisna bráthemhnaib, in tibértáis rátha fríu fó ná tibhértáis? Atrubairt Ulix &ersir; Nestor, nír'bó fír etir do Polidaim, acht as for ceilg thánic. Mádh Pirr immorro, ní thorlaicside chucai etir scél Polidaim. O rodheimhnighestar dóib íarum Polidámas, nách fri scél mbréci thánic, rochuinchidar Gréic comhartha chucai. Atrubhairt Polidaim cidh isind úairse ría techt damsa dechastái dochum na Trói oslecfaid Áenæs &ersir; Antinóir dóirse na cathrach reimhib. Atbertatar íarum tóisigh na nGréc día fegatáis in comhartha .i. caindle adhanta do thaspénad dóib, &ersir; día cloistís guth Áeniasa &ersir; Antinóir nofhirfaitís al-luga frisna brathemno .i. Antenóir &ersir; Aucoligon &ersir; Ippitamas &ersir; Aenáes &ersir; Anachis do anacul cona mnáibh &ersir; maccaib &ersir; inghenaibh, cona mbráthrib &ersir; chobnestaib &ersir; chocélib &ersir; cona fhochráibib archaenai.

[Dares c. 41.] O rogléset íarum a córu rogab Polidamas tús rempu dochum na cathrach .i. cosin dorus díanid ainm Scea. Fúaratar íarum comartha día comarthaib and .i. cend eich fhind i n-imdénam uas an dorus.

Tancatar íarum lucht in bráith .i. Áenaes mac Anachis &ersir; Antinóir i conde na nGréc. IMthusa immorro Príaim, robói cech rét i fúr &ersir; i n-erlamha aici do marbad lochta an braith &ersir; do chathugud darcend na cathrach. Rothinolset íarum tóisigh in braith a muntera &ersir; a coemu &ersir; a cartiu dochum an doruis hi tardsat comartha do Grécaib conid and bátar immon dorus adíu &ersir; anall. Tancatar Gréic fóisin dochum an dorais díanid ainm Scéa. Lucht in braith rooslaicset in dorus &ersir; rofhursainset caindle fri haigthe a carad &ersir; a cocéle, &ersir; roléicset chuca isin cathraig. IS síad so immorro na tóisigh roléigset chuca .i. Pirr mac Achíl hi tosuch &ersir; Diómid &ersir; Menelaus mac Átir &ersir; araile toísigh archenai Pirr, immorro, is é robói ic anacul a muinntire uile in lochta romairnset an cathraig. Rogab, thrá, Antinóir tóisech ria mbuidnibh &ersir; slógad na nGréc dochum denna &ersir; rigimscingi &ersir; rígpheláti Príaim, dú ir-rabatar forgla thóisech na Tróianda uile. Indarlat dofóethsad an talam fó cossaib ar threise na toilge ron-ucsat &ersir; ar mét na feirgi. IS ann sin, trá, roimbir Pirr mac Achíl a bruth &ersir; a baraind &ersir; a bidbanais forsna Troiandu. Dorochratar sochaide díb in n-áidchisin día láim. Dorochair and íarum Pontius mac Ephrói, primerlabraid na Tróiandai ule indegaid Antenoir. Dorochair and dano Coréb céle Casandra ingene Príaim. Maccóem insin &ersir; ánrad &ersir; rind n-ága airthirthúascirt in betha. Ní moo andá sechtmain o thánic an chath ... co ronasced dó Casandra. Ní roaccobáir immorro etir Casandra a héilniud, acht rop[fh]err léa a feidligud i n-ógi &ersir; i ngænus. IS andsin, thra, tárrasair Pirr mac Achíl in cathmilid i ndorus denna Príaim, &ersir; túag dé[fh]áebrach 'na láimh, &ersir; rogab dono dorus as cáinemh &ersir; is áillem robói isin bith do rindaigecht écsamail cacha tíre co n-imdénum di ór &ersir; argut &ersir; lííg lóghmair. Roraindset íarum na mílidh robátar i peláit Príaim íat feisin. Tucsat drem úadhib in dorus ind lis. Rogabsat side ic frithgabáil fri Pirr &ersir; frisna láechaib archenai. In fairend aile immorro dochótar side for sonnachaib &ersir; dumaib &ersir; chnoccaib togla an denna, corgabsat ic tréndíbricud na slógh, conid immaille notheilgidís forru na gae &ersir; na claidbe &ersir; na sciathu &ersir; na saigte &ersir; bairne na cloch fo chossa &ersir; sailge &ersir; cláradu &ersir; dromclai &ersir; ochtaige na ngríanán &ersir; na taige cláraidh. Robrissiset dano benna na stúagdorus, &ersir; rochuirset i cenn na nGréc, co rothascairset ilmíli dona slúagaib fón innas[s]in. Atreachtatar íarum lucht na cathrach cohúathmar &ersir; cohimeclach, codremon &ersir; codéinmnetach. Ní, tráth, conair theichidh acu, ar rolínsat Gréic sráti &ersir; ch[l]ochána &ersir; belata na cathrach. Robái, trá, óengáir forfut na Trói. IS cumai nógairtís na mílid &ersir; nóeightís na curaid, nobuirtís na buirb, nóiaechtaitís na mná, nóscréchaitís na lelaip. Dála immorro denna Príaim, rogabsat láich lánchalmai na Troiánda íca dín &ersir; icá anacul. Fóbíth is ann robói an-roba dech d'ór &ersir; d'argut, do sétaibh &ersir; máinibh na Tróianda. Rogab immorro Pirr mac Achíl ic tescad &ersir; ic timdíbe na comlad co ríacht féin cona sciath tríana lár. Dorat íarsin tafhonn forsna Troiandu robátar ic daingnighud a ndorais. Deithbir ón fóbíth rop hé cend gaiscid fer mbetha daréise an lochta lánchalma dorochratar ann foran togailsea antí Pirr mac Achíl díatá furaithmet sunn. IAr mbrised do Phirr ind imdorais, &ersir; íar tafhonn na cumétaide robátar isin dorus, dochúaid isin rígthech co romarbh a mac arbélaib Príaim. Roléci Príam erchor do gái fairseom co ndechaid sechai, fóbíth robo senóir díblide hé ann. Rolá Pirr erchor for Príaim co ndechaid inn &ersir; co ro[s]sreng archind isind imdai, &ersir; tall a cend de ic altóir Menerbe. IN-óen chonair immorro dochúaid Écuba &ersir; Poliuxina. Raráith íarum Áenaes arcend Poliuxína. Dorat immorro Écubu lándílsi na hinghine dó darcend a anaicthe. Rofolaigh íarsin Áenáes Poliuxinam fó chóim a athar Anáchis. Andromacho immórro, ben Hechtoir, &ersir; Casandra ingen Príaim dochótar co rolaigset for altóir Menerbe. Ní rabi cumsanadh ann, tra, co find na matne for indriud &ersir; orcain na cathrach. Roloisced an chathir coraibe tría chorthair tenedh &ersir; fo smúit dethcha. Robúrestar &ersir; robécestar Badb úasu. R[o]gáirset demna aéoir úasu chind, ar rop aitt léo martad mar sin do thabhairt for shíl n-Ádhaim, fobíth rop fórmach muinntire dóib sin. Mór, trá, an t-anfhéth &ersir; in míchostadh robói 'sin Trói in n-aidchi sin. Robói crith ar détaib na lobar. Rotódáiled fuil nam- míled: roíachtset na senóre: roscretsat na nóidein: roéighset na hingena macdacht. Romiimrit, trá, sochaide do mnáib sáeru socheníul andsin ocus rothaithmigit trílse na fedb, &ersir; romarbait na slúaigh. Rohinred &ersir; rohaircedh &ersir; rodéláraighed an chathir.

[Dares c. 42.] O thánic iarum soillse lái arnabárach condrancatar ríg na nGréc i n-oenchomairle, &ersir; dorónsat altugud buide día ndéibh &ersir; día n-arrachtaib. Romol Agmemnon na slúaghu, &ersir; roheschongrad úad íarsin crod na cathrach uile do thabairt co hóenbaile, &ersir; rorand cert fodla dona sluagaib íarná céimennaib &ersir; íarna ngrádaib córaib. Robai comairle íarum icna rígaibh dus ced dogentáis fri lucht an braith, in tibertha sóire dóib fó na tibertha. Rodíucarsat na slóig ule, &ersir; ised roráidset: sóire &ersir; córai do thabairt don lucht rothréicset a n-atharda &ersir; a cathraig. Cech ní, thrá, rogab in slógh día ndóinib &ersir; innilib, dia sétaib &ersir; máinib, doratad dóib ule, &ersir; doratad anacul dóib cona cairdib &ersir; chocélib &ersir; chomaltaib &ersir; cósna huil[i]b rótechtsat. IS annsin, tra, roattaig Antenóir inní Agmemnon, co roleicthe dó bec mbriathar do rádh fris. Rochétaig Agmemnon dósum. Rotheraind Antenoir for a glúinib &ersir; rofhill fothrí íat i fiadnaisi Agmemnoin, &ersir; atbert fris: Helena &ersir; Casandra ar sé, atat i ngábud &ersir; i ngúasacht ar imeclai. Cid is coir libse do dénum fríu? Ba cóir chenai duibsi anacul dóib ar in degimpidhe &ersir; ar in degfhastine dogniid Casandra duib &ersir; ar in n-aslach doróne Helena im thidnacul chuirp Achíl día adhnacul isna scoraib dar sár Alaxandir. Dorat íarum Agmemnon sóire don díis sin .i. do Chasandra &ersir; do Helena. IS and sin, trá, rogaid Casandra itghe darcend a mathar .i. Écuba, &ersir; darcenn mná Hectoir mac Priaim .i. Andromacho, &ersir; roinnis do Agmemnon amal rod-carsat in días sin commór, &ersir; doberdís degtheist fair 'na écmais. Rochomarlecestar Agmemnon anísin frisna rígaib. ISs ed deissidh léo a soire don díis sin. Ana fríth and íarum do dóinibh cenmóthá sin &ersir; do indmassaib forodáil Agmemnon don tslúag. Rugéne dano Agmemnon atlugud búdi dona déib. ISsin choicatmadh lau íarum rothinolsat in tslúaig uile i n-oendáil día chinniud ced lathe nógluaisfitís dochum a tíre &ersir; a feraind fadeisin.

[Dares c. 43.] Túarcabset anbtine fríu co nár' bó inimrama dóib in muir. Roansat dino isin cathraigh tría illathibh. IS andsin rofrecáir Calchas nábtar buidig na déi díb. IS andsin dodechaid im-menmain Phirr chuinchid Poliuxina fo ía na fochonn romarbha ingnad leis íarum nach isin rigthaigh. Téit d chid co hAgmemnon Tiagar for a iarair sethnoin nac O na fuair docuas uadh Antinoir. O taínic side al-laim Aigmemnoin, adrubair co rocuinched dó Poliuxina &ersir; co tucad il-lamaib Pirr maic Dochuáid-side do acallaim Aen innisin dó. Agme[m]non i cúinchid P écin ois. dorat Áenáes inní Poliuxina ar-ropo ecail l robái do thabairt fo r &ersir; fó ghin chlaidhib. Ocus dos-r il-láim Agmemnon. Co tarat sid Phirr. Rogab-side íarum eb dí for ligu a athar Ba fercach íarum Agmemnon fri h Poliuxina. Ocus ised atrubairt fri bad tír na Troiandae &ersir; ara for longais. al-loss an gn dó Dochuaidh íarsin for longais cosin lín rolae longaib a ndechaid Alaxa hinis Citherea. día tu Helind ut ante dictum. Robói .uii. mbliadna for nuachommad fut mara Torrén. ut in O rochomlói, tra, Áenæ ais dochóidh Agmemnon di cathbúadach cathch mórshlúagh &ersir; cona buidhnib iar ndíghail a chneite ide for fhiru Assia íar &ersir; íar milliudh &ersir; iar slaitt [i]mna sétaib &ersir; imna máinib na Troianda féisin a forneurt aib cíana comaitche fo ib in betha. Mór mbróin bái for gnuis Helena do frisin Trói. Ba móo co duba-sin oldáas an duba ro ri ic scaradh fri hinis Cith Helenus immorro &ersir; Casandra inghen Andromacha ben Hectoir &ersir; [Ecub]u ben Priaim. ised rogabsat do dá cét ar sé mílebh. al-lín Antenóir cona fairaind hi Troiandae cóic cét. ar dib mílibh é lín rolen Áenáes cethri óra mílib. IS hé lín dano do do Grécaib la Troiandu, amal [Da]réit. sé míle ar ochtmogait ocht cétaib míle. IS hé [do]rochair o Throiandaib la Grécu ria mbr [ca]thrach .i. sé mile décc ar thrí cetaib mile. Cét ar shecht is hé lín dorochair do Grécaib Hechtoir a oenur. It íat toisigh ll Diomenus Carpedon Lepodum for meis ll Amentius ll Cleofinor righ Arcomenus Pullixinus, Minon, Antipus, Leontem, Polibétes, Clopenór.

Dá ardtóisech domarbh Áenæs .i. Anfimacrus, Neríus.

IT hé tóisigh domarb Alaxander mac Priaim: Achíl, Palámid, Antilocus, Aíax Locrus, Aiax mac Telamoin, comthuitim do sede &ersir; do Alaxander.