Corpus of Electronic Texts Edition
Rosa Anglica (Author: John of Gaddesden)

Section 17

17

O do labrurnar co mor don uisgi64 isna fiabrasuibh, fiarfuigter an fognánd an t-uisgi isna fiabrasuibh in gach uile áois. Derbtur nach foghnunn se a n-aon aois, oir ní foghnunn se dona macamuibh, oir moran doilemain65 rigid a leas fo comuir a nol i meid, & ní fuil ailemain san uisgi, masedh ni foghnunn se doibh. Item ni fognunn se dona dainibh oga, oir is ona cosmailius doniter a coiméd, & is contrarda an t-uisgi da coimplex, masedh ni foghnann se doib. Item ni maith dona sendáinibh é, oir is cosmail rena coimplex é; isin lucht ainmesurda sin an trath curtur cosmailius a cenn cosmailis, meduighi se é no cuiridh ar dasacht é, masedh ni maith dona sendainibh é. Et ata Galen ana aigid so a follamnugud , bail a n-abair se co foghnunn an t-uisgi maith do gach uile aois. Et aderimsi nach fuil ar doman ni is mó foghnus do gach uile


p.66

aois co h-uilidi na in t-uisgi, & trit sin is mor do saothar is coir duind do denum dfagbail uisgi fuair, glain, maith {MS folio 11a} & gabum mar sompla biadh, & aoir, & na neithidh rannuighte elé, ma seach; & aderim gurub íad na neithidh mesurda fognus do na neithibh mesurda, & gurub coitcind dona neithibh ainmesurda iad. Et aderim ce mad mesurda in áois, &66 ce madh ainnmesurda nach co tarbach ata, acht co h-egintach, no gurub bec nach h-egintach, oir in úair is remur in biadh ac fecuin an uisgi & nach fetunn se tollad cum na mball67 acht mina seimidti, masedh osa seim siltech in t-uisgi, doní sligi don biadh. cum na mball gan a bec na h-urcoidi do denum: & ní fuil fín, no baindi, no ní diuid ele doni mar sin, masedh ní fuil ni is mó fognus do gach uile áois na in t-uisgi maith. Et na resuin dorindidh i n-aigid na códa so, cetuigim iad, oir ni fognunn se sa sligi ina ndernuidh na resuin, & fognuidh cena ag denum sligi don biadh cum na mball mar adubrumar.