Doníter leighes in fiabhris so re n-abur sinocus o da moduibh .i. o cuisle & o uisgi , & adeir Galen gurub maith an cuisle co brath ann da mbia in brig is i laidir, & ní maith an t-uisgi fuar do gnath acht mina roib comartha dileghta in bidh isin flúx, no isin puls, no isin fual; & in trath as mo & is girra in fiabhras: & is trit sin, mad coilirda in fuil co fognann uisgi roim dileghadh an adbuir, oir dilegaid ac fuaradh & ac cosc na mailisi, mailles na cuingillib adubrumar .i. metuighi an t-uisgi fuar na duinti uair ánd & in trath ibes nech a saith de, oir uair and leighisid, no impoigh uair ele cum fletmancia , & adeir Aueroes curub ferr sin na in tecc & trit sin adeir se gurub ferr & gurub disle campura do tabuirt do a lictubairibh & a mbiadhuibh & a ndeochaibh, oir doniter deoch d'uisgi d'eorna & indiuia maille campura i n-aigid na h-itun, oir is mor fuaras se.