Is iad so na cuisi let amuich .i. toitim & bualad na feithi & a combrugad, & a ngerrad tarrsna; ferc & eccla, & imurcach fuachta dunas no imurcach tesa sgailes: & glacad eiscc re n-abur tarcon. Et adeir Avicenna pairilis ris, co cumuir tarbach, ris gach uile ni cenglas & dunas cind & bunadhas na feithid & nach fetund in spirut dul trithu. Is uada is minca tic sin .i. o linn fuar, & ni is lugha ná sin o linn dub & ni is lugha na sin o fuil deirg & ní is rolugha na sin o linn ruadh, acht mina roibh se arna cumusc re linn ele. Et doniter hi o nescoid, & o faothugad na 4 n-eslaintid .i. in galar tuitminnach, & a colica & a muchad na breithe & an apoplexia.