Corpus of Electronic Texts Edition
An Irish Astronomical Tract (Author: [unknown])

Caibidil 27

Constat quod quatuor spere lune etcetera.

.i. Ceatra cercailli innsit na h-eolaid da beit ag an re; an ced cercall acu re n-abur in speir mhor & le na roluas fein impoidh si le an re en cuairt ris in la co n-aithe a timcill an domhain & dabeir air eirgi thoir & dul fai thiar annsa chuairt sin.

Et muna gluaisidh an speir mhor so an re en cuairt o oirrcir co h-iartar an domain re la co n-aithi mar adobrumar dacitfi e gac n-en la & gach n-en aithi gan folach on taca da bedh se ar a prim thiar, ac dul sair tar eis a ceili no go m-bedh se fo deredh a medhon na mis toir an oirrcir an domain. Et ar n-dol fai annsin da bedh se ar na folach do lo & d'aithi no co n-eirgidh tiar ar a primh aris a tosac na mis ele. Ma sedh as e gluasacht na cercailli moiri

p.110

noch adubrumar beres an re leis risan la co n-aithe o oirrcear co h-iartar an domain, gidedh as o iartar co h-oirrcer an domhain ata gluasacht direc an re fein & is follus gorab ed, oir an trat bis an re ar a primh tiar dacimid e gach n-en aithe ag drut sair tar eis a celi no go m-bi a n-oirrcear an domain & as e so gluasacht as nadurtha & is disli dho, oir as e so gluasacht na speiri a fuil se fein daingin, & in gluasact eli ut gluaises e o oirrcear co h-iartar an domain risin la co n-aithi, ni fuil acht gluasacht ainneonac minadurtha ann.

An dara speir ata ac an re darub comhainm speir cosmail re speir na comartad & an trat bis annsa speir so as follus e ac dul andsna comartaibh & astu, oir an trat teit d'innsaidhi na comartadh n-deiscertach as claenadh uata doni13 & gidedh ni facan cursad speiri na comartad co brac.

An treas speir ata ac an re re n-abur an speir sa sentrom ata let amuith da t-sentrom na talman & is fogus cuid di son don talmain & as lan fada an cuid ele uaithe, & as ar in cuis sin bis in re annsa speir sin, uair a fogus don talmain & uair ele a fad uadha & is o iarthar co h-oircer an domain ata gluasacht na speiri sin.14

Et is a corp na speiri sin ata speir bec eli darub ainm in speir impoides le anuas cum an re, & ata speir an re daingin dogluaisti annsa speir sin mar thairnge a clar. Et as gluaises an speir beac so annsa speir so 'na fuil an re daingin & an trat roites an re mullach na speiri sin adobrumar, luathaigid se a cursa. Et an trat bis an a ichtar, mallaidh se an cursa cedna & in trat mallaides dani raed egin impoid tar a ais siar mar da nit na plaineid eli & gidedh ni follus an t-impodh sin

p.112

mar as follus impodh na plained. Oir an speir sa seantrom ata don taib amuith da t-seantrom na talman tri na roluathi fein ag impodh an re leis, ni liginn an t-impod sin impodh an re tar a ais d'faicsin.

to face p. 112

Et dagen anois fidair d'foillsiugad na ceithre speir sin.