Masedh osa fuath lesin naduir in claoclodh opúnd, tairrngter in t-adbur tar eis a céile dfolmugad in meidi is imarcach; & da fiarfuigter dit cad is méd imurcach and sa fisigacht, osa maith an fuil co leir and so, masedh masa maith aonrann di co h-imurcach is imurcach an rann ele, masedh is coir a tairring co leir, da tairrngti aonrann de, aderimsi mar sompla, mar so: gurub imurcach aonpunt amhain, & da tairrngti sin orduigi an naduir an cuid ele di, & o dogeibh an naduir furtacht ona neithi is nesa, linuidh si an esbaid bis uirri. Et ni coir an resun: is cintach hi co leir, masedh is coir a tairring co leir; oir da folmuighter rann di, ni cintuighid na raind ele; no is iad na raind is sia on craidhi is cintach ánd & is uada sin is coir an tairring do denumh; masedh is andsna geguib bis an tairring & an esbaid, and sin, & ni h-andsa preimh.