Galenga tair & tíar. Ciannachta tess & túaid. Luigne tair & tiar et na cethri Delbna. Delmna Mór & Delmna Bec. i m-Mide. Delmna Ethra i n-iarthur Mide. Et Delmna Tire Da Locha i Connachtaib. Galenga dí Ciannacht cland Taidc mc Cein mc Ailella Oloim.
Sadb dí ingen Chuind Cetchataig mathair .uii. mc Ailella Uluim. Is dibside Cían athair Taidc. Is iat ro marbtha i cath Mucrima. La Lugaid mc Con et la Lugaid Lága mc Moga Nuadat .i. brathair a n-athar. ISseside ro marb Art mc Cuind i cath Mucrima.
Beinne Britt immorro issé ro marb Eogan mc Ailella. Conid ro marb Lugaid Lága fo chétoir. Tricha cét a m-Mumain ro bói Mac Con & .xxx. cet a l-Leith Chuind & .xxx. cet a Bretnaib immorro mc ríg Bretan .i. Beinne. Trí méich fo thri do grannaib catha tucsat leo dar muir.
Gabais Lugaid mc Con trá rige h-Erenn bái .uii. m-bliadna .xx. i r-rige coro n-innarb Cormac mc Airt. Et gabaisside rige h-Erenn co tanic nert Ulad fris. Coro n-innarbsat é i Connactaib iar m-brith a n-giall & iar n-denam na fledi dóib do Chormac i tuasciurt Maige Breg dia tarat gilla ríg Ulad in chaindel fo fholt Chormaic coro loisc co m-mór.
Tri mc Imchada mc Fhinnachta mc Ogomain m Fiatach .i. Fergus Dubdetach. Et Fergus Casfhiaclach et Fergus Foltlebor.
Luid Cormac co Tadg mc Cein ara tísad leiss do thabairt chatha do Ultaib. Tabar ferand damsa aire ar Tadc. Doberthar duit ar Cormac ina timchellfa do charpat chaidche iar m-brissiud in chatha do Maig Breg. Gebatsa ar Tadcg. Eirgsiu ar Tadc co Lugaid Lága & tuc latt é don chath. & bratimse duit in baile i fuigbe é 'na chotlud.
Et luid Cormac co fuair é 'na chotlud. Et impais rind in gai ria chride. Cia dogni seo ar Lugaid. Cormac sunna ar se. Dlige ar Lugaid messe. Is me ro marb th'athair. A héraicc damsa ar Cormac. Cend ríg i cath duit ar Lugaid. Gebatsa ar Cormac cend ríg Ulad. Fergusa Dubdetaich. Dobersa ar Lugaid.
Lotar na slóig co m-batar immorro Brug Meic ind Óc [gap: scribal erasure/extent: 4/5 letters]i Crinna cind chomair dóib. Et ni arlaic Tadg in cath do thabairt co matain arnabarach. IMtriallait co moch & niro leiced Cormac issin cath. Bái ar cul in catha i clud & a gilla osa chind. Et dorat Cormac a erred imme. & baí in gilla i r-rict Cormaic.
Dobeir Lugaid cend leiss & tasselbaid don gillu. Ní h-é ar in gilla cend in ríg acht cend a brathar. Dobeir cend aile lads. Ní h-é ar in gilla acht cend a brathar aile. Dobeir leis in tress cend. Inn éseo ar Lugaid. Ní hÉ ar in gilla. Dobeir buille de don gillu conic ro marb co torchair féin & coro laig nél fair. Ocus coro briss Tadc .uii. catha for Ulto in laasain. Co ránic Glais Nera i taeib Dromma Inasclaind. Unde Flannacán cecinit.
- Tadc mac Céin túaid i r-Raith Chró
ro briss .uii. catha i n-oenló.
for Ulto co rinna réim
o tá Crinna co h-Ard Céin.- Cath i n-Argetros lathach.
cath i Conach garg baethar.
cath Crinna cid dianid clú.
cath h-i Sithbiu ba saethar.- Cath Dromma Fuait fúaim fondmar.
cath carge cruaid co n-armgail.
for cert Conchobuir claidbig
condat é a secht samlaid.
Luid iar sain Tadc ina carpat iar n-dul na trí n-gai trít. & gilla leis. Et a mathair in gillai do Leith Moga combad é bad fhiad dó.
Ba nél immorro do Thadc cachra n-uair co ranic iar sein co Ath Cliath {folio 329a} & nir fescor cid andside. Andsin atracht Tadc assa niúl dedenach. Conid and atbert Tadc. Cid tancamar a gillai or se. Tancammar mór ar in gilla. In tucsam Temraig lind ar Tadc. Ni thucsam ar in gilla. Atn-aig Tadg bulli dó conid ro marb. Unde Cinaed cecinit.
- Forsind oencloich i r-Ráith Chró
tuttim na tri Fergussó.
dia n-erbairt Cormac is gle
ni chel a doe ar Loge.- Re Tadc ro memaid in cath.
is ó Chormac dorrograd.
im sé chatha co n-gail géir.
o tá Crinna co Ardd Céin.
- Nenaisc Tadc a chor far sein.
for Cormac recta rogil.
ma chuit i m-Bregaib cen brath.
dia ternad assin morchath.- Mani throethad a ara
ro festais a morgala.
ropad re Temraig tir.
resfed carpat a da rith.
Iar sin doberar dias eórna la Cormac i crecht dia crechtaib. & duirp i crécht aile. & gae i crecht aile. Coro chnessaig tairsiu. & co m-bái bliadain i s-sirg. Luid Lugaid Laga úad ar cend ind fháthlega sin Mumain.
Ticside cona thrí daltaib leis. Cocualatar éigem ind fhir ic tiactain dóib dochum in tige. Cia h-égim seo ar in liaig. Cnet do chulg ar in dalta toesech. Craét so doridisi ar in liaig. Cnet do míl beó ar in dalta aile. Craet so dano ar in liaig risin tress cneit. Cnet do rind ar in tres dalta.
Dogní in liaig a leges & oslaicid na crechta. & dobertar baicc taris. Et dergthair coltur iar sain i tenid et dober in liaig ammus de for broind ind fhir. Co tanic in días eorna & in duirb mét lochad & in gai & cech a m-bái and archena.
Luid Tadc i m-Mumain et triallais cath do Chormac & dogniat síd.
Tadc dano dá mc leis .i. Conla & Cormac. Conla sen Ciannachta. tess & tuaid. Et sen Éle Muman. Cormac Galeng sen Galeng tair & tiar & na Satne.
Murcherddach m Taidc m Conduib m Mael Fhabaill m Innergi m Mael Temin m Dathgiusa m Lachtnain m Fhuluda m Concellaig m Conla m Luthlaetachta {folio 329ab} m Crechain m Dubain Ciannacta m Fhind m Findcháin m Feicc m Fhindchada m Fulig m Conla m Taidc m Céin.
Dubgall m Cele m Cummascaig {folio 329b} m Urddaig m Tigernaig m Oengusa m Ailella m Cind Faelad m Gertaide m Cronain m Tigernaig m Ailella m Echach Binnig m Dubthaig m Bresail m Fhiachach m Conlai. m Taidc.
Echthigern m Flaind m Echthigirn m Oengusa m Mail Maire m Bresliain m Echach m Mael Dúin m Eodusa m Ailella.
Conla mc Taidg. Da mc leis: Fianchad Dulach et Fiacha.
Findchad m Findchada Ulaig. Is é tóesech ro gab Glend Gaimen. Oct meic leis .i. Fiacha. Etchu. Echen. Fergus. Cassoin. Sobarnach. Coartach. Find.
Cóártach m Loscibet. Bancháinte do Chiannacht Glinne Gaimen do Cheniul Fhergusa m Lemna m Caelboth dobert tír dó atberar Cuartaige de.
Fiacha mc Conla immorro is uadside Cland Fhiachach.
Domnall m Maicnia m Mael Chosc m Domnaill m Maicnia m Tuathail m Eodusa m Ailella m Cind Faelad.
{folio 329c}Maelodor m Ifernain m Canacain m Denmnetaig m Caracain m Ruadin m Dathgiusa m Lachtnai.
Cormac Galeng m Taidc. Uair ruc gai Taidc leis dochum na m-brocc co tancatar for einech Taidc immach. Unde Galenga nominantur.
Ego autem puto eos immánitate fúmi caloris igniti cogente foras tunc uenisse. Et nec mirum si gentiles putarent eosdem fores praeclari
Domnall m Rigbardain m Con Chorne m Máinaig m Cerbaill (cuius filius Gilla Patric.) m Dublaige m Cnamín m Mainaig m Sechnasaig m Angida m Mael Ruanaid m Ultain m Lonain m Indig m Féic m Táil {folio 327d} m Meic Caire m Arad m Druad m Éli Rigdeirg m Imchada m Eirc m Sabarnaig m Findchain m Fheic m Findchada m Conlai m Taidc m Céin.
Broen m Gillai Brigti m Cuilen m Clerig m Cennetig m Algenain m Mael Ruanaid m Ultain m Lonain m Binnig.
Leocan m Laidgnén m Maelain m Ecnig m Dunchada m Cinaeda m Leocain m Dondgaile m Concobuir m Noendenaig m Mael Mona m Adamra m Dechraig m Dergthosciúil m Airt Choirp m Loi m Cormaic m Taidc m Cein.
H-ír octauus filius Militis qui cum uenissent filii Militis in Hiberniam mortuus est & in Sceliuc postea sepultus est. De quo tertia pars regalis generis Hibernie nata est. IR autem unum filium habuit id est Eber. Éber filius Ir qui ante omnes Scottos Campu(m) Lini & quintam partem Hibernie tenui(t).
Da mc la h-Éber .i. Artrí & Ebric. Dorochair Eber la Palam mc h-Erimoin. Ebric mc Ebir da mc leis .i. Cermna & Sobairche. Dá chetrí h-Erenn a h-Ultaib. Accu doronta na da dún .i. Dún Cermna & Dún Sobairchi.
Eocho mc Conmail a m-Mumain ro marb Cermna na dun nó in bello.
Eocho Echcend rí Fomore ro marb Sobairche. Ni ínnister clanna Cermna & Sobairchi.
Art mc Ebir oenmc leis .i. Setna ardrí h-Erenn conic ro marb a mc ut alii dicunt. .i. Fiacha Fínscothe .i. Rothechtaid mc Mane mc Oengusa Olmugaeda do shíl h-Erimoin. Ro marb Setna Art i Cruachan eter dí láim Fiachach Finscothe a mc fodesin. Conid airesin ro marb Fiacha Finscothe i n-digail a enig.
Ollam Fotla mc Fiachach Finscothe mc Setnai mc Airt mc Ebir m Ír m Miled Espain. Is ó Ollomain ainmnigter Ulaid .i. Ulaid Olleith ó Ollomain nó ulcha liatha leo i cath Oenaig Macha .i. oland líath ro cenglad dia smechaib. nó Ulaid .i. ulliu léith leo issin chath.
Ollam Fotla tra is leis dorónad feis Temrach ar tús & is leis doronad múr n-Olloman i Temraig.
Ollam tra bái .x. bl- i r-rige h-Erenn & gabais mórfeisiur dia chlaind ríge h-Erenn cen nech etarru.
Ollam .iiii. mc leis .i. Carpre & Finnachta Slanoll & Gede.
Rudraige mc Sithri mc Duib mc Fomoir mc Argatmair mc Sirlaim mc Find mc Blatha mc Labrada mc Corpri mc Olloman.
Argatmár úa dó Cimbaed mc Fintain mc Argatmáir.
Aed Ruad mc Báduirn mc Argatmair.
Dithorba m Dimmain mc Argatmair.
Is uad ríge cone chlaind.
Rudraige it iatso a mc .i. Congal Cláringnech.
Cathbath drúi. Bresal Bódíbad. secundum quosdam. quidam dicunt eum esse Lagnensem. Mac Rosa mc Rudraige .i. Fergus mc Rosa.
Fer Filed mc Glais mc Rosa.
Celtchair mc Uithechair mc Fothaid mc Fir Fhiled mc Glais.
Ferchertne file mc Oengusa Beldeirg.
ILiach mc Loegaire Buadaich mc Connaid m Ili
[gap: illegible/extent: 3 letters]
ach.
Mál mc Rudraige Lett.
Fergus mc Lete.
Illand mc Fergusa.
Gergend at[gap: illegible/extent: ? letters]
Cass cuius filius Factna Fathach.
Bricre mc Carbad mc Caiss. Athirne mc Athchló. Errge Echb[gap: letters lost through fracture of margin/extent: 2 letters]el m [gap: letters lost through fracture of margin/extent: ? letters].
Coic ríg fhichet de Ultaib ro gabsat ríge h-Erenn cenmothát na sect rig ro gabsat de Dál Fiatach {folio 330a} daig is do chlaind Oengusa Turbig do Dal Fiatach & do chlaind immorro Ollaman Fotla do Ultaib .i. do Dal Araide. Daig is iatsin na fírUlaid far fír.
Is iatso immorro na ríg .i.
It iatso immorro na rig ro gabsat o Chimbaeth co Conchobor.
Secht primfhlathi di Ultaib im Chonchobor mc Nessa. Bá rí h-Erenn dano Fergus Dubdetach docer i cath Crinna. Ba rí h-Erenn dano Eochu Gunnat. Ba rí dano Fiacha Find. Ba rí dano Daig. Ba rí Muridach mc Forgo. Ba rí h-Erenn & Alban Baetan mc Cairill. Giallais Aedán mc Gabrain dó i r-Ross na Ríg i Semniu. Is dó ro cet ic brith chisa Muman dó fothuaid.
Et is leis glanta Manand. & issin dara bliadain iarna éc dolléicset Gaedil Manaind.
- IS mór do mílib{folio 330b}fichet
o Dún Baetain i l-Lethet.
IS cían do thír. már do muir
etarru is Imlech Ibair.