Corpus of Electronic Texts Edition
An Irish Materia Medica (Author: Tadhg Ó Cuinn)
subsection 258
258. Storax: .i. gum crainn noch ata teasaide isa cet ceim & tirim sa ii ceim & as annsan Innia da gabar & ata brigh atairrngteac ann & ata foladh reamar aigi & atait tri gneiti air .i. storax licita & in Calabria do gabur e & storax calamita & on focul Greigise darab ainm calo aderur e & is inann calo isin Greigis & maith isan Gaeidilg oir
p.252
asi so gne as fearr don storax & storax & storax micor & as annsan Innia da gabur e & beirig {ms folio 100b2} a brigh x mbliadhna an gach gne dibh so. Storax & ros dearg da bearbadh ar uisce & a fascadh tri edach lin & glanuig an incinn. Ceirin da ceir nua & do storax & d'ola coitcinn da cur ar bel an gaili & coiscidh an tinneas. Pillule da denamh do storax & do mil & a congmail fo bun na
teangadh & foiridh catarrus. Storax da cur ar smeroidib dearga & a deatach da ligin fon maclac & togairmig an fuil mista & foiridh suficasio matrisis. Storax da bearbadh ar fin & an fin da congmail isin bel co fada & foiridh tuitim an t-sine seain. Pillule da denamh don storax maille re mil & foiridh easlainte na mball spiradalta. Et as imcubaidh storax da cur an uinnemintibh & a tretaib an aigid na fuaraideachta oir coinnmigh a mbrigh innta da gnath. Storax da congmail fo bun na fiacal & daingnigh iat co ro- maith.