Corpus of Electronic Texts Edition
De Amore Hereos (Author: [unknown])

De Amore Hereos

23. F. 19, fol. 110r, col. 1, line 27.3

1

¶1] DE AMORE HEREOS Adon don gradh re n-abar hereos & is inann hereos asin Greig & generosus asin Laidin & is inann generosus asin Laidin & uasal isin Gaedilg, oir is gnathach tiaghaid na baruin & na daine uaisli annsa n-easlainti so tri acfuind & a n-innmasa, & aderar filocaptus risin neach bis insin easlainti so & is inann filocaptus & neach bis a m-braighdinas ag snaithi 4, oir is mar sin bis fer na h-easlainti so a n-gill ag gradh na mna, oir sanntaighi an meidi sin i innus co creidinn gurab i bean is fearr foirm & fighair & bésa & geanmnaigeacht isin domun hi, oir do truaillid an brigh inntsamlaightach co mor aige ona smuaintigib melangcoilica innus gur treig a deghoibrigthi & a trocaire co huilidhi acht smuaintighthi na mna amain & bidh amail duine cuthaigh do reir Ouidius, noch adeir; ‘Omnis amans

p.178

cecus, non est Amor arbiter ecus’ .i. ni breitheamh comthrom in gradh & in neach aga mbi bidh dall.

2

Et is amlaidh so tic an gradh .i. aithnighi an brigh inntsamlaightach é don brigh re n-abar imaginatiua & gabaid in brigh re n-abar concusibilius é o imaginatiua & gabaid in brigh miresunta é o concusibilis & gabaid brigh gluasachta na n-airteredh é on brigh miresunta & gluaisigh an corp go h-uilidhi cum an gradha, & do beir tarcaisne a fuacht & a tes & a n-guasacht & bidh neamcobhsaigh (&).

3

IS iad so comartha in gradha .i. neamthsaint bidh & dighi & becan collata & truaighi an cuirp co mor a n-egmais na sul & bidh smuintighthi doimhne acu & bidh caimenach toirseach dubhach, & {MS fol 110r2} bidh puls luath ard examail anordaightheach acu, & in uair do cluinid bindius no aithi ciuil bidh ac cai & ag toirsi, & an tan luaightear an ben ina fhiaghnaise ardaighter an pulsa & in tan dochid hi ardaighter ni sa mo na sin acu é.

4

& muna leighister an eslainti so teid a mania no go geibid bas.

5

LABRUM anois do leighes na h-eslainti so .i. fechadh in liaigh in duine resunta é no an duine miresunta , & masa duine resunta é curthar nech egnaighi da teagosc roim a mbia egla air & do beradh naire do briatraib do & goitfis an inntinn on imhaidh fallsa noch ata aigi & foillsighter ar d-tus do guasacht an t-saeghail & lae an breitemnais, & 'na diaigh sin foillsighter do gloir & subaltaiged na catrach neamda . Et masa duine og miresunta é bointer a edach de & gabthar air do sgiuirsighib & co ger no co n-dergadh a croicinn & no co n-gabad crith a baill & dentur bagar uilc is mo na sin air d'hfagbail dho . Et 'na diaigh sin gealltar onoir mor do no tigernus, oir claecluighter na droch-besa on onorugad , do reir Ouidius, & taburthar obair eigneach air asa h-aithle, oir adeir Ouidius na briathra so; ‘De uacue mente quo tuiatur opus’ & cetera—is tarbach in obair do tobairt arin menmain n-dimain. Et a h-aithle na h-oibre sin curthar é a crichaibh ciana & d'fhechain dathann & marand examla. Oir adeir Petagros curob tarbach a leighes na h-eslainti so pingtiuireacht

p.179

& datha examla d'fhechain & ainimhinnti bruideamla & tobair & sleibti & coillti & gotha en, & boltar neichedh n-deghbalaidh & a cosmaile. Et muna leighester é ona neichib so adubrumar curthar cailleach midealba ina fiagnaise maille re drochcruth & re drochedach & tabradh le edach ara mbia fuil idir a gluinib & abradh na briatra so re fer an gradha .i. is olc an ben t-suirghi ut ata agatsa, oir ata si meascamail brenalach & ata epilepsia uirri & do beir a fual fuithi ina leabaidh & ata croicinn salach gearbach aice, & abradh ris gach ni ele do cifidhter dhi fein & muna labra se re, tairngedh an t-edach ara fuil an fuil asa gabail & buaileadh h-e ina edan & abradh ris do guth mor : is mar so ata do ben t-suirghisi. Et muna leighester uada sin é ni duine ata ann acht diabal corpurda & ni leighester é co brath.5