1328.
Feria 3 post Pascha, Nonas scilicet Aprilis, obiit dominus Thomas filius Johannis, comes Kildarie, justiciarius tunc Hibernie, apud Maynoht.
Item, die Martis pridie Idus Aprilis anno eodem, occiditur apud Bargum, Willelmus filius Johannis de Rupe, cum aliis malefactoribus, hominibus et consanguineis suis, de loco Predicatorum extractis.
Item 11 Kal: ejusdem mensis et anni, occiditur Petrus Poer, filius et heres baronis de Donhulle, cum aliis de cognomine suo circa 12, per familiam domini Mauricii filii Thome; et illo die occiditur dominus Johannes filius Geraldi, in eodem conflictu.
Item, eodem anno, 5 Kal: Junii, in vigilia Trinitatis obiit dominus Willelmus de Sancto Leodegario.
1328, capitur et occiditur in vigilia vigilie beati Mathei apostoli Johannes filius Benedicti le Poer, dominus de Rahtgormocke et Kylmydan, per Cantitonenses; et cito post obierunt Katerina filia Mauricii, uxor ejusdem, et heres eorum, apud Ros.
1328. Edwardus rex Anglie (post conquestum) tercius, fecit fratrem suum (Johannem de Eltam dictum), comitem Cornubie, dominum Rogerum de Mortuo Mari, comitem Marchie, et dominum Jacobum le Botiller, comitem Ermonie.
Item, 1328, circa festum Michaelis, Willelmus de Burgo comes Ultonie, in Anglia educatus, cum Matilda uxore ejus, filia domini Henrici comitis Lancastrie, et consanguinea ipsius, ex dispensacione curie disponsati, quia erant in
1328. Dominica in crastino Agnetis secundo, obiit dominus Johannes le Poer, baro de Dunhulle.
Item, eodem anno scilicet ultimo die Februarii, die Martis, combustum est Cumbyr, per dominum Willelmum de Brimegham.
1328. 2 Idus Martii, die scilicet Martis ante festum Patricii, obiit Dublinie dominus Arnaldus le Poer.