Corpus of Electronic Texts Edition
Rosa Anglica (Author: [unknown])

Section 15

15

Is iad so na biadha tanuidhi leighis .i. uisgi eórna, no sisan arna sgagad, & fin find uisgiamail deghblasta, & enbruithi cabhun & cerc, & baindhi; & catbruithi eórna, no coirci, gan sgagadh; & cuilis, & uisgi feola, & is maith na neithi so and só, oir adeir Galen gurub usa do nech a linadh do digh na do biadh; & is amlaid so is coir sin do tuicsin .i. don biadh tanuidhi no don biadh remur oir is andum in dilegad indtu só. Et adeir Aueroes curob é in sisan biadh is ferr don lucht aca mbí coimplex te tirim do caithimh, tar eis fotraicí, madh te tirim in aimsir, ar son co fuarann, & co fliuchighinn, & co furtachtaighenn d'innarbad a n-imurcach in gach aon aimsir in gach slighi; & mar sin aderim ann só, co fuil coimplex te tirim co h-aicidech and só. Et da n-abairsi nach fuil imurcach and só, oir ni h-eslainti adburda hí, & aderimsi co tuismigter imurcach innti ar son imurcaigh na h-anmuinne brigi, no esbada in dilegtha , gid tercc iad, ní hiad is cuis don eslainti so.