1318.
7 Kal: Aprilis, canonizatur Lodowicus episcopus et confessor de ordine Minorum, archiepiscopus Tolosanus, filius et heres regis Cicilie, a Papa Johanne 22.
Item, duo cardinales in Angliam mittuntur pro pace formanda inter Anglicos et Scotos, sed nil profecerunt.
Item, eodem anno, dominus Willelmus filius Johannis, episcopus Ossoriensis, transfertur ad archiepiscopatum Casselensem; cui substituitur frater Ricardus Leddrede, per Papam Johannem consecratus Avinnone; ubi pro tunc degebat curia Romana, scilicet, 8. Kal: Maii.
Item, eodem anno, id est, 1318, a festo apostolorum Philippi et Jacobi usque autumpnum, fuit maxima caristia et fames, unde multi et innumerabiles moriebantur; nam cranocus frumenti ut communiter pro xx. solidis et amplius vendebatur.
Item, Thomas Don, multarum navium depredator, subversor, et pirata crudelis de parte Scotorum, occisus est.
1318. 5. Idus Maii, occiditur dominus Ricardus de Clare per suos Hibernicos de Totmonia cum aliis 4 militibus, domino Thoma de Lesse, domino Henrico de Capella, dominis Jacobo et Johanne de Canteton, et aliis multis, die Jove in mane.
Item, Capitulum de Ros, in festo Bartholomei apostoli.
Item, in festo Michaelis proximo sequenti, applicuit Alexander Byggenor de Curia, archiepiscopus Dublinie factus, et justiciarii nomen et officium habens Hibernie.
Item, eodem anno, 1318, in festo beati Kalixti pape et martyris, die Sabbati mane, occiditur dominus Edwardus le Brus (usurpans sibi nomen et vocari a suis se faciens regem Hibernie), apud Dundalke, per Johannem de Brimegham, et Milonem de Verdona cum Scotis multis.
Item, eodem anno, occiditur apud Ros, Gilbertus de Rupe (justorum occisor, et fidelium depredator) per burgenses de Ros.
Item, occiditur dominus Johannes de Lyvet, per Tolonenses, et O'Nolanis.
Item, circa festum Epiphanie interficiuntur per O'Nolanos, Petrus de Recheford, et Oliverus filius David le Grasse, et alii circiter 80, de exercitu domini Arnaldi le Poer, qui ductor erat et princeps eorum.