De Febre Efemera .i. d'fiabhras efemera, & as uime aderar efemera ris .i. is inann efemeron a Greig & iasg a Laidin, uair ni bi acht en la nadurtha do shaegal ag an iasg sin. Et is mar sin ata efemera uera, uair ni mairenn acht en la, mas efemera fire he, & mas efemera nach fir mairidh co cenn tri la & co hannam co cenn a 4, in tan is remar in t-adbar.
Cura .i. leighis na heslainti so .i. mad tine no grian as cuis don fiabhras, curtur fer an fiabhris a n-inadh fuar, & gabtur ag a bualadh le hedaighibh lin, suas & anuas, do cur gaithe uime; & mad te in chuis doirter usgi te um a cenn & curtur a fotragad usgi fuar he, & anad ann co fada, & cumilter ola rosa do corp uile & ola na uiola. Et mad o saethar tig an fiabhras, gab prem artemesia, & bris & cumusc ar fin cael, no bruith ar anbruith, & ib & icid. Et gid be imcrus artemesia, ni curtur he. Et da roib nech curtha, & urbruith do genum d'artemesia, teid a cur de. Et da imchra duine agnus casti, ni faghann oilbeim & ni fuilighter air. Et ma curenn fer an tsibuil fada a croicinn de itir a lairgibh no da urgibh, cumilter buidenn uighi cerc te no fuar de, & is maith sin do lucht na olitre, & do braitrib teid a fad. Et mad o nemcodladh bis an fiabhras, dentur folcad don papauer, & do lactusi, & do malua, & cumilter na cosa ar tus le h-edach garb lin. Et mad o constipacionn bes an fiabhras, dentur clister do. Et mad isin gale bes, dentur sgethrach do, & denad abstinens no co ndileghtar an biadh. Et mad o dith bid bes, tuctur biad do, & co hairighti mad fer lenna ruaid [he], oir ni heidir leo trosgad do genum ar son ro-gere a tessa.
Opaid ar gach ule fiabhras ann so. ‘Frange ✠ tere ✠ ferre ✠ febre .n. salus est’ a t'ainm,(?) amail a cur sgribtha fo bragaid fir an fiabhris, & foirid gach uile fiabhras.
Ar gach ule fiabhras & eslainti nach leiginn codlad do duine, gab cinn ura & feoighe in papauer, & sil lactusi, & uiola & duilleogi rodus, & a cur a corcan no a n-oigenn lan d'uisge, & a mbruith no gu legaid na luibhe, & na cosa do nige as, & edach lin do cumilt co laidir dib, & ola na uiola do cumilt dib, & coideoluid gan cunntabairt.
Ar gach uile fiabhras & ar codlad, sgrib na focla so a tri h-ablann. ‘✠ Pater est alpha & oo,’ isin cet ablainn; ‘✠ filius est uia uita & ueritas,’ isin dara hablainn; ‘✠ spiritus sanctus est remedium sanitatis,’ isin 3 ablaind; & a nithe re tri la. Et in uair bias ag ithe na n-ablann so