AGARICUS EST SICUT FUNGUS: .i. isead is agairg and .i. ni bis a comaileas fungus agus ann sa Babiloin do-gabar e. Agus atait da gne air .i. gne ferrda agus gne bannda. An gne ferrda, bid foirm fada aige agus ni com geal hi risin ngne mbannda. Et bid an gne bannda di geal edrom so-bristi, agus bid cnapanaighi amuich agus astig innti, agus bith ni a cosmaileas ruainig innti. An gne ferrda bith continoidech agus ni bi com brisg na com geal ria sin, agus as amlaidh dlegar a togha .i. a beit geal so-bristi; agus ni maith an gne ferrda di, gidhidh adeir Avicenna gurob ro-olc araen iat. Is amlaid tuicter an rad so Avicenna sa talamh a roib se fein, oir do budh mailisach urchoideach ann sin hi, et do reir Iohanne Ebemisue is ro-tarbach an leigheas so, oir folmuigidh o gac ball do ballaib an cuirp a coitcinne.
Natura: te sa dara ceim hi agus tirm sa tres ceim agus folmuigidh linn fuar co h-oirida on gaile agus linn dub co tanaiste agus is uime sin is imcubaid e a cotidiana do-nitir o linn fuar nadura agus a n-aigidh disintiria no disuria do-nitir o linn fuar, maille re digh ar a mbeirbtir saxifrage .i. eigreim. Agus do togairm na fola mista maille re dig ar a mbeirbtir buafallan.
Dosis: as i med as mo dlegar do tobairt di ina aenar, no maille re leigheas ele co ceithre dragma; agus as i med as lugha dlegar do tabairt di o dragma go leith go dragma agus sul tuctar hi dlegar a certugadh le dragma do shudh licorisi.