Et nod let curob inann leigheas dileagtach le fedtar adbar, eplipsia agus apoplexia agus emigrania o cuis fuair do dileagadh; gidedh dlegar nis mo do cur a n-dileagadh adbair epilepsia do pione agus ruib agus do bitone agus d'eigheann talman na do neithibh ele, agus mar an ceadna d'apoplexia, agus is leis an leigheas ndileagthach ceadna dlegar adbar emigrania fuaire do dileagadh; gideadh dlegar nis mo do policaria mor .i. millsean monad do cur ann na dona neithibh ele, oir as iat na luibhi curtar a cainndigacht is mo ann as daingne sa comsuigiugadh, agus is mo disleacht cum an inaigh a fuil an t-adhbar. Agus is uime sin curtar ni sa mo dibh ann na dona neithibh ele.