Item, anno Domini 1338, dominus Eustachius le Poer in vigilia Assensionis Domini, tunc seneschallus Kilkennie, attachiavit et incarceravit dominum Fulconem et Oliverum de la Frene, nulla eis ostensa causa capcionis; qui timentes potius malitiam ejus et vincdictam, quam justitie rigorem; Oliverus die Assensionis prudenter de castro evasit, et in crastino congregatis hominibus et amicis eorum, cum manu valida portas castri Kilkennye confregerunt et dominum Fulconem inde, invito senescallo, eduxerunt.
Item, eodem anno in festo Baptiste Edwardus tercius post conquestum Anglie, cum magno exercitu regni sui, et preter illos, cum aliis centum millibus, et xli. millibus (ut nuncii referunt), contra ......[gap: extent: a few letters] regem Francorum, Alemaine partes intravit.
Item, ultimo die Augusti, comes Desmonie fecit xiiij. milites apud Rahtymegan.
Item, die Mercurii, scilicet Nonas Octobris, Poterini post juramenta et diem captum inter eos, et dominum Walterum de Valle, cum esset tunc vicecomes Tyberarie, redeundo de comitatu tento apud Clomele extra villam, eum cum xiii. de sanguine et familia sua occiderunt.
Item, die Sancti Martini in sero fuit ventus validissimus et tempestas horribilis.
Item, die Martis, scilicet xv. Kal: Decembris, fuit maxima inundancia aque, qualis a xl.ta annis ante non est visa; que pontes, molendina et edificia funditus evertit et asportavit; solum altare magnum et gradus altaris de tota abbacia Fratrum Minorum Kilkennie, aqua non attigit nec cooperuit.
Hic annus fuit tempestuosus nimis et nocivus hominibus et animalibus; quia a festo Omnium Sanctorum usque Pascha, ut plurimum fuit pluvia, nix, aut gelu, a festo Andree usque Vincencii festum cessabant aratra propter nivem et
Hoc anno boves et vacce moriebantur, et oves precipue, fere sunt destructe; ita ut juxta communem loquelam, vix septima pars ovium a peste evasit, sed agnorum major interitus.
Item, in hoc anno in quadragesima, salices in Anglia rosas protulerunt, que ad diversas terras pro spectaculo sunt advecte.
Item, circa festum [gt ]Magdalene, Anglici super Hibernicos Desmonie, scilicet, Mc Karthy, magnum stratageme fecerunt, et statim post, super O'Dymiscy fuit facta magna occisio.
Item, in principio autumpni, Mauricius filius Thome, Desmonie tunc comes, Clonmele et Kylkyban, a Willimo de Grandissono emit, mille et centum marcis.
Item, die Veneris in vigilia vigilie Assumpcionis, occiditur per O'Nolannis Laurencius le Botiller, frater comitis Ermonie.
Item, die Lune in vigilia beati Mathei apostoli occiditur Johannes filius Johannis de Sancto Albino (per filium Walteri de Sancto Albino), et alii sex cum eo.
Item, anno eodem dominus Mauricius filius Nicholai, per Mauricium filium Thome comitem tunc Desmonie capitur et incarceratur; et infra octabas beati Francisci, in carcere, in dieta inclusus moritur.