Corpus of Electronic Texts Edition
Rosa Anglica (Author: John of Gaddesden)

Section 25

25

Et orduigter da leighes ann so, re n-abur ordenatum & auenatum .i. leighes doniter d'eorna, & leighes doniter do coirci. Et is amlaidh so doniter ordenatum .i. a croicenn do buain d'eorna, & a nighi co maith a h-aiterrach uisgiidh go minic , & a berbad in fedh re mbeireochuidhi feoil mairt, & a brugh co maith a moirtel aindsein, & curtur bainne almont trit & leagar tri edach é, & berbtar no co tinnscna tiugugad do denum, & is ferrdi feoil do berbad trid. Ar an corugad cetna doniter auenatum & ni fuil and sin , acht gne potaitse doniter do mín coirci maille h-uisgi & re feoil; & doniter potaitse donit Gaill do min remuir coirci maille h-uisgi & re feoil, & doníter potaitse maith tanuidhi mar sin re lind, noch is maith do lucht na heitici & dona dainibh doniter do comthraethadh, & is beg nach82 maith do gach uile duine he.