Corpus of Electronic Texts Edition
Rosa Anglica (Author: [unknown])

Section 24

24

Item cuirim mar sompla co tic nescóid cleib, no sgaman, o linn fuar maille laitert, & re h-oime lennann, & is bec dfuil maith bis and sin, ar son imuid lenna fuair & in fiabris & ní eitigenn aonnduine nac maith cuisle and so no muchad ele a cetoir & da n-abra nech nac foghnunn cuisle sa cas so, is fir sin, oir do racha an fuil maith amach & d'anfadh an drochfuil istigh. Aderim ina aigid sin, gurub glic in naduir & ni fuil crich ara gliccus ag follamnugadh in ainmidhi, & mas fir sin coindemuidh sí in fuil maith istigh aici fein & licfid si an drochfuil uaithi. Item adeir Galen curub í an fuil folmuighes in naduir fa deoigh a folud imurcach na lennand; masedh connmuidh in naduir trina gliccas fein in fuil maith fa deoigh aici & rachaid an drochfuil amach, & anfuid an fuil maith istigh. Et adeir Galen48 a contrarda sin a Follamnugadh na Slainti. Et adeir Galen na fognann cuisle sa cas sin, & is i so a cuis , oir


p.44

ní fognund si acht i nda casaibh .i. in trath bis tigerndas ac linn dubh amain, no ac fuil deirg amain, no agna lennuibh ele co h-uilidhi do reir Galen, & ni fuil tigerndas ac fuil deirg ann so, oir ni h-edh doniter acht a loigdiugad, na agna leannaib gu h-uilidhi acht acna lennuibh omha amain. Masedh isin cas só do reir riaglach Galen ni fognunn cuisle and.