1344.
xiij. die Julii applicuit Dublinie dominus Radulphus de Ufford, justiciarius Hibernie, cum uxore sua Matilda comitissa Ultonie, filia comitis Lancastrie; cum pulchra comitiva sagittariorum et aliorum armatorum, et militum, die Martis, 3 Idus Julii. Hic terras Mc Morkada in O'Kensely, et blada Hybernicorum patrie combussit, et obsides de pace tenenda dare compulsit.
Item, in eodem anno combusta est villa de Mondesseyl, et tota patria de Cumscy integre, et molestores de cognomine de Sancto Albino inde sunt expulsi; nec domus ibi dimissa in qua possent habitare, per dominum Fulconem de la Frene, tunc seneschallum Kilkennie, imediate ante et post nativitatem Domini.
Item, in xla, dominus Radulphus Dufford justiciarius Hibernie, Ultoniam intravit cum manu valida, et passagium de Ymerdoylan reparavit, et meabile fecit; ejecto Thoma McArthan rege patrie, interfectis quibusdam de hominibus dire; et Henricum O'Neyl, regem Ultonie deposuit a regno, substituto O'Done O'Neyl pro eo; et sic cum laude et triumpho revertitur.
Item, in festo Cathedre Petri, fuit parliamentum factum apud Callan, et, quare nescio, ad quod venit Mauricius filius Thome cum multis millibus hominum, ad quod credidit majores terre ad eum venisse; sed rex timens talia conventicula suspecta, et potius malum quam bonum ex hoc evenire, per breve regis prohibitum est omnibus ne venirent. Et per hoc majores terre predicto Mauricio se excusabant, sed domi manserunt.
Item, filii Walteri de Sancto Albino utramque villam de Colaht combusserunt, et patriam spoliaverunt, multos fideles occiderunt, gravia dampna fidelibus patrie inferentes.
Item, corpus Joseph ab Arimathia Glosconie dicitur
Item, fit novus rex Insularum, per Clementem quintum in Curia Romana.