A h-ui Chuind a Chormaic ol Carpre. Cia dech do rig. .Ní. or Cormac.
ar is tria fhir flaitheman dobeir Dia in sin uile.
- Ainmne cen debaid.
Soacallma cen mordataid
Deithitiu senchasa.
Fritholaid fhína.
Géill i n-glassaib
Slogad ri deithbere
Fir cen fhuille.
Trocaire co n-dluthud recta
Síd do thuathaib.
Ratha écsamla.
Bretha fíra
[gap: left vacant/extent: 1 line]
Morad nemed
Airmitiu fhiled
Adrad De móir
Torud inna fhlaith
Deicsiu cach thruaig
Almsana ile
Mess for crannaib
IAsc i n-inberaib
Talam torthech
Bárca do thochor i port
Allmaire sét.
Murchoirthe dílse
Etach sirecda
Drong claidebbemnech
Arcometa a thúaith
Forrana dar crícha
Torramad eslánu
Lessaiged triunu
Tectad fír
Cariged gói
Baded bidbadu
Bered firbretha
Biathad cech n-ái.
Uaged cach síd.
Lessaiged a anmain
IMmad fína. sceo meda
Canad cach fír.
A .h. Chuind a Chormaic ol Carpre. Cade cóir recta ríg.
Recht fallnaither ar talmain truim tathum at-chous duit ol Cormac.
- Congbaid máru
Marbaid ulcu
Moraid mathe
Troethaid foglaide
Argreind gait
Coraigid coibnius
Codnaigid síd
Clannaid dliged
Coscid indliged{folio 343b}Doeraid bidbadu
Soeraid enngu.
Angid idnu
Conrig essidnu
Focraid foglaide.
Lándilsi do cach laim la fiachu.
Comlúth re lanfiachaib.
Fis lethfhiachaib.
Anfis co cátu ríg.
Co fursmaltaib flatha.
Conoige dliged
Techta cech fhír do neoch as leis.
Muir & tír. foltaib fíraib do thuathaib a les cintaib láime.
Forshilliud co silliud sula la cintaib bél
Étsechtaib cluasaib
Co firaib cuibse
Lerigider cert cech cind.
Airecht dorimmairg cech recht ar it e.
Tecta flatha in sin fri tuatha.
A .h. Chuind a Chormaic ol Carpre cia dech do les tuathe. Ní. ol Cormac.
A n-as dech do les tuathe in sin.
- Terchomrac degdaine.
Dala mence
Menma athchomairc
Fochmarc do gaethaib
Airdibdúd cech uilc.
Comollud cech mathiusa
Airecht ríglach.
Sechem senchais.
Senad rectaide
Rechtga la flaith
Toisech firian
Cen fhorbrisiud truag.
Commaid chairddine
Trócaire co n-dagbés
Dluthad coibniusa
Comollud recta
Recht senchairde
Cotach cen irchaire
Fíanna cen diummus
INire fri naimtiu.
INruccus fri brathri
Ratha fiala
Aithe shlána
Bretha fíra
Fiadain inraice.{folio 343c}Astud cundruda cen diupairt
Fulliud diuperta
Folaid chutrumma
Airlicud éim
Geill do inchaib
Iasacht follan
Oín fri toich Cubes cach maith
Taithesc miadchar
Messair dilmain
Foglaim cach dana
Eolas cech berla
Druine cech brithemnais.
Tacra co fossugud
Brithemnas co roscadaib.
Gella fri bretha
Nadmand inraice
Eitsecht fri sruithe
Buidre fri daescarsluag
Lessugud criche.
A .h. Chuind a Chormaic ol Carpre Cad iat ada flatha & cormthigi. .Ní. ol Cormac.
It iatsin ada flatha & cormthige.
- Costud im dagfhlaith
Lassamna do lochairn
Luthbás i sochaide
Samugud suide
Soichlige do daleman
Dianlám oc fodail
Fochraibe oc timthirecht
Tigerna do charthain
Mesrugud senma.
Reclugud n-gairit. .i. scela gairddi
Gnúis fhailid.
Failte fri dáma.
Feidle fri comad
Cocétlai binne.
A .h. Cuind a Chormaic ol Carpre Cid asa n-gaibther flaithemnas for tuathaib & clannaib & cenelaib. .Ní. ol Cormac.
- A feib chrotha & ceniuil & ergnai.
A gaís & orddan & eslabrai & inruccus.
A feib duthchusa & airlabra
A n-nirt imgona & sochraite gaibther.
{folio 343d}Ceist. Cade tecta na flatha .Ní. ol Cormac.
Ar is triasna techtaibsin miditir ríg & flathi ol Cormac.
- Rop sobraig
Rop saigthech.
Rop soaccobrach
Rop soacallmach
Rop becda.
Rop morda
Rop dian.
Rop fossad
Rop fenech.
Rop gartaid.
Rop sognassaid.
Rop máeth
Rop cruaid.
Rop carthach.
Rop fírían.
Rop ainmnetach.
Turgabad lubair
Bered fírbretha.
Biathad cach n-dilliucht.
Miscniged goi.
Carad firinne
Rop dermatach uilc.
Rop étsid cech mathiusa.
Rop slúagach i n-dálaib.
Rop uathad i sanasaib.
Rop sorche fri gnáis.
Rop grian tige midchuarta.
Rop airitid dala .& airechta.
Rop sercaid fis & ergnai.
Rop cundrigid coisc caich bes
[gap: illegible/extent: 3/4 letters]
Miastar cách iarna tochus.
Dobera a thechta do chach
Rop dluthe a nadmand
Roptar lacsa a thobaig.
Roptar aithe etrumma a bretha & a chocerta.
A .h. Chuind a Chormaic ol Carpre Cia bátar do bésa in tan ropsat gilla. .Ní. ol Cormac.
- Basa costechtach caille
Nipsa descenach rainne.
Basa thó fhásaig.
Basa labor sochaide.
Baso shulig midchuarta.
Besam dulig irgaile.
Bam solam d'fhoraire.
Nipsa rochruaid.
Nipsa roirusa.
Nipsa rothim
Nipsa melcend.
Nipsa tromda
Basa gáeth.
Nipsa fhorlob
Basa thrén.
Basa lúath
Nipsa airrechtach
Nipsa fomsech.
A .h. Chuind a Chormaic ol Carpre Cia batar do gnima intan ropsat gilla. Ní. ol Cormac.
A .h. Chuind a Chormaic ol Carpre cia messam latt atchonnac. .Ní. ol Cormac. Gnúsi namat i cath.
- No gonaind muic i m-biind m'oenur.
No chingind i curi choicir
Basa oirgnech imsa dechenborach.{folio 344a}Basa inrectach imsa fichtech.
Basa cachtach imsa cetach.
A .h. Chuind a Chormaic ol Carpre cia binnem let rochuala. .Ní. ol Cormac. Ilach iar m-buaid. Molad iarna luaig. ITge degmna dia h-adurt.
A .h. Chuind a Charpri ol Cormac. Ma contuase frim thecosc Ni tharda th'ainech ar choirm. na biad ar is ferr dín cloth oldas dín biid.
Ar is col i n-dálaib in domain. Uall cen trebad. Tete cen eocho. Olchobar cen choirm. Lactmairi cen bú. Masse cen [gap: erased/extent: 3/4 letters]
- Nirbat uallach manbat trebthach.
Nirbat sriangabrach cen eocho.
Nirbat olchobrach cen choirm.
Nirbat lactmar cen bú.
Nirbot massech mani bet caircha lat.
A .h. Chuind a Charpri ol Cormac Ma contuassi frim thecosc
Ar is cach lesc lond etaid suanach neóit deáith is miscais Dé & dóine.
- Ni chuitbe nach sen ciarbat ooc.
Na bocht ciarbat somma.
Na nocht ciarbot shúin.
Na losc ciaso luath.
Na dall ciaso feíg.
Na lobor ciaso thren.
Na borb ciarbot gáeth.
Nirbot lesc.
Nirbot súanach
Nirbot neóit.
Nirbot deaith.
Nirbot etaid.
A .h. Chuind a Chormaic ol Carpre. Cia etergén síl Adaim .Ní. ol Cormac.
- Gaeth cach fossad.
Firian cach fial.
Fedil cech ainmnetach.
Fissid cech foglaintid.
Fuarrech cech finechar.
Fáilid cach slán.
Suán cech slemon.
Serb cech borb.
Báeth cach trén.
Tibre cech mer.
Mucna cach mog.
Mórda cech n-dindba.
Imresnaid cech n-aneolach
Anbal cech anecnaid.
Ecal cech uamnach.
INraicc cech lobur.{folio 344b}Altromaid cech docraid.
Ál cach angtha.
Andgid cech ecal
Diupartach cech n-dindba.
Dalach cech cosnamach
Conchar cech saithech.
Solepthach cech surig.
Sétach cech selbach.
Slichtlethan cech saer.
Socherna cech setach
Menmar cach cainte.
Solam cech marcach.
Milis cech fír.
Serb cech gó.
Milbela druinecha.
Dodalacha drochmna.
Dodáil a maic.
Mairg oca m-biat.
A .h. Chuind a Chormaic ol Carpre. Et gabail
baíse cis lir. Ní. ol Cormac.
- Lugi ria m-breith
Bretha diana.
Duscud ferge
Folabrad guach.
Cairigud fír.
Frithecht derthaige
Tintúd breth
Brón oc fleid
Flaithem guach
Gaíre immorro sen.
Senchas do chleith.
Cluiche for aill.
Erchor cen chommus.
Comrith fri baeth.
Morthu fri ríg
Recht cen chomollud.
Comall cech uilc
Olc fri carddine
Cétlud fri cách
Gel cech nua.
Nama cech gnáth
Gním cen fhiadnaisi
Fiado tláith.
Turtugud breth
Bith cen sheotu
Arlicud il
Ilar carat
Brón fri ríg.
Rolabra cen gaís.- Dligid ecna airmitin
Arfich gaes gail
Tomtenach cech n-uamnach
Torsech cech sercach
Gnimach cech gallrach
IMresnach cech guach
GAibthech cech báeth
Baeglach cech labor.{folio 344c}IMgonad cech lond
Trebar cech trebthach
Triamain cech drochlaech.
Anbal cech rudrach
Uathmar cech ecal
ISel cech athech
Collach cach sámach
Discir cech dona
IMuamnach cech cintach
Ecal cech fattech
Cosaitech cech dotheng.
Án cech cetludach
Dunadach cech dagthúath
Sétrech cech saigthech
Suabais cach dana
Eslessach cech brass
Guach cach tairngerech
Saisil cech brontach
Cuitbide cach denmnetach.
Athissech cach comsid.
A .h. Chuind a Chormaic ol Carpre. Cia etergen mná. Ní. ol
Cormac.
Ni bia ainech na h-anim na cloth ac neoch contuasi ri drochmná.
- Etargleim & nis etargleim.
Serba sirgnási
Morda tathigthi
Drutha follaigthi
Baetha a comairle
Santacha tormaig
Aigde aisnise
Debthaig frecnairc
Freslig roscelaig
Cailte digbala.
Feidle miscsen
Dermatcha seirce
ITfaide toile
Deithite cairddine
Cundamna ecnaig.
Ecundla airechta.
Airrectai ugrai
Etairisi rúne
Rudracha tathe
Garechtga eoit.
IMaicsi taithlig
Torachtaig baíse
Brassa airnadma.
Airlama forgill
Foille foichlige
Soera ainme
Essoera ícci.
Consuidet nad comraicet
Ro mairnet nad aincet
Uallcha tochmairc
Écnaig miadamlai
Foille foimrimme
Taithe obrais.
Rigne celide
Diumsacha dagdóine{folio 344d}Doirche gusmara.
Dermatcha coisc
Cumnig immargaile
INire debtha
Diaride litha.
Broncha cormthige
Comnarta imresain
Enairte fedma.
Todiure ciúil
Etradcha lige
Tuillmecha augrai.
Cessachtaig biid.
Amairsi erlabra
Eitche trebaire
Tailce erlabra
Ána athise
Arrechtga freslig
Frithberta coemnai
Cumnig dichaemnai
Dimbeoda tinóil
Cetludcha báise
Beoda tingill
Tomtencha uilc
Santacha dala
Tromda coblige
Bodra forcetail
Dalla dagáirle
Docheille sochaide
Miancha blassacta.
Mina a tairberta.
Terca a tidnacuil
Tlaith a timgaire
Ainble a n-irnaide
Cumgi airberta.
Eolaig rebraid
Aneolaig réri
Rescacha rurit
Dulbairi torbai
Sulbaire espai
Snímcha cendmassi
Forcomat nad comradat
Adgellat nad firat
Dorairngerat nad chomallat.
Ro chollet nad iccat
Forfhodlat na tarcomlat
Ro nertat na dernat
Ad segat nad arget
Conscarat naro thinolat
Ro renat na tobget
Ro bronnat naro threbat
Fó cach tan tene.
Elca mila mna.
Maith fidbad cech rathe.
Mairg roda fomlig
Ferr a flescad a faenblegon.
Ferr a sroigled a subugud.
Ferr a tuargain a tatlugud
Ferr a tomtin a tairisi.{folio 345a}Ferr a troethad a turgorud
Ferr a n-digo a n-gradugud
A .h. Chuind a Chormaic ol Carpre. Cia etergén sína .Ní. ar Cormac.
- Mathair etha aig
Mathair saille snecta.
Túar fola fleochud
Tuar tedma tart
Andso gobél gaeth
Dech do shínaib ceo
Ferr a brathair bróen
Acht do muir ni thorthech torand.
Cia messam trebad .Ní.
Trebad do na crenar ainech no h-anim. Atá araile trebad as messom .i. uic. thuic. beir. tabair.
Item Cormac ad Carpre.
- Ní baga fri ríg
Ní chomris fri báeth
Ni chomtheis fri dibergach
Ni chomthana fri echta
Ni chria do shecht m-baethaib .i.
File la feniu.
Do m-nái. Do chimbid.
Do mesc. Do drúth.
Do dásachtach. Di ardd
Di airriusc.
Ni rimthige fri roth. na rout. na roilbe. Na romur. na baegul. na ga.
Ni dlutha écnach
Nibat tibre dala
Nibat bronach cormthige.
Nibat dermatach dala.
Nibat dochoisc
Nibat imresnaid fír
Nibat taithi neich
Nibat fos foglithe
Nibat cond ugrai
Nibat munigu debtha.
Ni thairngere nadot bé
Nirbat coibchech arnabat fiachach
Nirbat imgonaid arnabat melachtnach.
Nirbat comramach arnabat miscnech
Nirbat imresnaid arnabat cendscoilte.
Nirbat garg arnábat doblaíth.{folio 345b}Nirbat ugrach arnaba aicennach
Nirbat cotut arnabat dothcherna
Nirbat rogartaid arnaba aithe
Nirbat lesc arnabat meirb
Nirbat roescaid arnarbat doescair.
Nirbat debthach arnabat scarthach
Nirbat dochoisc
Nirbat ráth ar neoch arnaba eirse do chomaithech.,