Corpus of Electronic Texts Edition
An Irish Astronomical Tract (Author: [unknown])
Caibidil 2
Do na cethri duilibh & da n-inadaibh & mar da orduig an tuismiteoir iat.
Terre est in medio mundi etcetera
.i. ata an talam na ponc cruind a cert medon an domain mar mod liatroide cruinne, gan t-sustaint fai, ca congmail, & ata an t-uisci da rer naduir da gach aen leithe de na timceall & gideadh da tuismaidh an tuismiteoir an cuid tuas don talmain mar inadh aitreabtha do na dainibh & da na h-ainminntib nar fed beith beo fa usci. Et ata an t-aer 'na timchill ar aen. Et ata an tene 'na dimcheall a triur. Et ata an firmamint gach aen taebha a timcill an ceathrair sin.
Et as i so tuarascbail na ceithre n-dul sin .i.
p.10
tuarasgabhail na teineadh .i. corp te tirim loisgnech edrom silteach sogluasta fa fuil an t-aer. Tuarascbail an aeir .i. corp te fliuch siltec sogluasta, trom an aithfeghadh na teinedh & etrom a n-aithfeghadh an uisci. Tuarascbail an uisci .i. corp fuar fliuch siltec sogluasta, trom ac fecain an aeir & edrom ac fechain na talman, fa fuil an talamh . Tuarascbail na talman .i. corp fuar, tirim, trom dogluaiste ata fon domun uili & is mar sin as tusca an talamh na'n t-uisci & an t-uisce na'n t-aer & an t-aer na'n teine & in teine na'n firmamint oir as i an firmamint as imillige acu mar foillsiges an fidair so tis.
