Corpus of Electronic Texts Edition
Annales Breves Hiberniae (Author: Thaddeus Dowling)

annal 1105

1105.0

A.D. 1105.

1105.1

Hugleto Hibernie monarcha (regnante Stracathero gigante) a Frotho 4. Danorum rege, in comitiva Herconis Segathii capitanei exercitus Danorum, venit in Hiberniam, quem quidem Herco Segathus Hibernicus dire vulneravit in capite, sed gigas hic Stracatherus talis stature, et animositatis ut obtineret victoriam, et Dani crediderunt illum invincibilem, quidam Hibernici vocarunt illum Fin Mc Coyl, sed brevi post fuit interfectus.

1105.2

Circa hoc tempus Cowkaggrig de Omoardha principalis de Clanmelaghlen in Basca, fundavit et dedicavit monasterium de Lege Dei in Lease Carraghain in Lagenia.

1105.3

Reygnyrus filius Sydwardi, 2. ejusdem nominis, Danorum rex venit in Hiberniam et interfecit in bello Melbrichum, regem Hibernie, et Dublinia devicta in eadem remansit per 12 menses.

1105.4

Regnante Willelmo Rufo conquestoris filio in Anglia, exercitus Hibernicorum cum Riseo, aliter Rees, filio Theodori Britanni, devicit regem Wallie Blethyn Convyn in bello de Llecryd in Wallia AD 1087.

1105.5

Owinus, filius Cadogan ap Blethyn, Northwallensis fugit hic in Hiberniam, eo quod interfecit Willelmum de Braubant episcopum, propter quod rex Anglie expulit patrem ejus Cadogan, et totam ejus hereditatem in Cambria dedit Gilberto Strangbow, comiti Strugulensi, qui comes edificavit castrum de Kylgaran juxta Powis.

1105.6

Grifitz filius Risei, educatus in Hibernia ab infantia, incepit vexare dominium Gilberti Strangbow, et in adjutorium sibi assumpsit plures Hibernicos.


p.8