Ic h-Erímon tra condrecat na teora Connachta. & h. Neill in tuascirt & h. Neill in descirt & Airgialla & na Dési & Laigin & Ossairge. & Éraind. & Orbraigi. & Fotharta. & Dal Riata. & Dal Fiatach. Et rigrad Alban. Et Síl Conaire & Cland Oengusa & Fergusa & Loairn tri mc h-Eirc. Et Síl Conaire i n-Albain & i nh-Erinn .i. Muscraigi & Corco Duibni.
Ic h-Éber condrecat na secht n-Eoganachta & Lemnaig Alban.
Ic h-Ír condrecat Síl Fergusa & Conaill & Celtchair.
Ic Oengus Turbech condrecat Ulaid & Albanaig & Ernai frisna clanna remaind.
Ic Niall condrecat .h. Néill in descirt & in tuascirt. & uii. fini Temrach .i. Conall. Colman. Eogan. Aed Slane. Tethba & Cairpre. & Cenel n-Ennae & Loegaire.
Ic Eochaid Mugmedón condrecat .h. Neill & Connachta.
Ic Carpriu Liphechair condrecat Airgialla & h. Meic Cuais fri Ú Néill & Connachta & Corco Roidi fri Claind Cuind.
Ic Aed Findlíath condrecat Cland Néill & Cland Domnaill.
Ic Feidlimid Rechtaid condrecat Fotharta & na Dési fri Claind Cuind.
Ic Ugaine Már condrecat Lagin & Ossairge & Cland Chuind.
Ic Bresul Bricc condrecat Lagin & Ossairge.
Ic Bresul Belach condrecat .h. Fhaelain & .h. Dunchada & h. Muridaig fri Uib Censelaig.
Ic Cathair Mór condrecat .h. Falgi & h. Enechglais & h. Bairrchi. & h. Crimthainn & Clanda Cathair archena.
Ic Diarmait mc Cerbaill condrecat Cland Cholmain & Sil Aeda Slane.
{folio 318c}Ic Flathbertach mc Longsich condrecat Cenel Conaill .i. h. Mael- Doraid. & h. Chanannain.
Ic Cund tra fodlaiter saerchlanna Sil Chuind. Et it fortuatha Síl Chuind cach oen nach berar genelach co Cond eter noebu & rigu. amal atát Lugni Delmna. & Galenga & Cianachta.
Ic Cathair dano fodlaiter saerclanda Lagen & it fortuatha cóicid Cathair cach oen na berar genelach cu Cathair amal atát Laigsi & Fotharta.
Ic Ailill Ólom fodlaiter saerclanna Muman. & cach oen nad berar genelach co Ailill Ólom. It fortuatha Síl n-Echach Múmo amal atát h-Eraind & Ciarraigi .&c.
O Lugaid mc Itha immorro Corco Laigde & na Callraige.
It é sin tra sathge saerchland h-Erenn cona fodlaib eter scarad comrac .i. ó h-Ebiur & h-Erimon. o Ír. ó Lugaid.,
Conaille Murtheme do Chlaind Chonaill Cernaich dóib .i. Dál Runtar & Dál n-Imda i Cualngiu. & Glasraige .i. Glass & Runtar & Imda trí mc Conaill Chostamail. A ingen fein ruc dó na trí mcsain .i. Creidne banfhennid. ingen Chonaill Chostomail a m-mathair. Ba rí dano cóicid Choncobuir in Conall Costomail. Ba athiss immorro lais a ingen do breith na m-mac dó. Bretha na mcc úad i n-immull a fheraind & a cheniúil. Is moti dano ra chuir úad ar ecla na rigna .i. a mnaa féin .i. Aife. a ainm na rigna. Bái dano cocad mór eter in rigain. & Creidne. Luid Creidne iar sain for fennidecht d'fhogail fora athair. & for Aífe. Dobert a mc sechtar bunad a ceniúil ar ulc ra n-athair. Trí nonbair di for longais. Cúlmong furri. Cumma no fhiched de muir & tír. Secht m-bliadna di for longais. eter h-Erind & Albain. Dogní iar tain síd fria h-athair. Et atbert saide fria tré fhastini .i. in tír i rucait do meicc bid acut. & bid rit chlaind co brath. issed ón ro fírad.
Conall Costamail m. Fhianchada m. Oengusa m. Gaith. m. Enbláith m. Rochada m. Iriéil Glunmair m. Conaill Cernaig m. Amargin.
Caulnia & Condluán emon ruc Lebarcham ingen Oe & Adarce do Choin Chulainn. Is dib Corco Caullain & Dal Cualni i Cruithniu