Corpus of Electronic Texts Edition
Rosa Anglica (Author: John of Gaddesden)

Section 8

8

Et is edh is crinoides ánd .i. cuirp remra mar cruithnechta arna brised cu remur, no arna drocmeilt. Et in trath70 bis methrad isin fual, mod on corp uile tic sé, & a tiacht co mall, bid se mar lín gabala eisc, isin cetgné d'eitici, & da ti co h-opund, is ona h-airnibh tic, & ni bí dath fiabris arin fual ann sin; & da mbía an methrad coimtiugh re lín an damain allaid signidi an 2 gné d'eitici; & da mbia mar ola signidi an 3 gne d'eitici. Oir adeir Aueroés, is andum tic in fiabras so acht deis in fiabris re n-abur efemera, acht isna corpuib bis ullum cuigi; no tar eis fiabris morguigti: & trit sin is eigin a fis dfagbail, cad iad comurthai cumuisc in fiabris so re heiticí & is iad so iadsein .i. imurcach tresi 2 an 3 la a tes co h-airighi , oir is minicc tinnsgnus efemera dol cum digbala, tar eis da uair .x.; & in trath teid tar da uair deg gan comurtha digbala, acht a gnathugad gach aenla co cenn in 3 la is eiticí and sin é.