Corpus of Electronic Texts Edition
An Irish Version of Gualterus de Dosibus (Author: Walter de Agilon/Galterius Agilinus)

paragraph 79

Pillide de euforbio folmuigid na leanna flegmatica silis on ceann cum na fededh agus is uime sin is imcubaid iad a n-aigidh na pairilisi, agus do-gabar a comsuigiugadh o Avicenna a n-a Anntitair fein.

Pillini cocie folmuigid na leanna o sialladhaibh na h-incinne, agus uime sin as imcubaid iad a n-aigidh epilepsia.

Paulinum aderar annti[d]otum magnum ria .i. leigheas comsuigigthi mor ris ar son go fuil brigh mor aige, agus foghnaidh go dilis a n-aigidh na cosachtaigi nua agus na sean-cosachtaighi do-nitir o linn fuar no o rit leanna fuair on cend cum an ochta. Agus is uime sin fognus a n-aigidh eslinní an cleibh do-nitir o linn fuar, agus glanaidh an cend agus in t-ucht agus in gaile o linn fuar co h-oirida agus o linn dub co tanaiste agus as i a dosis da dragma.