Corpus of Electronic Texts Edition
Rosa Anglica (Author: John of Gaddesden)

Section 10

10

Item is i .epaumasticus is ferr dib so, & ata omatenus inmedhonach. Item da ndergit baindida lethna dubha, no uaine ar dath in luaidhi, ar fer in fiabhris so, is comartha bais. Item da silid na suile co h-aindeonach isin fiabhras so, is comartha bais, mina roibh nescoid no bruth orro isna fabhradhuibh. Item is drochcomartha ann so, & is comartha bais, tromdacht tar eis a satha collata do denum, & decuir mor ina anail do tarrring ar son egintais na h-eslainti. Item an trath eirges ar tengaidh fir in fiabhris so no a n-eslainti ger ele, bainnidha beca dubha, is comartha bais, & co h-airighi da sanntuighe neithi te. Item da n-eirgi ar glun fir in fiabhris so baindi bec dubh, & a beith derg na timcill, is comartha bais, & ce dechuid na baindida sin as co h-opunn, minar gnathaigh a mbeith air na slainti is cuis eccla; & is baoglach nescoid deirgi a mball oirida eigin, & co h-airighi da n-eirgi nescoid aran inadh cum a cuirind in ball sin a imurcach, no laim riu.