EUFORBIUM QUIDEM EST GUMMI arboris: .i. iseadh is euforbium ann guim croind fasas is in India cuireas gumamlacht8 trid an aimsire an tsamhraid agus ar teachtad n-a timcill claoclodtir a substaint euforbium hi.
Natura: te tirm hi ann sa cethramad ceim agus folmuigidh linn fuar go h-oirida agus linn dub co tainiste agus is uime sin fognus an aigidh gac uile artitica agus podagra agus seirigra agus ilica agus litargia agus na h-eplinncia. Agus na pillini do-nitir di fognaid an agaidh na parilisi agus da cumusgtir iat maille re spisraduibh examla fognaigh an aigidh na n-eslinn adubramar agus is amlaid as ferr hi a beith solus ur buide ag dol a nglaisi.
Dosis: as leor mar dosis as mo di o scrubul go leith scrubuil agus as i dosis as luga go cetrama scrubuil oir adeir Avicenna go marbann tri dragma di nech re tri la agus a creachtnugadh an gaile agus na n-innid agus dlegar pudar do ceandsugad le h-ola roisi.