1340.
In platea Kilkenie occiditur Robertus Conton, die Veneris infra octabas Pasche.
Item, die Jovis proximo post, occiditur Raynyl, soror Mc Gilpatricke, per Rechefordis.
Item, Kalendis Maii, passagium omnium navium indifferentur conceditur per regem, et concilium suum ville de Ros, ad instantiam, et laborem, et diligenciam Radulphi Meyleri.
Item, hoc anno in festo Baptiste, rex Anglie cum exercitu suo, classem navium regis Francie cepit et destruxit, et multa milia hominum in eis inventorum gladio occidit et submersit, et regnum Francie intravit, debellando, occidendo et comburendo, in tantum quod Anglie et Francie simul regem se vocari fecit et scribi in omnibus causis, placitis et literis suis.
Item, die Veneris, scilicet iiij.to die Augusti, occiduntur per Mc Morcada et O'Nolan, circiter xxiiij. homines de Balygaveran. Isto anno sal vendebatur xvi. solidis.
Item, die Martis in crastino beate Agathe virginis obiit frater Rogerus Owtlaw, prior Hospitalis in Hibernia apud Any, tunc locum justiciarii tenens; et etiam cancellarius domini Regis, trium simul functus officio. Vir prudens et graciosus, qui multas possessiones, ecclesias et redditus ordini suo adquisivit sua industria, et regis Anglie gratia speciali et licentia.