Part 9 of A Treatise on Fevers

{TCD 1299 page and line 30a39} Fiarfaighter annso an fedann neach tesdail is na fiabrusaib gera a h-aitli an adbuir do dileghadh, do citer co fedann do reir Galenus is in leabar faethuigthi, oir adeir annsin co fedann neach tesdail an digbail na h-eslainti, & ni bind an digbail acht a h-aitli an adbuir do dileghadh , da reir sin fedaid neach tesdail a h-aitli an adbuir do dileghadh is na fiabrusaib gera. Item adeir Consantin a leabar na teoaircachta ¹⁶ co facaid se fein moran noch fuar bas a sdaid na fiabrus nger, & is annsa sdaid critigh an dileghadh do reir Galenus, da reir sin fedaidh nech tesdail is na fiabrusaibh gera a h-aitli an adbuir do dileghadh . Item adeir Galenus corob o anbainne & o digbail na brighi tig an bas, & ni fuil do iiii h-aimseraib na h-easlainti aimser in ab anbainne an brigh nan digbail na h-easlainti , & ni bind an digbail acht a h-aitli

an adbuir do dileghadh, da reir sin fedaid nech tesdail a h-aitli an adbuir do dileghadh is na fiabrusaib gera . Item adeir Galenus sa ii leabar do pronosticorum a comarthaib perplemonia co fedann an t-adbur beith dileghtha is in eslainti so, & nach fedtar a innarbadh, & adeir co fuilid da ni is ecin d'fechain cum na h-easlainti o ternaigter & in t-adhbur do beith dileghtha & nert na naduiri cum a innarbtha mar is tu , & fedaidh {TCD 1299 page and line 30b1} nech tesdail tri esbaidh an adbur d'innarbadh ach ge do beith dileghtha, amail is follus as perplemonia, da reir sin fedaid nech tesdail is na fiabrusaib gera a h-aitli an adbuir do dileghadh . Teagar an a aiged sin do reir Galenus in libro crisi noch adeir nach facaid nech do dul d'ec ag a mbedis comarthai an dileghtha co h-imlan. Freagramuid cum na cesti sin & adermaid nach fedann nech bas d'fagbail a h-aitli an adbuir do dileghadh do leth na naduire, & co fedann do leth na h-aicidi. Et fedaidh an aicid sin techt o tri nethib .i. o ainmes an leagha, no o easlainti eli do techt a cenn na ced easlainti, no seacran

do beith etir na brighaib, oir adeir Galenus da mbia seacran ar in liaigh & ar fritalamh an otair ullmaigi sin neach cum bais ge do beith an t-adbur dileghtha, & adeir Galenus da ti easlainti is in digbail, acht ge ma bec hi , go togairmenn an bas o secran na mbrigh, oir adeir Galenus da mbia an brigh innarbtach nadurdha & in brigh ainmidhi maille secran oibrighthi co fedtar an bas d'fagbail on tsechran sin .