Corpus of Electronic Texts Edition
Rosa Anglica (Author: [unknown])

Section 28

28

Et adeir Aueroes curub fotracadh uisgi fuair is ferr ann, da fedadís a fulung co h-aontadach; & coimil ainnsein ola comsuigighti, no ola uiola & na raibi uisgi no ola na roisi, no ni eigin sdipicda ina mbia cinel fuachta dona ballaib imellecha, & daltaibh in droma, do connmuil fliche in fotraici leth istigh: & tirmuigter ainnsein é le h-edach bocc lin, & curtur na lepuidh é, & edach na timcill; & tobuir do, mar adubrumar, baindi dó. Et in trath tair sin do dilegad, fotraici aris, mar adubrumar, & curtur i teg folam no uaignech deghbalaid é, ina mbía becan aoir; & osluicter na fuinneóca ainnsein fuartur an t-aoir: & is


p.100

coir an t-aor do mesrugad an tinadh nach faghann edach in trath fa teid se san fotracadh. Et bid edach fuar solus i fiadnise a leptha tar eis in fotraici, & na h-uindiminnti ara[r] crothad uisgi rosicda; & bidh soightech ina curtur duilleoga saileach & roisi & fínemnach, lan d'uisgi fuar, i fiadnisi a lepta, & curtur duilleoga soilech timcill a leptha, tinoilter re n-eirgi don grein, ara croiter uisgi na roisi, & denadh collad tar eis caithme. Et mad te in aimsir, dentur an t-aor dfuaradh le h-uisgi aca suathad, aca tocbail suas i soigtec & aca legan sis aris i soightec bis co h-isil.