Is i in dara speir tar eis na speiri lanmoire & is foicse na hi don talmain Stodiace .i. speir na comartadh & ata leis gan retlanna mar adubrumar an speir lanmor da beth, & gluaissidh o oirrcer co h-iartar an domuin mar gluaises si. Et da sailidar na h-arsanta gorab i so na nai speir ele & gorab cercall da cercallaib na speiri lanmoiri hi & scrisaidh Tolameus an baramail so a na lebar fein & adeir co fuair idir an speir lanmoir & Stodiacus 'na creasaib & 'na pollaib spas fada, oir fuair pol tuaiscertac Stodiac a
Et as i cuis fa n-dobart na h-anmanna so .i. Airgeis no Taubhrus, Leo etcetera, ar comartaib na Stodiace, ar son co ticid na h-airdrinnaigh a speir na retlann ar comair na codac sin da Stodiace ar a m-bi Airgeis no Tabhrus mar ainm, le cuma & le naduir na n-ainminntedh cedna againne annso, & gidedh ni fuil cruthugad is in doman a Stodiace, oir mar adubrumar, ni bi retla ann.
Et darinneadar na feallsamain da chuid deg da Stodiace & adubradar comarta re gac cuit da rer anma & fidrach an raeda bis fai an comartha sin is in line direc a speir na retlann . Et darinneadar mar sin da chuid deg don bliadhain da rer an da comarta deg sin na greine & adubradar mi re sibal na greine an gac comarta dib & do muinedar na feallsamain as sin examlacht na h-aimsiri da beth ann da rer sibail na greine o comarta co comartha & da rer a h-ardaithe & a h-islithe, oir an trat tet grian annsa ced ponc d'Airgeis tic exinocsium ann .i. comhtromacht lae & aithe & is annsin tinnscnus an t-errach; & ni teit as no co m-bi grian a n-Gemen & in trat teit grian a Cainnser as annsin as tosac don t-samradh. Et ar m-beth di annsin a mullach a speiri thuas, teidhid an grian co mor agaid na talman & ar tiact di co ponc derinac Uirgo, cuiridh cric ar in samradh.
Et as i cuis dabeir co m-bi geimread ann as fuaire na celi & geimreadh as flichi na ceili & geimridh as tirma na celi & samradh as teo & samradh as tirma na ceili ann .i. as i an grian doni earrach & samrad, fogmhar & geimredh & donit na plaineid ele na h-aimsera cedna. Agus an trat tic samradh na greine ann & bid na plaineid eli a comartha a n-geimrid fein, bit acmuinn mor fertana & fuachta is in t-samradh & an trat tic geimread na greine & bit na plaineid eli is na comarthaib foillsiges a samradh fein, bith gaeth & becan fertana & fuachta is in geimread sin co h-airithe, & is mar sin do na h-aimseraibh eli & is i sin cuis teasa & fuachta, tirmaigachta & flicha ceithre n-aimser na bliadna .i. da rer imteachta na plained a comartaib an Stodiace mar d'ordaidh an tuismighteoir benaithi fein iat.