Corpus of Electronic Texts Edition
Rosa Anglica (Author: John of Gaddesden)

Section 6

6

Et atait cuise imda spetcialda rannaighte ele agna fiabrasuib sin .i. mar tait biada te tirim ainmesardha, no co caiter imurcach don biad sin, no co caiter robecan de, no co caiter ar cedlongad é, oir claochluighter aindsein annsa ghaile he & annsa h-aeib cum tesa & cum tirmachta laidire, & beirid an gaile & na h-ae cum in coimplexa sin, & in fuil doniter don biad sin bi si te tirim ainmesurda & imdaigter linn ruad ina meid & ainmesruidter ina cail, & bacaid oibrighte in domblais, & ni tairrgnfe se linn ruad, & anfaid mar sin maille risin fuil & biaid co h-adhuatmar don naduir, & gebeid truailled & morgad;


p.10

oir an tan teit linn ruad ona slighi nadurda fein ina meid no ina cail no indtu ar aon, bi se ann sin arna dortadh i fuil deirg, & na baill oilter arin fuil sin bit siat tar eis a ceile ag dol ona coimplex nadurda fein cum drochcoimplexa te tirim & doniter eslainti lenna ruaid mar sin. Is cuis ele don fiabras sin .i. aer te tirim & imurcach saethair & beith co rofada ina collad & aicide na h-anma mar ata ferg & fuasmad & smuaintige an craide & neithi ele is cosmuil riu.