Corpus of Electronic Texts Edition
Rosa Anglica (Author: John of Gaddesden)

Section 48

48

Is iad so na luibi is maith doibh .i. elefleog, persilli, h-ocus, sgairiole, mersi, elestront; na91 praisce. Feoil ur is maith doib & figida tirma do caithimh, sinnser, & caisi92 oir lagaid siad co maith. Aran tocbala is maith doibh, arna


p.116

berbud co maith a mil no a fín, & is maith doibh fotracadh uisgi milis, & fína, oir fliuchaid siad co maith. Et is maith doib gluasacht mesurda & collad, oir adeir Galen gurub mor desbaid collata bis orro, & trit sin is coir lactuca do tobuirt doib, & canel, & nutmuicc, & sinnser, & spica nardi, & lignum aloés, & ni fín núa na arsaidh is maith doib, acht fín inmedhonach, & ibid co lor de: oir adeir Galen nach fuil acht teine do cur a cend teinidh, & an condum do beith anmann, fín do tobuirt dona macamuibh; & adeir a tobuirt co mesurda dona dainibh oga, & a tobuirt dona senoiribh in méd is ail leó, acht mina roibh in cenn & na feithi co h-anmand. Et in drong bis maille fairsingi na cuislennuibh, gnathuighe baindi maille mil, & re salund, & figidha tirma, maille sil nennta in cetla; & is maith doibh clairéd maith noch doniter do spisraduibh deghbaluid ; & sechnadh cuisle & coimriachtain & imurcach coimriachtana, & smuaintighidh, & teilgte, gid maith ferg doib; oir uair ánd teigid iad co mesurda: & adeir Galen nach decc trite, & ní maith doibh moduracht na cuimgi aicneda, na saothar acht becan, & a ninadh an tsaothuir gnathuighe fotracadh.