Corpus of Electronic Texts Edition
An Irish Astronomical Tract (Author: [unknown])

Caibidil 26

Degsamlacht soluis an re & na n-airdrinnach. A n-egsamlacht.

Dico qud Luna ac sidera etcetera.

.i. Aderim co faicter an re & na h-airdreannaidh a n-en uair & a n-en aimsir co solus a crit & co dorca a crith ele. Lucht na crite dachi iat co solus, as e dabeir orca a faicsin .i. an aitchi da leth dibh annsan aimsir cedna. An la baines da lucht na crite ele gan a faicsin & ni he cinta an lae dabeir sin acht anmainne radairc na n-dainedh . Et mar sin an cric an a foillsigter an grian, folaidter an re & na h-airdrinnaidh risin fad sin uirre, & an trat folaidter hi as i foillsiges iat san; & mar sin bis an tene & gach ni solus ele, ach ge fada uait iat san aite is aibsec a solus & ge mad fogus duit sa lo iat as anaibsec a solus. Ma sedh ma sailter let na h-airdrinnaidh d'faicsin sa lo, imid mocrach no tratnona a poll dorcha domain & fec os da cinn & dacitfir iat a mullach na firmaminti os da cinn co follus et dacithfir iat an uair eclipsis na greine co follus.

Dagen anois cercall amail cercall na n-airdrinnach n-daingean ina cuireabh imdenamh morain do na h-airdrinnacaibh mora. Daghen speir ele don taib astigh di sin amail speir na greine, an a cuireb an grian fein & dagen dan taib astidh di sin speir ele amail speir an re in a cuirib an re fein a cinn an deichmad la fichet o thosach an mi . Et daghen in cethramad speir don taib istigh dib sin & scribocad hi 'na sentrom & A 'na h-oirrcer & B 'na h-uachtar & C 'na h-iartar & D 'na h-ictar; & na ceithre cercalla beca ata ar cercall na talman ceatra


p.108

catracha tuicter asta & ceatra litreca foillsiges na ceithre catracha sin E an catair oirrcerach & F an catair uachtarach & B an catair iartarach & H an cathair ichtarac & mar sin an trat teit an grian fai, fagaidh a solus cathair F & tic tosach na h-aithi cuci & annsin as medon aiti a cathair E & dacit lucht na cathrac ele an uair sin na h-airtrinnaidh lansolus & an re ag erghi thoir lethsolus; & an trat roites an re cathair H, bit a mullach na firmaminte an tan sin; & an trat eirghes an grian toir don cathair sin, ni fedaid lucht aitrebta na cathrac an re naid na h-airdrinnaidh a faicsin. Et an trat roithes grian os cinn catrac G bith a mullach a cercailli & is annsin as medon lae ann & bith an re annsin sa let tiar don doman as cinn cathrac H & ni foillsigid na h-airdrinnaid a solus fein da lucht catrac G.

to face p. 108