Corpus of Electronic Texts Edition
An Irish Materia Medica (Author: Tadhg Ó Cuinn)

subsection 253

253. Sandaili: fuar isin iii ceim & tirim sa ii ceim & gne do maidibh beca iat & atait tri gneithi orra .i. sandaili ailbi & dat geal bis air & sandalus ruibi & dat ruagh bis air & sandaili citrini & dat buighi bis air & ase sin dat as fearr air {ms folio 100a1} & beirig a mbrigh da xx bliadhan i ngac gne dib so. Et ata brigh comfurtachtaithe innta ona deagbaladh fein & brigh claeclaithe ona fuaraideacht gurab uime sin is mor fodhnus an aigid droch-coimpleasca teasaide an fiabrasa & do cosc itan & ainnteasa na n-ae. Pudur sanndaili da bearbadh ar uisce & siucra da cur ann & bidh amail siroip & furtactaigid in tsiroip so na heaslainteadha adubramur. Pudur sandaili da cur an oiluigh mandragora & a coimilt don edan & togairmigh an codlad isna fiabrasa gera & furtachtaigid teinneas an

p.250

cinn. Item, pudur sandaili da cumasc maille re sug lactuca & edac dearg da thuma ann & a cur ar druim na n-ae & coiscidh flux fola na srona ti ona haeib. Pudur sannduili & ola na roisi & finegra da cumasc trit a ceili & etach dearg da tuma ann & a cur ar druim na n-ae & coiscidh a n-ainnteas. Item, cumaisctear an pudur cetna maille re huisce fertana & re finegra & etach da tuma ann & a cur ar bel an gaili & coiscidh an sceatrach. Item, pudur sandali da cumasc maille re sugh na cruaiche padraig & a cur arna neascoidib ana tosach{ms folio 100a2} & fritbuailig iat.