1345.
Circa Pascha obierunt domini Mauricius Geraldi, et Geraldus de Rocheford.
Item, Poerini combusserunt quasi totam patriam circa Waterfordiam, destruxerunt et spoliaverunt; et ex hoc quidam eorum fuerunt suspensi, tracti, et in quarteria divisi apud Waterfordiam.
Item, in festo Baptiste, Mauricius comes tunc Desmonie castrum de Menaht cum multis milibus obsessit et impugnavit, sed non expugnavit, nec obtinuit; frustratus a proposito revertitur.
Item, capitulum apud Clan, in quo quatuor tantum custodie assignantur; et loca Kilkenie et Ros de custodia, Dublinie assignantur.
Item, obiit dominus Johannes O'Grada, archiepiscopus Casselensis; cui successit frater Radulphus O'Kally.
Item, obiit dominus Henricus, comes Lancastrie; vir venerabilis, potens et bonus.
Item, guerra inter Radulphum de Ufford, justiciarium Hibernie, et Mauricium filium Thome, comitem Desmonie; et justiciarius eum terris suis, scilicet, Clomele, Kylsylan, Kysekyl, Oconyl, Kyrigan et Desmonia privavit: bona sua, predia ejus, dominia et possessiones ad opus et manum regis confiscando; et majores nacionis et dominii comitis obsides regi de fidelitate et subjectione regi servanda et facienda reddere fecit et coegit; et multi eorum pacem regis, et cartam pro vita et terris suis habendis magna et gravi redempcione comparaverunt et habuerunt.
Item, occiduntur per Mc Dermada, dominus Robertus de Barry, et Philippus de Prendergast, partem regis et justiciarii tenentes, contra generum suum; nam, dominus Robertus germanam comitis, dominus autem Philippus filiam germane ejus duxerant in uxores.
Item, castrum comitis predicti de Yniskysty, per justiciarium et suos obsessum, die Veneris (in festo Ieronimi doctoris) est expugnatum et optentum.
Item, die Veneris, xii, Kal: Novembris, in festo Hillarionis abbatis, cum grandi exercitu Lageniensium, Momoniensium et Connactencium, Castrum Insule, (quod vulgi judicio vix erat expugnabile), ipse justiciarius ipsum castrum ab ipso et exercitu ante ad quindenam obsessum invasit et expugnavit; et tunc primo in hac expedicione et anno, vexillo regis erecto, extenso et elevato, Castrum Insule invaserunt, confregerunt, cum manu valida et fortitudine intruerunt, et inde enim Johannem Coteres, comitis senescallium (qui multas graves, extraneas, et intolerabiles leges dicebatur exercuisse, tenuisse et invenisse), die Sabbati in crastino judicialiter trahi fecit justiciarius, suspendi, decapitari, interiora ejus comburi et membratim dividi, quarteria ejus ob memoriam tyranidis sue ad diversa loca provincie
Item, die Sabbati in crastino Calixti pape occiditur in parliamento a suis consanguineis Tir Halwaht O'Konkur, rex Conactie, ex discordia orta inter eos, una cum sagitta projecta ad interitum ad comunem populum, eum in genu percussit, statim interiit, aliis illesis omnibus permanentibus.
Item, in festo Innocencium, Hibernici de Slebanie combusserunt Bordgwyl, et Robertum le Gras et alios Anglicos occiderunt; et ipso die Carwill Mc Gilpatricke patrie princeps, occiditur.
Item, circa festum Annunciacionis Virginis, dominus Johannes de Weyr, comes Oxonie in Connactia cum suis de Britannia reddiens, tempestate et vi ventorum depulsi sunt, dejecti, et inter Hibernicos applicuerunt; qui spoliaverunt eos bonis suis, equis et armis, graves insultus inferentes, et cum eis gravi et impari insultu pugnantes; qui de naufragio seminudi vix evaserunt.
Eodem tempore dominus Henricus Skrope in Desmonia de Brytania veniens, tempestate depulsus applicuit; tamen inter fideles, qui nil ei mali fecerunt.