Corpus of Electronic Texts Edition
Rosa Anglica (Author: [unknown])

Section 15

15

Item furtachtuighi aimsira na bliadna cum tuismighti na h-eslainti so oir teguid siad co minic isin fogmur o mailis an dilegtha, & na lennand; ar son osluicti na póiridh isin tshamhradh roime sin, ar tresi an tesa ar lar an tsamhraidh & a medhon láo, & tresi na fuaraidhechta na tosach & ina derigh: & teguid siad isin tsamhradh ar son diansgailti na lennand & isin geimred, ar son tresi na lennand fuar ag condmail in adbuir istig, & ar son a loighid innurbtur na h-imurcacha and sin on corp. Et is follus co teguid na h-eslainti so o aitherrach na sine, & fetuid lucht na h-idhan a radh and sin co tiucfa fertain & doineánd ni is taosca na tic si; & fiarfuigid sin co coitcind do leghuibh an cuis sin, is i so iú fregra .i. adeir Piloretus bail a mbi raod co claocluighenn an raod bhis and cum coimplexa an inaidh a mbínd se. Masedh an uair bis in aimsir co fliuch buaiderta ag techt, bid an táor ann sin arna claoclod cum fliuchaidhechta & arna remrugad & arna fuaradh, & arna buaidirt on cuis uachtaruigh. Et is comartha curub fir sin, oir bit na ballada & na clocha ar siled mar do bedis ag cur alluis dibh, & nib uatha fein sin acht on


p.330

aor arna remrugadh, & teid isin mbel, & isin sroin, & tri poiribh an cuirp; mar adeir Galen, co claocluighind se in corp cum na sdaidi ina mbind an taor: oir is edh doni in raod gnimhach in raod fuilngech do coimecniugad ris fein, & is follus sin isna h-altaibh oir is usa leisin {folio 44b} n-aor dul inntu ar son a foilme, & a nosluicti & a n-edluis, na a n-inaduib ele, & is i sin cuis mana taosca is teind iad.