A.D. 389.
Patricius secundum Hibernie scriptores filius Calphurni diaconi, et filiae presbyteri, natus inter Scotiam et Angliam in villa nomine Kyburne, cujus matris nomen erat Conches, (Concha) germana Sancti Martini, Turonensis episcopi in Gallia. Iste Patritius etatis xvi, scholaris et cetera, per piratas Hibernie captus et in Hiberniam ductus, porcorum custos fuit sub Hibernico, nomine Mc Bway, sex annis, quo tempore linguam Hibernicam satis addiscebat, et postea ultra mare transfretavit, et cum Germano Augarensi episcopo sacram paginam per 40 annos addiscebat.
A Celestino papa cum literis comendatitiis venit Hiberniam, tempore Laigerii, filii Nielani magni, monarche totius Hibernie, predicavit, baptizavit et cetera.
Primo de Ultonia petiit Conatiam ad Dovaldum, Conatie dominum, qui ab illo baptizatus cum suis; qui misit illum ad Loganum regem Lagenie, quem baptizavit, et misit in Momoniam ad comitem Dareys qui ut ceteri et cetera. Postremo xvi. calend: Aprilis anno domini 496 obiit et sepelitur in Duno.
Eodem tempore floruerunt Brigida virgo et Sanctus Columba, quorum in eodem tumulo inventa sunt corpora statim post Anglorum conquestum.
Haec Cambrensis, et Johanes Coursey, miles, comes et conquestor Ultonie testatur se vidisse precipua Hibernie Jocalia. 'Tres sunt in Dunno et cetera'.
Norwegiani, homines bellicosi, audaces, robusti et avidi, ad acquirendum aliorum regnorum conquestum multum dediti, postquam insulas de Orkney et Ilees acquisiverunt, viagium huc in Hiberniam fecerunt, tempore Laigerii monarche Hibernie et tempore Sancti Patricii, et ab illo tempore usque ad conquestum Turgesii Norwegii regnaverunt 33 reges in Hibernia, vide infra in Turgesio.