Corpus of Electronic Texts Edition
Rosa Anglica (Author: John of Gaddesden)

Section 23

23

Mod o adhbur arna dortadh o ball co ball tic in nescoid, tic sin co h-oponn, & mad o imurcach na h-ailemna sa ball, tic co mall, tar eis a ceile. Madh comsuigighti na nescoidi, bid signi comsuigighti acu do reir na lennand o ndentur iad. Mad hi fuil derg bis cintach no bis tresi and, teid dath na nescoidi cum deirgi gan beith solus. Madh he lionn ruadh as mo tigernaidhas and teit an dath cum derge & cum soillsi, mina morga se . Madh linn fuar saillti bis tresi and, teid cum baine maille cinel buidechta, ar son cumuisc lenna fuair ar linn ruad, oir bid linn ruad is e solus in trath nach cumuscinn {MS folio 26a} se re linn ele; & bidh bruth do gnath san inadh a mbi linn fuar saillti. Mad é


p.178

linn dub bis tresi, bi in dath is é dub glas & tromdacht, & anmotuighe & cruas mor ánd, oir da mbeith mothugadh ánd ní ho linn dub glan do dentaighe e . Et ni dentur nescoid o linn dub, acht o fuil remuir, duibh, talmaide, oir derbuid Aueroes nach déin se fiabras neascoid o linn dub glan acht o fuil [etc.]; adeir (& dearbaid [E]) Aueroeis na den linn dub glan neascoid oir ni den si fiabras, acht mina cuimesctar re linn fuar é, no re fuil deirg. Masedh ni déin nescoid, oir is inúnd adbur doibh ; & adeir Ysac isin trachtadh dorindi se fein don fual, da nderrntaighe nescoid o lennuib truailligthi loiscí arna impogh a naduir neimhe, mar ata formica & carpungulus, & antrax, & noli me tangere; & bí ann sin drochbalaid & teinnes, & bruth, & dath dub glas, & truilled, & mairbi in boill.