Corpus of Electronic Texts Edition
Rosa Anglica (Author: John of Gaddesden)

Section 10

10

Taiscelta anti ara mbi an bolgach: fetur a radh curub iad na baindida bana is ferr and in uair bit siad co terc & co mor, oir is iad tic amach (co h-urusa) & is anmand in fiabras tic leó, & laigdigi se lena foslucadh. Mad gel iad & a mbeith co mor & co dluith & gan a mbeith a lénmuin da ceile, is lugha is olc sin na da mbedís a ndiaigh a ceile. Mad gel bec cruaid iad & a mbeith i comgar da ceile & comad decuir leó técht amach; is olc so, oir is o adbur remur doniter iad, & marbuid co minic ni is taosca na fetur a n-aipiugad. Da ticid na baindida amach anois & i ndol istech ariss, mad glas iad maille h-anmuinne na brigi; signidi sin in bas, & mad laidir in brig is dochus a ternó, & is ferr an fiabras do techt roimpe na issi do techt ar tus & in fiabras na diaigh.