Clanna Conchobuir mc Fhactnai .i. Cormac Cond Longas. Causcraid Mend Macha. Furbaide Bern.
{folio 331b}Findchad Find. Fiacha. Fiachna. Conaing. Maine. Follomon. Glaisne. a quo Cenel n-Glasne.
Cland Fergusa .i. Dál Conláid. et Dál Cethirn et Dal n-Áuluim. Dia fail Epscop Erc Sláine. Et Brenaind Birra. Et Corcu Áland dia tá Cainnech mc .h. Daland. Et Dal Connrach dia m-baí Ellim mc Conrach. D'oenbreith ructha Olom & Conri. da mc Fhergusa. et is amlaid rucad Conri & cluas Auluim inna beolu arna tescad de. Et Dál m-Buinni. et Mendraige.
Fer Céchech a quo Orbraige na h-Alle. & Orbraige Irruis.
Trí mc Medba ri Fergus dar cend Ailella .i. Ciar. Corc. Conmac. Ciar a quo Ciarraige Luachra & Ciarraige Churche. Ciarraige Ái. Ciarraige Chonmend. Corc a quo Corcomruad. Conmac a quo Conmaicne Cúle Tolaid. Et Conmaicne Ceniúil Dubain.
Mug Ruith mc Fergusa a quo Fir Maige Fene. Is é luid do fhoglaim druidechta co Símon druí. Et is malle doronsat in roith ramaig tic dar Eoraip ria m-brath. Isin bliadain ria cathugud ri Petar doronsat in roith ramaig.
Cacht ingen Cathmind ríg Bretan mathair Moga Ruith. Roth mc Roguill ron-alt is de ba Mug Ruith.
Da mc Moga Ruith .i. Buan & Fer Corb. Der Draigen mathair da mc Moga Ruith. Et mathair Chorpri Liphechair secundum quosdam. da shiair de Chorco Bairdni ó Dún Chermna.
Dron ingen Larine di Érnaib cétmunter Moga Ruith. Et ingen do Mug Ruith Tlachtga ut alii dicunt. Ros-torrchiset trí mc Simóin re tiachtain anair conid i f-fos ruc trí mccu dóib. Et issí tuc lee Coirthe Cnamchaille .i. fuidell ind ruith is é nod-briss. Dall cech oen non-faicfe. Bodar cech oen ra chluin. Marbh cech oen ris m-benfa.