Corpus of Electronic Texts Edition
Rosa Anglica (Author: [unknown])
Section 24
24
Item an trath curtur ni risin mball teinn is coir a fechuin & a aitherrach co minic, oir uair ann crechtnuidhe se & roteigidh, & ni mothuighter re fuacht an boill é: & da mbia in ball co derg & att and, & in trath laigter air gurub gelad doni, is comartha maith sin: {folio 36b} & mina derrna acht a deirgi fein danmuin and, is comartha sin gur teig an ball; & da mbeith na crechta ann is deimnighi na sin gurub coir a leighes d'atrughugad: & da
p.264
fetur a fulung, coimilter an ball le nendtoig greguidh & le h-eigind talman maille fual, & coimilter don ball; oir is dú na neithi minadurtha do tairring cum tirmachta: & trit sin is maith doibh rostad re spisruib (?) & feoil fliuch arna pudrail & becan bidh & dighi dol co cenn se la. Aindsein gabh caliment & campure, saitsi, uindemuin, emir slebi, macall, soigerin, eiginn talman, co lor ruibh & brister iad; & curtur blonac ganduil fariú & blonac madruidh & cait duibh & ℥ co leith do pibur, & aindsein cuir a medhon cait duibh iad ara mbuain a indidh as, & ara mbuain a croicind de, & rostur é & in sugh tuites as mar sin tinoil & coimil don ball eslan & is mirbuilech an furtacht do-beir don ball sin: & on cat ainmnigter an uindimint sin:
& is maith uindimint in ganduil isin eslainti fuar & isin ídhuin fuar.