Corpus of Electronic Texts Edition
Rosa Anglica (Author: John of Gaddesden)

Section 54

54

Tuic co fuilid remcuisi agna nescoidibh .i. mar ata remcuis línta , & primcuisí .i. cuis let amuich mar ata toitim no bualad no gerradh ainminic . Na nescoidi doniter ona primcuisibh, uair and doniter iad maille línadh in cuirp, & uair ele gan línadh gid edh bidh linadh rannuighte sa ball a mbí an nescoid, & is uadha doniter sin .i o sgailed an adbuir cum in boill, & is uadha doniter an sgailed sin, o línadh in cuirp uile, no o línadh boill eigin bis a ngaire d'inadh na nescoidi, no o nert an boill innarbus a n-imurcacha uadha cum boill ele anmfuind. Furtachtuigi cuigi sin cengal na mball re ceile no fairsingi na sligidh, & uair and is cuis do tairring in adbuir cum inuidh na nescoidi, & drochcoimplex te an boill, oir is dilis don tes tairraing do dénum.